pamilya nga nagtan-aw sa album sa litrato

Disyembre 26–Enero 1

Kita Ang Responsable sa Atong Kaugalingong Pagkat-on

Samtang nagbasa ug namalandong ka sa mga tudling sa kasulatan niini nga latid, irekord ang espirituwal nga mga impresyon nga imong nadawat. Modapit kini sa Espiritu diha sa imong pagpangandam. Ang Dali, Sunod Kanako—Alang sa mga Indibidwal ug mga Pamilya ug ang mosunod nga mga ideya makatabang kanimo nga makadasig sa mga tawo diha sa imong klase nga magtuon sa Bag-ong Tugon karong tuiga.

pagpaambit nga icon

Dapita ang Pagpaambit

Usa sa imong mga tumong isip magtutudlo mao ang pag-awhag sa mga sakop sa klase nga makakat-on gikan sa mga kasulatan nga sila ra ug kauban sa ilang mga pamilya. Ang pagkadungog sa mga kasinatian sa uban makapadasig kanila nga magtinguha sa ilang kaugalingong kasinatian. Busa, sa pagsugod sa matag klase, hangyoa ang mga sakop sa klase sa pagpaambit og mga kasulatan gikan sa ilang pagtuon nga nakapadasig o nakapatandog kanila.

icon sa pagtudlo

Itudlo ang Doktrina

Ang pagkat-on nagkinahanglan og paglihok pinaagi sa hugot nga pagtuo.

• Unsaon nimo pagdasig ang mga sakop sa imong klase nga mas mahimong aktibo sa ilang pagkat-on, imbis nga mobutang sa maong responsibilidad diha sa magtutudlo? Aniay usa ka ideya. I itsa ang humok nga butang ngadto sa sakop sa klase, kinsa kanhi na nimong gihangyo sa paghimo og mga paningkamot sa pagsalo niini. Gamita kini nga kalihokan aron sa pagsugod og usa ka panaghisgotan mahitungod sa mga tahas sa mga tigkat-on ug sa mga magtutudlo sa pagkat-on sa ebanghelyo. Isip mga tigkat-on, unsaon nato sa “pagsalo” kon unsay gitudlo diha sa atong mga klase? Ang mga pamahayag makita-an diha sa “Dugang nga mga Kapanguhaan” mahimong makatabang niining panaghisgotan.

• Ang tanang sakop sa klase adunay responsibilidad sa pagdapit sa Espiritu nganha sa klase. Aron matabangan ang mga sakop sa klase nga makasabot niini, hangyoa sila sa pagbasa sa Alma 1:26 ug Doktrina ug mga Pakigsaad 50:13–22; 88:122–23 ug ipaambit kon unsa ang mahimo sa mga magtutudlo ug mga estudyante sa pagdapit sa Espiritu. Tingali makatabang ang pagsulat sa ilang mga tubag diha sa pisara ubos sa mga ulohan sama niini: Unsay mahimo sa magtutudlo ug Unsay mahimo sa mga tigkat-on. Ang mga sakop sa klase makahimo og usa ka poster uban sa ilang mga tubag nga mahimong ipakita alang sa mosunod nga pipila ka semana.

Kita kinahanglan masayod sa kamatuoran sa atong kaugalingon mismo.

• Daghang tudling sa Bag-ong Tugon ang nagtudlo og mga baroganan nga makagiya sa atong pagpangita sa kamatuoran. Ang mga ehemplo naglakip sa Lucas 11:9–13; Juan 5:39; 7:14–17; ug 1Mga Taga-Corinto 2:9–11. Mahimo nimong dapiton ang mga sakop sa imong klase nga nakabasa niining mga tudling sa ilang personal nga pagtuon sa pagpakigbahin sa unsay ilang nakat-onan. O mahimo nimong basahon kining mga tudling isip usa ka klase ug dapiton ang mga sakop sa klase sa pagpakigbahin kon giunsa nila pagkabaton ang ilang mga pagpamatuod.

  mga batan-ong lalaki ug babaye diha sa klasehanan

  Ang pagtinguha sa pagkat-on pinaagi sa hugot nga pagtuo makatabang kanato nga makabaton sa kaugalingon natong mga pagpamatuod.

