Usa ka Sundanan sa Pagtudlo

Ang matag latid niini nga kapanguhaan nagsunod og usa ka sundanan sa pagdapit, pagpaambit ug pagtudlo sa doktrina. Sa daghang mga sitwasyon, samtang magtudlo ka, ang mga elemento niining sundanan mahimong magsapaw o mahitabo sa laing han-ay. Sama pananglit, ikonsiderar nga ang pagpaambit usa ka oportunidad sa pagtudlo sa doktrina, ug ang pagtudlo sa doktrina kinahanglang maglakip og mga pagdapit nga mopaambit. Tugoti ang mga pagpahiangay nga natural lang nga mahitabo niini nga sundanan, magsunod sa mga pag-aghat sa Espiritu aron matubag ang mga panginahanglan niadtong imong gitudloan.

Dapita ang Pagpaambit

Isip kabahin sa kada klase, dapita ang mga sakop sa klase sa pagpaambit og mga ideya ug mga kasinatian nga ilang nasinati sa miaging semana samtang nagtuon sila sa mga kasulatan isip mga indibidwal ug mga pamilya ug migamit sa unsay ilang nakat-onan. Tabangi ang mga sakop sa klase nga makita nga ang ilang personal nga pagkat-on sa gawas sa klase importante. Ang ilang indibidwal nga pagkakabig ngadto sa Langitnong Amahan ug ni Jesukristo mahitabo dili lang pinaagi sa pagkat-on ma-Dominggo apan pinaagi usab sa ilang inadlaw nga mga kasinatian. Kon ang mga sakop sa klase makadungog sa mga kasinatian ug mga pagpamatuod sa usag usa kabahin ni Jesukristo ug sa Iyang ebanghelyo, sila mas adunay kalagmitan nga magtinguha og susama nga mga kasinatian sa ilang kaugalingon.

Dili ang tanan mahimong makabasa sa mga kapitulo sa matag leksiyon, ug bisan ang uban kinsa mibasa dili mobati nga komportable nga mopaambit. Siguroa nga ang tanang sakop sa klase mobati nga sila bililhong bahin sa klase, maaduna man sila o walay butang nga mapaambit.

Itudlo ang Doktrina

Ikaw ug ang mga sakop sa imong klase kinahanglang nakatutok diha ni Jesukristo ug sa Iyang doktrina—ang mahangtorong mga kamatuoran sa ebanghelyo—nga makita diha sa gitahas nga mga tudling sa kasulatan. Ang Dali, Sunod Kanako—Alang sa mga Indibidwal ug mga Pamilya makatabang kanimo nga mas makasabot sa doktrina nga imong itudlo. Samtang maghisgot ka sa doktrina gikan sa mga kasulatan, unsa nga mga bersikulo, mga kinutlo, mga kasinatian, mga pangutana, ug dugang nga mga kapanguhaan ang mahimo nimong mapaambit? Unsaon kaha nimo paggamit niining mga kapanguhaan sa pagtabang sa mga sakop sa klase nga makadiskobre ug makasabot sa mga baroganan sa ebanghelyo? Unsaon nimo sila pagtabang sa paglig-on sa ilang hugot nga pagtuo diha sa Langitnong Amahan ug ni Jesukristo?