Paggamit sa Dali, Sunod Kanako—Alang sa Sunday School

Pagpangandam sa Pagtudlo sa Sunday School

Ang personal ug pamilya nga pagtuon diha sa panimalay kinahanglang mao ang sentro sa pagkat-on sa ebanghelyo. Mao usab kini alang kanimo ug alang niadtong imong tudloan. Samtang mangandam ka sa pagtudlo, sugdi pinaagi sa pag-angkon og kaugalingon nimong mga kasinatian diha sa mga kasulatan. Ang imong labing importante nga pagpangandam mahitabo samtang magsunod sa ebanghelyo, magsiksik sa mga kasulatan, ug magtinguha sa inspirasyon sa Espiritu Santo.

Ang Dali, Sunod Kanako—Alang sa mga Indibidwal ug mga Pamilya usa ka importante nga bahin sa imong personal nga pagtuon ug sa imong pagpangandam sa pagtudlo. Makatabang kini kanimo nga makaangkon og mas lawom nga panabot sa doktrinal nga mga baroganan nga makita diha sa mga kasulatan. Makatugot usab kini nimo sa pagdasig ug pagdapit sa mga sakop sa klase sa paggamit sa Dali, Sunod Kanako—Alang sa mga Indibidwal ug mga Pamilya sa pagpalambo sa ilang personal ug pamilya nga pagtuon sa kasulatan (alang sa tabang sa pagbuhat niini, tan-awa sa “Mga Ideya alang sa Pag-awhag og Personal ug Pamilya nga Pagtuon” dinhi niini nga kapanguhaan). Sa pagbuhat nimo sa ingon, hinumdomi ang pagpakabana sa mga sakop sa klase kansang mga kahimtang sa pamilya mahimong wala magsuporta sa regular nga pamilya nga pagtuon sa kasulatan ug family home evening.

Atol sa imong pagpangandam, mga hunahuna ug mga impresyon moabot kanimo mahitungod sa mga tawo nga imong gitudloan. Makadawat ka og mga panabot kon sa unsang paagi ang mga baroganan diha sa mga kasulatan mopanalangin sa ilang mga kinabuhi. Magiyahan ka sa pagdasig kanila sa pagdiskobre niadto nga mga baroganan samtang magkat-on sila gikan sa mga kasulatan alang sa ilang mga kaugalingon.

Mga Ideya sa Pagtudlo

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga nalatid sa pagtulun-an niini nga kapanguhaan. Ayaw hunahunaa kining mga ideya isip mga instruksiyon sa mga lakang nga buhaton apan isip mga sugyot sa pagdasig sa kaugalingon nimong inspirasyon. Nakaila ka sa imong mga sakop sa klase, ug mas mailhan nimo sila samtang kamo dungan nga magkat-on diha sa klase. Ang Ginoo nakaila usab kanila, ug Siya modasig kanimo uban sa labing maayong paagi sa pagtabang sa mga sakop sa klase sa paglig-on sa ilang pagkat-on sa ebanghelyo diha sa panimalay.

Daghan pang ubang kapanguhaan nga magamit alang kanimo samtang mag-andam ka, lakip sa mga ideya diha sa Dali, Sunod Kanako—Alang sa mga Indibidwal ug mga Pamilya ug mga magasin sa Simbahan. Alang sa dugang nga impormasyon kabahin niini ug uban pang mga kapanguhaan, tan-awa ang seksiyon nga giulohan og “Dugang nga mga Kapanguhaan” niini nga kapanguhaan.

Ubang mga Butang nga Angayang Hinumdoman

• Ang pagkat-on sa ebanghelyo mao ang labing epektibo kon kini nakasentro diha sa panimalay. Isip magtutudlo, ikaw adunay importante nga responsibilidad sa pagsuporta, pag-awhag, ug pag-ugmad og pagkat-on sa ebanghelyo diha sa panimalay sa mga sakop sa klase.

• Ang pagkakabig sa mga sakop sa klase ngadto ni Jesukristo ug sa Iyang ebanghelyo mapalawman kon sila makasabot ug mogamit sa tinuod nga doktrina. Awhaga sila sa pagrekord ug pagsunod sa mga impresyon nga ilang madawat gikan sa Espiritu Santo.

• Ang pagtudlo mas labaw pa kay sa paglektyor, apan mas labaw pa usab kini kay sa yano lamang nga paggiya og usa ka panaghisgotan. Kabahin sa imong tahas mao ang pag-awhag og partisipasyon nga makapabayaw ug gibase diha sa mga kasulatan. Kinahanglan usab nimong ipaambit ang makadasig nga mga panabot nga imong nadawat samtang nagtuon ka sa mga kasulatan.

• Hinumdomi nga daghang sakop sa klase ang makabaton og makahuluganon nga mga kasinatian sa pagtuon diha sa panimalay sa samang mga kasulatan nga inyong mahisgotan diha sa klase. Imong masuportahan ang ilang pagtuon sa kasulatan pinaagi sa paghatag kanila sa makanunayong mga oportunidad nga makapaambit kon unsay ilang nakat-onan sa panimalay.

• Ang Langitnong Amahan gusto nga molampos ka isip usa ka magtutudlo. Mihatag Siya og daghang kapanguhaan sa pagtabang kanimo, lakip na ang mga miting sa konseho sa magtutudlo. Niining mga miting mahimo kang magpakitambag sa ubang mga magtutudlo mahitungod sa mga hagit nga imong giatubang. Mahimo usab nimong hisgotan ug sundon ang mga baroganan sa Kristohanon nga pagtudlo.

• Makat-on og maayo ang mga tawo kon sila adunay mga oportunidad sa pagtudlo. Usahay, ikonsiderar ang pagtugot sa mga sakop sa klase, lakip na ang mga batan-on, sa pagtudlo og usa ka bahin sa leksiyon. Ibase kini nga desisyon sa mga panginahanglan ug mga abilidad sa mga sakop sa klase. Kon modapit ka og usa ka sakop sa klase sa pagtudlo, paggahin og panahon sa pagtabang niya nga maandam daan pinaagi sa paggamit sa mga ideya nga makita niini nga kapanguhaan ug sa Dali, Sunod Kanako—Alang sa mga Indibidwal ug mga Pamilya. Hinumdomi nga isip gitawag nga magtutudlo, ikaw ang unang responsable sa unsay itudlo diha sa klase.

Kini nga kapanguhaan naglakip og mga latid sa pagtudlo alang sa matag semana sa tuig. Sa mga Dominggo nga walay ipahigayon nga Sunday School tungod sa kinatibuk-ang komperensiya, komperensiya sa stake o sa bisan unsa pang rason, ang sakop sa klase giawhag sa pagpadayon sa pagbasa sa Bag-ong Tugon diha sa panimalay sumala sa gilatid nga eskedyol diha sa Dali, Sunod Kanako—Alang sa mga Indibidwal ug mga Pamilya. Kon gipahigayon ang Sunday School, mahimo ka nga mopili nga laktawan o usahon ang mga latid.