tulo ka mga lalaki nagbiyahe sakay sa mga kamelyo

Let Us Adore Him [Dali Simbahon Siya], ni Dana Mario Wood

Enero 9–15

Mateo 2; Lucas 2

Mianhi Kami aron Pagsimba Kaniya

Sa dili pa ka mobasa sa mga ideya niini nga latid, tun-i ang Mateo 2 ug Lucas 2, ug irekord ang imong espirituwal nga mga impresyon. Makatabang kini kanimo nga makadawat og pagpadayag kon unsaon pagtubag ang mga panginahanglan sa imong klase.

pagpaambit nga icon

Dapita ang Pagpaambit

Unsaon nimo pag-awhag ang mga sakop sa klase sa pagpaambit og mga ideya ug mga kasinatian nga ilang naangkon samtang nagtuon sila niining mga kasulatan sa indibidwal nga paagi ug kauban ang ilang mga pamilya? Bisan og may kalagmitan nga pamilyar na sila sa istorya bahin sa pagkatawo sa Manluluwas diha sa Mateo 2 ug Lucas 2, sila kanunayng makabaton og bag-ong espirituwal nga panabot. Ikonsiderar ang pagdapit og pipila ka sakop sa klase sa pagpaambit og mensahe nga ilang nakit-an nga nakapadasig nila sa bag-ong paagi.

icon sa pagtudlo

Itudlo ang Doktrina

Mateo 2:1–12; Lucas 2:1–38

Adunay daghang saksi sa pagkatawo ni Kristo.

• Ang mga istorya bahin sa mga tigsimba diha sa Mateo 2:1–12 ug Lucas 2:1–38 makatabang sa mga sakop sa imong klase nga makapamalandong sa mga paagi nga ilang mapakita ang ilang gugma alang sa Manluluwas. Rebyoha ang tsart mahitungod sa mga saksi sa pagkatawo ni Kristo sa latid karong semanaha sa Dali, Sunod Kanako—Alang sa mga Indibidwal ug mga Pamilya. Ang ubang mga tawo sa imong klase mahimong adunay mga ideya nga ikapaambit gikan niining kalihokan, o mahimo nimong buhaton ang kalihokan isip usa ka klase. Nganong importante man nga kining mga saksi ni Kristo nagagikan sa nagkalain-laing kahimtang sa kinabuhi? Unsaon nato sa pagsunod sa ilang mga ehemplo?

  magbalantay uban sa karnero

  Ang mga magbalantay sa karnero nahimong pipila sa unang mga saksi bahin sa pagkatawo sa Manluluwas.

• Sa wala pa mosimba kining mga saksi sa batang si Kristo, sila nangita Kaniya. Aron matabangan ang mga sakop sa klase nga makakat-on gikan sa ilang ehemplo, mahimo nimong isulat diha sa pisara ang mosunod nga mga ulohan: Mga Magbalantay sa Karnero, Ana, Simeon, ug Mga Mago. Dapita dayon ang mga sakop sa klase sa pagsiksik sa Mateo 2 ug Lucas 2 ug isulat diha sa pisara kon unsay gibuhat niining mga tawhana aron mapangita ang Manluluwas. Unsa may gisugyot niining mga istorya mahitungod sa pipila ka paagi nga kita makapangita ni Kristo?

Mateo 2:13–23

Ang mga ginikanan mahimong makadawat og pagpadayag sa pagpanalipod sa ilang mga pamilya.

• Sa pagsugod og usa ka panaghisgotan mahitungod kon sa unsang paagi ang LangitnongAmahan migiya ni Jose ug Maria diha sa ilang tahas isip ang mga ginikanan sa Manluluwas, ikonsiderar ang pagdapit sa mga sakop sa klase sa paglista diha sa pisara og pipila ka mga peligro nga atong giatubang karon. Unsa ang atong makat-onan gikan sa Mateo 2:13–23 mahitungod kon unsaon sa pagpangita og panalipod gikan niining mga pilegro? Sa unsang paagi nga ang personal nga pagpadayag makatabang kanato sa pagpanalipod sa atong mga pamilya o sa ubang mga minahal sa kinabuhi gikan sa peligro? Unsa nga tambag ang gihatag sa mga propeta ug mga apostoles aron sa pagtabang kanato nga makakita og espirituwal nga kahilwasan?

