babaye nga mipaambit sa ebanghelyo diha sa estasyunan sa tren

Enero 16–22

Juan 1

Among Nakit-an ang Mesiyas

Samtang ikaw mobasa ug mamalandong sa Juan 1, pag-ampo alang sa espirituhanong giya diha sa imong responsibilidad sa pagtudlo mahitungod sa pagpamatuod ni Juan. Irekord ang mga impresyon nga imong madawat. Ang Dali, Sunod Kanako—Alang sa mga Indibidwal ug mga Pamilya ug ang mga ideya niining latid makatabang kanimo nga makapadasig sa mga tawo diha sa imong klase nga makasabot ug mogamit sa doktrina niini nga kapitulo.

pagpaambit nga icon

Dapita ang Pagpaambit

Aron matabangan ang mga sakop sa klase nga mopaambit sa unsay ilang makat-onan, mahimo nimo silang hangyoon sa pagsulat og mga pangutana, mga komentaryo, o mga ideya gikan sa ilang nabasahan diha sa ginunting nga mga papel ug ibutang kini sa usa ka sudlanan. Pagkuha og mga ginunting gikan sa sudlanan aron hisgotan isip usa ka klase.

icon sa pagtudlo

Itudlo ang Doktrina

Juan 1:1–5

Si Jesukristo anaa na “sukad pa gayod sa sinugdan uban sa Dios.”

• Unsa man ang gitudlo ni Juan mahitungod sa premortal nga Kristo? Nganong importante man nga masayod sa premortal nga mga tahas ni Kristo? Mahimong makatabang ang pagsulat niining mga pangutana diha sa pisara ug hangyoa ang mga sakop sa klase sa pagpangita sa mga tubag diha sa Juan 1:1–5 (tan-awa usab sa Hubad ni Joseph Smith, Juan 1:1–5 [Ang Giya Ngadto sa mga Kasulatan]; Moises 1:32–33; Ang Giya Ngadto sa mga Kasulatan, “Jesukristo, Kinabuhi nga Wala pa Dinhi sa Yuta”). Ang mga sakop sa Klase makahimo usab sa pagpaambit sa unsay ilang nakat-onan mahitungod sa mga tahas ni Kristo sa wala pa dinhi sa yuta gikan sa “Ang Buhi nga Kristo: Ang Pagpamatuod sa mga Apostoles” (ChurchofJesusChrist.org).

• Kon ganahan kang mogamit niining mga bersikulo sa paghisgot mahitungod sa mga gilalang sa Ginoo, mahimo nimong basahon ang Juan 1:3 ug ipakita ang mga litrato nga naghulagway sa katahom sa yuta. Dapita ang mga sakop sa klase sa pagpaambit kon sa unsang paagi ang mga linalang sa Manluluwas nakatabang kanila nga mobati sa Iyang gugma.

Juan 1:1–14

Si Jesukristo mao ang Kahayag.

• Ikonsiderar ang paghangyo sa mga sakop sa klase sa pagpangita sa tanang pananglitan sa pulong kahayag diha sa Juan 1:1–14. Nganong ang kayahag usa ka maayong pulong sa paghulagway ni Jesukristo? Ang mga sakop sa klase mahimo nga makapaambit kon sa unsang paagi ang Manluluwas ug ang Iyang ebanghelyo nakahatag og kahayag diha sa ilang kinabuhi. Isip kabahin niini nga panaghisgotan, mahimo nimong dapiton ang mga sakop sa klase sa pagbasa mahitungod sa Kahayag ni Kristo sa Doktrina ug mga Pakigsaad 84:45–46; 88:11–13, o mahimo nimo silang i-refer sa “Kahayag ni Kristo” Ang Giya Ngadto sa mga Kasulatan. Sa unsang paagi nga atong mapaambit ang kahayag sa Manluluwas ngadto sa uban?

  hayag sa adlaw agi sa kabatoan diha sa baybayon

  Ang Manluluwas ug ang Iyang ebanghelyo naghatag og espirituwal nga kahayag.

