“Laa’at jun aj k’utunel sa’ lix Iglees li Jesukristo,” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“Laa’at jun aj k’utunel sa’ lix Iglees li Jesukristo,” Kim, Taaqehin—Choq’ re li Dominkil Tzoleb’aal: 2023
Laa’at jun aj k’utunel sa’ lix Iglees li Jesukristo
B’oqb’ilat xb’aan li Dios chixtzolb’aleb’ li ralal xk’ajol jo’ li Kolonel. Xaqab’anb’ilat sa’ li b’oqok a’in rik’in lix wankil lix santil tijonelil. Us ta maare moko wanjenaqat ta chi k’utuk, wi nakatwan chi tiik, wi nakattijok wulaj wulaj, ut wi nakatzoleb’ li loq’laj hu, laa Choxahil Yuwa’ tixk’e aawe li rilom ut lix wankil li Santil Musiq’ej (chi’ilmanq 2 Nefi 33:1).
Eb’ li k’eeb’ileb’ chatzol a’aneb’ ralal xk’ajol li Dios, ut a’an naxnaw k’a’ru taak’anjelaq reheb’ ut chan ru us xtzolb’aleb’. Naq nakasik’ rik’in tijok lix wankil li Santil Musiq’ej, a’an tixk’am aab’e naq yookat chixkawresinkil aawib’ ut naq yookat chi k’utuk. A’an tixk’utb’esi chawu k’a’ru tento taaye ut k’a’ru tento taab’aanu (chi’ilmanq 2 Nefi 32:5).
Li rajom xk’utb’al ut xtzolb’al li evangelio, a’an xchamob’resinkil lix jalb’al qach’ool chiru li qaChoxahil Yuwa’ ut li Jesukristo. Laa k’anjel jo’ aj k’utunel a’an xtenq’ankileb’ li komon re naq jalb’ilaqeb’ xch’ool xb’aan lix evangelio li Jesukristo—a’an jun li k’anjel li ink’a’ ka’ajwi’ nab’aanuman naq yoo chi uxk li tzolok. Patz’ reheb’ li komon naq te’tz’aqonq sa’ xtzolb’al li na’leb’ ut li tzol’leb’ chirix li Jesukristo, ut naq te’xk’anjela li k’a’ru xe’xtzol. Waklesi xch’ooleb’ re naq li xnimal ru tzolok te’xb’aanu a’anaq xjuneseb’ ut sa’ junkab’al, naq moko wankeb’ ta sa’ li tzoleb’aal. Naq eb’ a’an wanqeb’ xpaab’aal sa’ li tzolok xjuneseb’ ut jo’ junkab’al, yooqeb’ chixb’oqb’al li Musiq’ej chi wank sa’ xyu’ameb’, a’ li Musiq’ej li nab’aanunk re li tz’aqal jalaak. Chixjunil li nakab’aanu jo’ aj k’utunel tento taajayalimanq sa’ li santil ajom a’in.
Ka’ajwi’ li tzol’leb’ re lix evangelio li Jesukristo li k’ojob’anb’il wi’chik taak’ut, jo’ chanru natawman sa’eb’ li loq’laj hu ut sa’ li raatineb’ li profeet sa’ roso’jikeb’ li kutan. Li saq ruhil tzol’leb’—li junelikil yaal li ink’a’ najalman, jo’ k’utb’il xb’aan li Dios ut eb’ lix moos—naxb’oq li Musiq’ej, ut wan xwankil chixjalb’aleb’ li yu’am.
Laa b’oqb’al chi k’utuk a’an jun li loq’laj k’anjel, ut naru naq taaweek’a naq q’axal nim li k’anjel choq’ aawe. A’ut chijultiko’q aawe naq a’an li Dios li xb’oqok aawe, ut a’an maajo’q’e tatxkanab’. A’in lix k’anjel li Qaawa’, ut naq laa’at nakatk’anjelak chiru “chi anchal aach’ool, aametz’ew, aak’a’uxl, ut aakawilal” (Tzol’leb’ ut Sumwank 4:2), a’an tixnimob’resi laa na’leb’, laa maatan, ut laa seeb’al, ut li k’anjel li nakab’aanu taarosob’tesi lix yu’ameb’ li tzolb’ileb’ aab’aan.