• Ang Mga Buhat 17:10–12 naghulagway sa mga Santos nga misiksik sa mga kasulatan ug nakabaton sa ilang kaugalingong pagsaksi sa kamatuoran. Aron maawhag ang mga sakop sa klase sa pagsunod sa ilang ehemplo, basaha kining mga bersikulo nga magdungan ug dapita ang mga sakop sa klase sa pagpakigbahin sa mga tudling sa kasulatan nga nakapalig-on sa ilang mga pagpamatuod sa ebanghelyo.

Unsaon man nato sa paghimo sa atong pagtuon sa kasulatan nga mas makahuloganon?

• Ang pagpalambo og kinaiya sa pagtuon sa kasulatan mahimong mahagiton alang sa mga sakop sa klase nga mibati nga wala kanila ang gikinahanglan nga panahon, panabot, o mga kahanas. Unsa man ang imong mahimo aron sa pagtabang kanila nga magmalamposon? Aron matabangan ang mga sakop sa klase nga makabaton og pagsalig sa pagtuon sa mga kasulatan, mahimo kang mopaambit og impormasyon gikan sa “Mga Ideya sa Pagpalambo sa Inyong Personal nga Pagtuon sa Kasulatan” sa Dali, Sunod Kanako—Alang sa mga Indibidwal ug mga Pamilya. Tingali ikaw o ang ubang mga sakop sa klase mahimong mopaambit og mga kasinatian gamit ang pipila niining mga ideya o ubang makahuloganon nga kasinatian sa pagtruon sa mga kasulatan. Mahimo usab nga mopili ka og usa ka kapitulo sa Bag-ong Tugon ug mosulay sa pagtuon niini isip usa ka klase gamit ang uban niining mga ideya.

mga kapanguhaan nga icon

Dugang nga mga Kapanguhaan

Pag-angkon og espirituhanong kahibalo alang sa atong kaugalingon.

Ang Propetang si Joseph Smith nagtudlo: “Ang butang sa Dios adunay bug-at nga kahulogan; ug ang panahon, ug kasinatian, ug pagmabinantayon ug pagpamalandong ug matinud-anong mga hunahuna maoy bugtong paagi nga makakaplag niining tanan. Ang imong hunahuna, O tawo! kon ikaw mogiya sa usa ka kalag ngadto sa kaluwasan, kinahanglang mokab-ot hangt[o]d sa kinatumyan sa mga langit ug didto pangitaon ug hinuktokan ang labing mangitngit nga dili matugkad, ug ang lapad nga wanang sa kahangt[o]ran—ikaw kinahanglan makigsandurot sa Dios. Pagkagamhanan ug pakamadunggannon sa hunahuna sa Dios, kay sa walay hingungdan nga imahinasyon sa tawhanong kasingkasing!” (Mga Pagtulun-an sa mga Presidente sa Simbahan: Joseph Smith [2007], 321).

Si Elder David A. Bednar mipasabot: “Kon ang tanan nga inyo o akong nahibaloan mahitungod ni Jesukristo ug sa Iyang gipahiuli nga ebanghelyo mao lamang ang gitudlo o gisulti kanato sa ubang mga tawo, niana ang pundasyon sa atong pagpamatuod Kaniya ug sa Iyang mahimayaon nga buhat sa ulahing mga adlaw natukod diha sa balas. Dili kita angay nga mosalig lang o manghulam og kahayag sa ebanghelyo ug kahibalo gikan sa ubang tawo—bisan niadtong atong gihigugma ug gisaligan” (“Andam nga Makaangkon sa Matag Gikinahanglan nga Butang,” Liahona, Mayo 2019, 102).

Pagpalambo sa Atong Pagtudlo

Pabiling naka-focus sa doktrina. Siguroa nga ang mga panaghisgotan sa klase magpabiling nakabase sa mga kasulatan ug sa mga pagtulon-an sa mga propeta. Mahimo nimo kini pinaagi sa pagpangutana og sama niini: “Unsa nga mga kamatuoran sa ebanghelyo ang atong makat-onan gikan sa mga komentaryo nga atong nadungog?” o “Aduna bay tawo nga mahimong mopaambit og kasulatan nga may kalabotan sa unsay atong nahisgotan?” (Tan-awa sa Pagtudlo sumala sa Pamaagi sa Manluluwas, 20–21.)