• Aron matabangan ang mga sakop sa klase nga mapanglantawan kon unsa ang gitudlo mahitungod sa Manluluwas diha sa Juan 1, mahimo nimong ipakita ang pipila ka mga litrato (lakip sa usa nga gikan sa latid karong semanaha sa Dali, Sunod Kanako—Alang sa Indibidwal ug mga Pamilya) nga nagpakita sa mga aspeto sa kinabuhi ni Jesukristo ug sa balaan nga misyon. Ang mga sakop sa klase makasiksik sa Juan 1:1–14, nga mangita sa mga pulong nga magsilbing mga ulohan alang sa mga litrato.

Juan 1:35–51

Makabaton kita sa atong kaugalingong pagsaksi sa Manluluwas ug dayon sa pagdapit sa uban nga “dali kamo ug tan-awa ninyo.”

• Sa Juan 1, ang pagdapit nga “dali kamo ug tan-awa ninyo” kaduha makita (tan-awa sa mga bersikulo 39, 46). Mahimong kita walay kahigayonan nga makita ang Manluluwas sa pisikal nga paagi sama sa paagi sa pagkakita nila ni Andres ug Natanael, apan makatubag kita sa samang pagdapit. Unsa kaha ang ipasabot sa “dali kamo ug tan-awa ninyo” sa atong panahon?

• Ang mga sakop sa klase mahimong mobasa sa Juan 1:35–51 ug ipaambit kon unsa ang ilang nakat-onan gikan niini nga mga bersikulo mahitungod sa pagdapit sa uban aron makakat-on mahitungod ni Kristo (tan-awa usab sa “Dugang nga mga Kapanguhaan”). Makapaambit usab sila kon giunsa nila sa pagpangita og yano ug natural nga mga paagi sa pagdapit sa uban nga “dali kamo, ug tan-awa ninyo.”

mga kapanguhaan nga icon

Dugang nga mga Kapanguhaan

Mahimo kita nga modapit sa uban nga “dali kamo, ug tan-awa ninyo.”

Si Elder Neil L. Andersen nagtudlo:

“Gitudloan kita sa Manluluwas unsaon sa pagpakigbahin ang ebanghelyo. Ganahan ko sa istorya ni Andres, nga nangutana, ‘Rabbi, [hain] ka man magpuyo?’ [Juan 1:38]. Si Jesus mahimo ra untang motubag sa dapit nga Iyang gipuy-an. Apan miingon hinoon Siya kang Andres, ‘[Dali Kamo ug tan-awa ninyo]’ [Juan 1:39]. Sa akong hunahuna miingon ang Manluluwas, ‘[Dali kamo ug tan-awa ninyo dili lang taga diin ako apan ang akong pagpanimuyo]. [Dali kamo ug tan-awa] ninyo si kinsa Ako. Dali kamo ug batia ang Espiritu.’ Wala kita mahibalo sa tanan bahin nianang adlawa, apan nahibalo kita nga dihang nakita ni Andres ang iyang igsoon nga si Simon, miingon siya, ‘[Nakita namo ang Mesiyas] … ang Kristo’ [Juan 1:41].

“Ngadto sa nagpakita og interes sa atong pag-istoryahanay, masunod nato ang ehemplo sa Manluluwas pinaagi sa pagdapit kanila nga ‘dali kamo ug tan-awa ninyo.’ Ang uban modawat sa atong pagdapit, ug ang uban dili. Kita adunay nailhan nga gidapit sa makadaghan una pa modawat sa imbitasyon nga ‘dali kamo ug tan-awa ninyo.’” (“Usa Kini ka Milagro,” Liahona, Mayo 2013, 79).

Pagpalambo sa Atong Pagtudlo

Tabangi ang mga tigkat-on nga ipahisama ang mga kasulatan ngadto sa ilang kaugalingon. Ang samang pagdapit nga gihatag ni Kristo ngadto sa Iyang mga disipulo—nga dali kamo ug tan-awa ninyo—makatabang niadtong imong tudloan nga magtinguha sa pagsunod sa Manluluwas. Awhaga ang mga tigkat-on sa paggamit sa mga bar[o]ganan nga makita diha sa mga kasulatan ngadto sa ilang kaugalingong kinabuhi ug sa pagdapit sa uban sa pagbuhat sa samang butang. (Tan-awa sa 1 Nephi 19:23; Pagtudlo sumala sa Pamaagi sa Manluluwas, 21.)