Maria ug Elisabet

Enero 2–8

Mateo 1; Lucas 1

“Mahitabo Unta Kanako ang Imong Gisulti”

Sa dili pa nimo basahon ang bisan unsa nga dugang nga mga materyal sa pagtuon, basaha ug pamalandongi ang Mateo 1 ug Lucas 1, ug irekord ang imong espirituwal nga mga impresyon. Tugoti ang Espiritu nga mogiya sa imong pagpangandam. Dayon suhira ang mga ideya niini nga latid ug sa Dali, Sunod Kanako—Alang sa mga Indibidwal ug mga Pamilya.

pagpaambit nga icon

Dapita ang Pagpaambit

Ang nag-unang katuyoan nila ni Mateo, Lucas, ug sa ubang mga tigsulat sa Ebanghelyo mao ang pagpamatuod nga si Jesukristo mao ang Anak sa Dios. Hatagi ang mga sakop sa klase og pipila ka minuto sa pagrebyo sa Mateo 1 o Lucas 1 ug sa pagpaambit og usa ka bersikulo nga nagpalig-on sa ilang hugot nga pagtuo diha ni Jesukristo. Isugyot ngadto sa klase nga samtang magtuon sila sa Bag-ong Tugon karong tuiga, mahimo silang magtipig og lista sa mga tudling nga nagpamatuod nga si Jesukristo mao ang Anak sa Dios. Mahimo gani kamong magtipig niini nga lista isip usa ka klase.

icon sa pagtudlo

Itudlo ang Doktrina

Mateo 1:18–25; Lucas 1:5–80

Ang Langitnong Amahan molihok pinaagi sa Iyang matinud-anong mga anak aron sa pagtuman sa Iyang mga katuyoan.

• Ang mga sakop sa klase mas makabaton og makahuloganong mga kasinatian samtang magtuon sa Bag-ong Tugon karong tuiga kon makakat-on sila og mga leksiyon gikan sa mga kasinatian sa mga tawo nga ilang nabasahan. Aron matabangan sila sa pagbuhat niini, mahimo nimong isulat ang mga ngalan sa mga tawo sa Mateo 1 ug Lucas 1 diha sa pisara, kauban sa mga pakisayran sa kasulatan mahitungod niining mga indibidwal, sama sa mosunod:

  • Maria (Lucas 1:26–56)

  • Jose (Mateo 1:18–25)

  • Elisabet (Lucas 1:5–7, 24–25, 40–45, 57–60)

  • Zacarias (Lucas 1:5–23, 59–64)

  Unsay atong makat-onan gikan niini nga mga asoy nga makatabang kanato?

• Aron matabangan ang mga sakop sa klase nga maghunahuna og mas lawom mahitungod ni Maria ug sa iyang papel diha sa plano sa Amahan basaha og dungan ang Lucas 1:26–38, 46–56, nga mangita sa mga butang nga gisulti ni Maria nga mopadayag og butang mahitungod sa iyang pagkatawo. Unsa pa man ang atong makat-onan mahitungod ni Maria?

Lucas 1:5–25

Ang mga panalangin sa Dios moabot sumala sa Iyang panahon.

• Mahimong adunay mga tawo sa inyong klase kinsa, sama nila ni Elisabet ug Zacarias, nagpuyo sa matarong nga paagi ug sa gihapon wala makadawat sa gilaoman nga panalangin. Ikonsiderar ang pagdapit sa klase sa pagsiksik sa Lucas 1:5–25, nga mangita sa mga leksiyon nga mahimo nilang makat-onan gikan nila ni Elisabet ug Zacarias mahitungod sa paghulat sa Ginoo. Unsa ang ubang mga ehemplo sa paghulat sa gitakda nga panahon sa Ginoo nga mapakigbahin sa mga sakop sa klase gikan sa ilang kaugalingong kinabuhi o gikan sa mga istorya diha sa mga kasulatan? Unsa ang atong makat-onan gikan niini nga mga ehemplo? Ang mga sakop sa klase makahisgot usab sa pamahayag diha sa “Dugang nga mga Kapanguhaan.”

Lucas 1:26–38

“Sa Dios walay butang nga dili mahimo.”

• Ang mga sakop sa klase usahay mahimong maghunahuna—sama ni Maria—kon sa unsang paagi nga ang mga plano sa Dios o ang mga saad ngadto kanila matuman. Aron matabangan ang mga sakop sa klase nga makasabot nga pinaagi sa gahom sa Dios ang tanang butang posible, mahimo nimong i-display ang hulagway nga Ang Pagpahibalo: Si Anghel Gabriel Mipakita ni Maria (Libro sa mga Hulagway sa Ebanghelyo,nu. 28) ug dapita sila nga magbasa og dungan sa Lucas 1:26–38. Unsay atong makat-onan mahitungod sa pagbuntog sa daw imposible pinaagi sa pagtuon sa mga pulong ug mga aksiyon ni Maria? Hangyoa ang mga sakop sa klase sa pagpaambit og mga kasinatian diin ang Dios mitabang kanila nga matuman ang usa ka butang nga sa ilang hunahuna imposible.

mga kapanguhaan nga icon

Dugang nga mga Kapanguhaan

Naghulat sa Ginoo.

Nakasabot nga daghan kanato ang mangutana kon nganong kita kinahanglan nga magpaabot sa mga panalangin sa Dios, miingon si Elder Jeffrey R. Holland:

“Ang tubag niana nga mga pangutana “Oo, ang Dios makahatag og mga milagro diha dayon, apan sa dili madugay mahibaloan nato nga ang mga panahon sa atong mortal nga panaw Iyaha ug Siya lamang ang makabuot.’ … Ang hugot nga pagtuo nagpasab[o]t nga mosalig sa Dios sa maayo ug sa daotang mga panahon, bisan og naglakip kini sa mga pag-ant[o]s hangt[o]d atong makita ang Iyang mga bukton nga ipadayag tungod og alang kanato. …

“… Apan kadtong ‘nagahulat sa Ginoo magabag-o sa ilang kusog [ug]; sila manlupad pinaagi sa mga pako ingon sa mga agila; sila manalagan, ug dili makapuyan: sila manlakaw, ug dili mangaluya’ [Isaias 40:31]. Mag-ampo ako nga “sa dili madugay”—haduol na o taud-taod pa—kadto nga mga panalangin moabot sa matag usa kaninyo nga nangayo og kahupayan gikan sa inyong kasubo ug sa kagawasan gikan sa inyong kasub-anan. Mosaksi ako mahitungod sa gugma sa Dios ug sa Pagpahiuli sa Iyang mahimayaon nga ebanghelyo, nga mao, o sa lahi nga paagi, maoy tubag sa matag isyu nga atong giatubang.” (“Naghulat sa Ginoo,” Liahona, Nob. 2020, 116–17).

Pagpalambo sa Atong Pagtudlo

Awhaga ang mga sakop sa klase sa pagtuon sa mga kasulatan diha sa panimalay. Usa ka paagi nga maawhag nimo ang pagtuon sa kasulatan diha sa panimalay mao ang paghatag og panahon aron mapaambit sa mga sakop sa klase ang mga nadiskobrehan ug mga ideya gikan sa ilang personal ug pamilya nga pagtuon sa kasulatan (tan-awa sa Pagtudlo sumala sa Paagi sa Manluluwas, 29).