Lucas 2:40–52

Bisan sa batan-on pa, si Jesus nakatutok na sa pagbuhat sa kabubut-on sa Iyang Amahan.

• Ang istorya bahin ni Jesus nga nagtudlo didto sa templo sa dihang Siya nag-edad pa lamang og 12 anyos mahimong gamhanan gayod ngadto sa kabatan-onan nga naghunahuna mahitungod sa ilang ikatampo ngadto sa buhat sa Dios. Mahimo nimong bahinon ang klase ngadto sa mga parisan nga magbasa og dungan sa Lucas 2:40–52 (tan-awa ang ideya gikan sa Hubad ni Joseph Smith nga makita diha sa Giya ngadto sa mga Kasulatan). Ang matag parisan makagahin og pipila ka minuto sa pagpaambit sa usag usa kon unsay nakapadasig kanila mahitungod niini nga istorya. Unsa nga mga oportunidad ang atong maangkon sa pagpaambit sa unsay atong nahibaloan mahitungod sa ebanghelyo? Unsa nga mga kasinatian ang atong ikapaambit?

• Unsay gitudlo sa Lucas 2:40–52 ngari kanato mahitungod kon unsa si Jesus sa dihang batan-on pa siya? Ang sundanan sa personal nga paglambo nga gisugyot diha sa Lucas 2:52 mahimong makapadasig og usa ka panaghisgotan kabahin sa unsay atong gibuhat aron mas mahisama ni Kristo. Mahimo nimong isugyot nga ang mga sakop sa klase mamalandong kon sa unsang paagi sila naglambo diha sa kaalam (sa intelektwal nga paagi), gidak-on (sa pisikal nga paagi), kahimuot sa Dios (sa espirituwal nga paagi), ug sa kahimuot sa uban (sa sosyal nga paagi). Mahimo pa gani sila nga magtakda og mga tumong sa usa o dugang pa niining mga dapita. Kon ganahan nimo nga ipadayon ang usa ka panaghisgotan mahitungod sa pagkahimong sama ni Kristo niini nga mga bahin, ilabi na kon ikaw magtudlo sa kabatan-onan, ikonsiderar ang paggamit sa pamahayag diha sa “Dugang nga mga Kapanguhaan.”

mga kapanguhaan nga icon

Dugang nga mga Kapanguhaan

Pagtabang sa kabataan ug kabatan-onan nga molambo “sa lawas ug sa kinaadman ug gikahimut-an siya sa Dios ug sa mga tawo.”

Si Presidente Steven J. Lund mihulagway sa programa sa Kabataan ug Kabatan-onan nga ang tipik gibase sa Lucas 2:52, sa ingon niini nga paagi:

“Ang Kabataan ug Kabatan-onan usa ka himan sa pagtabang sa matag bata sa Primary ug batan-on nga molambo sa pagkadisipulo ug makaangkon og puno sa [hugot nga] pagtuo nga panglantaw kon unsay dagway sa dalan sa kalipay. Mahimo silang makakat-on sa pagpaabot ug pagpangandoy alang sa mga hunonganan ug mga timaan subay sa dalan sa pakigsaad, diin mabunyagan sila ug makompirmahan sa gasa sa Espiritu Santo ug sa dili madugay maapil sa mga korum ug sa mga klase sa Young Women, diin mabati nila ang kalipay sa pagtabang sa uban pinaagi sa sunod-sunod nga Kristohanon nga mga buhat sa serbisyo. Mohimo sila og mga tumong, dagko ug gagmay, nga magdala og balanse sa ilang kinabuhi samtang mahimo silang mas sama sa Manluluwas.” (“Pagkaplag og Kalipay diha Kang Kristo,” Liahona, Nob. 2020, 36–37).

Pagpalambo sa Atong Pagtudlo

Ilakip ang mga tigkat-on nga wala magtuon sa mga kasulatan diha sa panimalay. Bisan kon ang ubang mga sakop sa klase wala makabasa sa Mateo 2 ug Lucas 2 sa wala pa ang klase, mahimo gihapon silang mopaambit og makahuloganong mga ideya. Siguroa nga ang tanang sakop sa klase adunay mga oportunidad sa pag-apil ug motampo ngadto sa panaghisgotan.