Դուք Հիսուս Քրիստոսի Եկեղեցու ուսուցիչ եք

Դուք կանչվել եք Աստծո կողմից՝ ուսուցանելու Նրա զավակներին Փրկիչի ձևով։ Դուք ի սպաս եք դրվել այս կոչմանը՝ Նրա սուրբ քահանայության իշխանությամբ։ Եթե նույնիսկ դուք փորձառու ուսուցիչ չեք, սակայն ապրում եք արժանավոր կյանքով, ամեն օր աղոթում եք և ուսումնասիրում սուրբ գրությունները, Երկնային Հայրը կշնորհի ձեզ ազդեցություն և Սուրբ Հոգու զորությունը` օգնելով ձեզ հաջողության հասնել (տես 2 Նեփի 33.1):

Նրանք, ովքեր վստահված են ձեր խնամքին, Աստծո զավակներն են, և Նա գիտի, թե նրանք ինչի կարիք ունեն, և ինչպես լավագույնս օգնել նրանց: Երբ դուք աղոթքով փնտրում եք Սուրբ Հոգու ազդեցությունը, Նա կառաջնորդի ձեզ՝ ինչպես նախապատրաստվելիս, այնպես էլ ուսուցանելիս։ Նա կհայտնի ձեզ, թե ինչ պիտի ասեք և ինչ պիտի անեք (տես 2 Նեփի 32․5)։

Ավետարանի ուսուցման և ուսումնառության հիմնական նպատակը Երկնային Հոր և Հիսուս Քրիստոսի հանդեպ դարձի ամրապնդումն է։ Որպես ուսուցիչ, ձեր նպատակն է օգնել նրանց, ում ուսուցանում եք, անել հնարավոր ամեն բան խորապես դարձի գալու համար, մի աշխատանք, որը շարունակվում է դասաժամերից դուրս։ Հրավիրեք նրանց, ում ուսուցանում եք, ակտիվորեն մասնակցել Հիսուս Քրիստոսի և Նրա ավետարանի ուսումնառությանը և գործել համաձայն իրենց սովորածի: Խրախուսեք նրանց իրենց անհատական և ընտանեկան արտադասարանական ուսումնասիրությունը դարձնել ավետարանը սովորելու իրենց հիմնական ելակետը: Երբ նրանք հավատքով գործեն՝ սովորելով անհատապես և ընտանիքով, կհրավիրեն Հոգուն իրենց կյանք, քանի որ Հոգին է, որ առաջ է բերում իսկական դարձ: Այն ամենը, ինչ անում եք որպես ուսուցիչ, պետք է մատնանշի այդ սրբազան նպատակը:

Ուսուցանեք միայն Հիսուս Քրիստոսի վերականգնված ավետարանի վարդապետությունը, ինչպես որ այն տրված է սուրբ գրություններում և վերջին օրերի մարգարեների խոսքերում: Մաքուր վարդապետությունը՝ հավերժական, անփոփոխ ճշմարտությունը, ուսուցանված Աստծո և Նրա ծառաների կողմից, հրավիրում է Հոգուն և կյանքեր փոխելու զորություն ունի:

Ուսուցանելու կոչումը սրբազան պարտք է, և ծանրաբեռնվածության զգացումը երբեմն նորմալ է: Բայց հիշեք, որ Երկնային Հայրը կանչել է ձեզ, և Նա երբեք չի լքի ձեզ: Սա Տիրոջ աշխատանքն է, և երբ դուք ծառայեք «ձեր ողջ սրտով, զորությամբ, մտքով և ուժով» (Վարդապետություն և Ուխտեր 4.2), Նա կմեծացնի ձեր ընդունակությունները, պարգևներն ու տաղանդները, և ձեր ծառայությունը կօրհնի նրանց կյանքը, ում դուք ուսուցանում եք: