“Chan ru roksinkil Kim, Taaqehin—Choq’ re li Dominkil Tzoleb’aal,” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“Chan ru roksinkil Kim, Taaqehin—Choq’ re li Dominkil Tzoleb’aal,” Kim, Taaqehin—Choq’ re li Dominkil Tzoleb’aal: 2023
Roksinkil Kim, Taaqehin—Choq’ re li Dominkil Tzoleb’aal
Xkawresinkil aawib’ re k’utuk sa’ li Dominkil Tzoleb’aal
Tento naq li ochoch a’anaq tz’aqal li na’ajej re xtzolb’al li evangelio, sa’ junesal ut jo’ junkab’al. Yaal a’in choq’ aawe laa’at jo’ ajwi’ choq’ reheb’ li tzolb’ileb’ aab’aan. Naq nakakawresi aawib’ re k’utuk, taatikib’ rik’in li k’a’ru nakak’ul laa’at rik’ineb’ li loq’laj hu. Li kawresink-ib’ li q’axal aajel ru taak’ulmanq naq taayu’ami li evangelio, taatzoleb’ li loq’laj hu, ut taasik’ aamusiq’ankil xb’aan li Santil Musiq’ej.
Aajel ru li hu Kim, Taaqehin—Choq’ reheb’ li komon ut li junkab’al sa’ li tzolok nakab’aanu aajunes ut sa’ xkawresinkil aawib’ choq’ re li k’utuk. Tatxtenq’a chixtawb’al chik aana’leb’ chirixeb’ li tzol’leb’ re li evangelio li neke’tawman sa’eb’ li loq’laj hu. Taaruuq ajwi’ taak’eheb’ xch’ool ut taab’oqeb’ li komon sa’ li tzoleb’aal chiroksinkil Kim, Taaqehin—Choq’ reheb’ li komon ut li junkab’al re taachaab’ilo’q li tzolok neke’xb’aanu xjuneseb’ ut sa’ junkab’al (re aatenq’ankil chixb’aanunkil a’in, chi’ilmanq “Li na’leb’ re xb’oqb’aleb’ chi tzolok xjuneseb’ ut sa’ junkab’al” sa’ li hu a’in). Naq nakab’aanu chi jo’kan, chiwanq sa’ aach’ool naq te’wanq komon sa’ laa tzoleb’aal li wankeb’ sa’eb’ li ochoch b’ar wi’ ink’a’ naru na’ux xtzolb’aleb’ li loq’laj hu sa’ junkab’al.
Naq yookat chixkawresinkil aawib’, te’chalq li na’leb’ ut li eek’ahom aawik’in chirixeb’ li kristiaan yookat chixtzolb’aleb’. Taak’ul aamusiq’ankil chirix chan ru naq eb’ li na’leb’ sa’ li loq’laj hu taarosob’tesiheb’ xyu’am a’an. B’eresinb’ilaqat chixmusiq’ankileb’ re te’xtaw xna’leb’ a’an naq yookeb’ chixtzolb’aleb’ li loq’laj hu xjuneseb’.
Li na’leb’ re k’utuk
Naq yookat chixk’uub’ankil aana’leb’ re k’utuk, naru taataw chik aana’leb’ rik’in li aatin li tusub’anb’il sa’ li hu a’in. Maak’oxla naq tento xtaaqenkileb’ li aatin a’in chi tzoltzo jo’ tz’iib’anb’il; a’an b’an tenq’ re tat-ok chixk’ulb’al li na’leb’ chi musiq’anb’il. Laa’at nakanaw ruheb’ li tzolb’ileb’ aab’aan, ut xkomon chik taatzol chirixeb’ naq nekextzolok sa’ komonil sa’ li tzoleb’aal. Li Qaawa’ naxnaweb’ ajwi’ ru, ut a’an tatxmusiq’a re xnawb’al chan ru us xtenq’ankileb’ li komon chi kab’lak sa’ xb’een li tzolok chirix li evangelio li yookeb’ chixb’aanunkil sa’ rochocheb’.
Wankeb’ naab’al chik li k’anjeleb’aal naru taawoksi naq nakakawresi aawib’, jo’eb’ li na’leb’ neke’tawman sa’ Kim, Taaqehin—Choq’ reheb’ li komon ut li junkab’al ut sa’eb’ li hu puktesinb’il xb’aan li Iglees. Re xtawb’al chik aana’leb’ chirixeb’ li k’anjeleb’aal a’in ut xkomoneb’ chik, chi’ilmanq li raqal “Xkomon chik li k’anjeleb’aal” sa’ li hu a’in.
Junjunq li na’leb’ li tento taawanq sa’ aach’ool
-
Jwal chaab’il wi’chik xtzolb’al li evangelio naq jayalinb’il sa’ li junkab’al. Jo’ aj k’utunel, wan jun aanimla k’anjel re xkawresinkil, xwaklesinkil, ut kab’lak sa’ xb’een li tzolok chirix li evangelio li na’ux sa’ li junkab’al.
-
Lix jalajik xch’ooleb’ li komon chirix li Jesukristo ut lix evangelio taanimanq naq yooqeb’ chixtawb’al ru ut chiroksinkil sa’ xyu’ameb’ li tz’aqal tzol’leb’. Waklesiheb’ xch’ool chixtz’iib’ankil ut chixyu’aminkil li na’leb’ neke’xk’ul rik’in li Santil Musiq’ej.
-
Li k’utuk maawa’ yal aatinak, ut maawa’ ajwi’ yal xtikib’ankil jun seraq’. Jun laa k’anjel a’an naq taa’uxq li aatinak li nawaklesin aamej, ut rik’in lix k’utumeb’ li loq’laj hu. Tento ajwi’ taawotzeb’ li musiq’anb’il na’leb’ neke’chal aawik’in naq yookat chixtzolb’aleb’ li loq’laj hu.
-
Chijultiko’q aawe naq naab’aleb’ reheb’ li komon yookeb’ chixtawb’al xna’leb’ sa’eb’ li raqal re li loq’laj hu li taak’ut ajwi’ sa’ li tzoleb’aal. Naru nakatenq’aheb’ naq nakak’eheb’ xhoonal re te’xwotz li yookeb’ chixtzolb’al sa’ kab’l.
-
Li qaChoxahil Yuwa’ taaraj naq tatchaab’ilo’q jo’ aj k’utunel. A’an xk’e k’iila k’anjeleb’aal re aatenq’ankil chi usaak, jo’eb’ li ch’utam reheb’ laj k’utunel. Sa’eb’ li ch’utam a’in naru taataw aana’leb’ rik’ineb’ xkomoneb’ chik aj tzolonel chirixeb’ li ch’a’ajkilal li yookat chirilb’al. Naru ajwi’ tex’aatinaq chirix li k’utuk jo’ li Kristo, ut teeyal xb’aanunkil.
-
Eb’ li komon mas wi’chik neke’tzolok naq neke’ru chi k’utuk. Yalaq jo’q’e naru taakanab’eb’ li komon sa’ laa tzoleb’aal chixk’utb’al jun raqal re li tzolom, ut naru ajwi’ te’xb’aanu li toj saajeb’. Naru taab’aanu a’in a’ yaal jo’ tixtenq’aheb’ li komon, ut a’ yaal jo’ te’ruuq chixb’aanunkil. Wi nakab’oq jun reheb’ li komon sa’ li tzoleb’aal chi k’utuk, numsi li hoonal re xtenq’ankil chixkawresinkil rib’ chi rub’elaj, rik’in roksinkil li na’leb’ sa’ li hu a’in ut sa’ Kim, Taaqehin—Choq’ reheb’ li komon ut li junkab’al. Chijultiko’q aawe naq laa’at li b’oqb’ilat jo’ aj k’utunel, ut wan sa’ aab’een laa’at li k’a’ru taak’utmanq sa’ li tzoleb’aal.
Li hu a’in naxk’e jun tzolom choq’ re li junjunq xamaan re li chihab’. Sa’eb’ li domingo maak’a’ wi’ jun li Dominkil Tzoleb’aal sa’ xk’ab’a’ jun li ch’utub’aj-ib’ re oqech malaj jalan chik xyaalal, eb’ li junkab’al toj te’ruuq chirilb’al ru lix Ak’ Chaq’rab’ sa’ rochocheb’ jo’ chanru tz’iib’anb’il resil sa’ Kim, Taaqehin—Choq’ reheb’ li komon ut li junkab’al. Sa’eb’ li domingo nawan wi’ li Dominkil Tzoleb’aal, laa’at naru nakanumsi malaj nakajunaji li tzolom.