Dugang nga mga Kapanguhaan

Kini nga mga kapanguhaan makita diha sa Gospel Library nga app ug sa ChurchofJesusChrist.org.

Dali, Sunod Kanako—Alang sa mga Indibidwal ug mga Pamilya

Mahimo nimong ipahiangay ang bisan unsa nga mga kalihokan gikan sa Dali, Sunod Kanako—Alang sa mga Indibidwal ug mga Pamilya aron magamit sa inyong klase sa Sunday School. Kon ang mga sakop sa klase nakagamit na niining mga kalihokan diha sa ilang personal o pamilya nga pagtuon sa kasulatan, awhaga sila sa pagpaambit sa ilang mga kasinatian ug mga ideya.

Mga Himno ug Songbook sa mga Bata

Ang sagradong musika nagdapit sa Espiritu, nagtabang kanato nga mabati ang gugma sa Dios, ug nagtudlo og doktrina sa halandomong paagi. Agig dugang sa paggamit sa giimprinta nga bersyon sa Mga Himno ug sa Songbook sa mga Bata, makakita ka og video ug mga narekord nga audio sa daghang himno ug kanta sa mga bata sa music.ChurchofJesusChrist.org ug diha sa Sacred Music and Gospel Media apps.

Mga Manwal sa Seminary ug Institute

Ang mga manwal sa seminary ug institute naghatag og makasaysayanong kaagi ug doktrinal nga komentaryo alang sa mga baroganan ug mga asoy nga makit-an diha sa mga kasulatan. Tingali makadasig usab kini og mga ideya sa pagtudlo alang sa mga klase sa Sunday School.

Mga Magasin sa Simbahan

Ang Liahona ug Alang sa Kalig-on sa mga Kabatan-onan nga mga magasin naghatag og mga artikulo ug ubang mga feature nga makadugang sa baroganan nga imong gitudlo gikan sa Dali, Sunod Kanako—Alang sa Sunday School.

bata nagtuon sa magasin sa Simbahan ug sa mga kasulatan

Gospel Topics

Sa Gospel Topics (topics.ChurchofJesusChrist.org) imong makit-an ang sukaranan nga mga impormasyon mahitungod sa daghang mga hilisgotan sa ebanghelyo, kauban sa mga link ngadto sa makatabang nga mga kapanguhaan, sama sa may kalabotan nga mga mensahe sa kinatibuk-ang komperensiya, mga artikulo, mga kasulatan ug mga video. Makit-an usab nimo ang Gospel Topics Essays, nga nagtanyag og gipaladman nga impormasyon mahitungod sa mga isyu sa doktrina ug kasaysayan, ingon man sa mga tubag sa nagkadaiyang pangutana mahitungod sa Simbahan ug sa mga pagtulon-an niini.

Isangyaw ang Akong Ebanghelyo

Kini nga giya alang sa mga misyonaryo naghatag og kinatibuk-ang pagpasabot sa nag-una nga mga baroganan sa ebanghelyo.

Alang sa Kalig-on sa mga Kabatan-onan nga (booklet)

Kini nga kapanguhaan naglatid sa mga sumbanan sa Simbahan nga makatabang nato sa pagsunod sa ebanghelyo ug matagamtam ang pakig-uban sa Espiritu. Hunahunaa ang pagdangop niini sa kanunay, ilabi na kon ikaw nagtudlo sa kabatan-onan.

Mga Video ug Sining [Art]

Ang buhat sa sining, mga video, ug ubang media makatabang niadtong imong tudloan nga makasabot sa doktrina ug makalantaw sa mga istorya nga may kalabotan sa mga kasulatan. Bisitaha ang Gospel Media sa GospelMedia.ChurchofJesusChrist.org aron maka-browse sa mga kapanguhaan sa koleksiyon sa media sa Simbahan. Ang Gospel Media anaa usab sa usa ka mobile nga app. Daghang hulagway nga mahimo nimong gamiton sa klase makita diha sa Libro sa mga Hulagway sa Ebanghelyo.

Pagtudlo sumala sa Pamaagi sa Manluluwas

Ang Pagtudlo sumala sa Pamaagi sa Manluluwas makatabang nimo sa pagkat-on ug sa paggamit sa mga baroganan sa Kristohanon nga pagtudlo. Kining mga baroganan hisgotan ug buhaton diha sa mga miting sa konseho sa magtutudlo.