“Jun eetalil re k’utuk,” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“Jun eetalil re k’utuk,” Kim, Taaqehin—Choq’ re li Dominkil Tzoleb’aal: 2023
Jun eetalil re k’utuk
Li junjunq tusleb’ aatin sa’ li hu a’in naxtaaqe jun eetalil re xb’oqb’aleb’ li komon chi wotzok ut re xk’utb’al li tzol’leb’. K’iila sut naq yookat chi k’utuk, eb’ li oxib’ raqal a’in te’xjunaji rib’, malaj te’xjal xna’aj. K’e reetal naq rik’in li wotzok naru na’ux xk’utb’al li tzol’leb’, ut naq nakak’ut li tzol’leb’, tento taa’uxq xkanab’ankileb’ chi wotzok. Kanab’ naq li k’a’ru xjalman sa’ li hu a’in yal taak’ulmanq jo’ chanru eek’asinb’il xb’aan li Musiq’ej, re te’tenq’aaq li ani tzolb’ileb’ aab’aan.
Xkanab’ankileb’ chi wotzok
Jo’ xcha’al li junjunq tzoleb’aal, kanab’eb’ li komon sa’ li tzoleb’aal chixwotzb’al lix na’leb’eb’ ut li k’a’ru xe’xk’ul chiru li jun xamaan naq xe’xtzol li loq’laj hu jo’ komon ut jo’ junkab’al, ut xe’xyu’ami li k’a’ru xe’xtzol. Tenq’aheb’ li komon chixk’eeb’al reetal naq aajel ru li tzolok neke’xb’aanu sa’ kab’l. Ink’a’ taachalq lix jalajikeb’ xch’ool chirix li qaChoxahil Yuwa’ ut li Jesukristo ka’ajwi’ rik’in tzolok sa’ domingo, rik’in aj b’an wi’ li k’a’ru neke’xk’ul wulaj wulaj. Naq eb’ li komon neke’rab’i li k’a’ru xe’xk’ul lix komoneb’ chik ut lix nawomeb’ xch’ool chirix li Jesukristo ut lix evangelio, k’a’jo’ wi’chik naq te’xsik’ xk’ulb’al li na’leb’ a’an choq’ reheb’.
Moko chixjunileb’ ta te’ril li ch’ol re li junjunq tzoleb’aal, ut us ta xe’ril, wankeb’ li ink’a’ sa te’reek’a xwotzb’al. Kanab’eb’ chixjunileb’ li komon chireek’ankil naq wankeb’ xwankil sa’ li tzoleb’aal, us ta maare ink’a’ te’raj wotzok.
Xkʼutbʼal li tzolʼlebʼ
Laa’at ut eb’ li komon sa’ laa tzoleb’aal tento teek’e eech’ool rik’in li Jesukristo ut lix tzol’leb’—a’an li junelikil na’leb’ re li evangelio—li natawman sa’eb’ li jar raqal sa’eb’ li loq’laj hu li eetanb’ileb’. Kim, Taaqehin—Choq’ reheb’ li komon ut li junkab’al naru nakatxtenq’a chixtawb’al ru li tzol’leb’ li taak’ut. Naq nekex’aatinak chirix li tzol’leb’ sa’eb’ li loq’laj hu, k’a’ruheb’ li raqal, li aatin, li k’a’ru xak’ul, li patz’om, ut xkomoneb’ chik li k’anjeleb’aal naru nakawotz? Chan ru naq tatruuq chiroksinkileb’ li k’anjeleb’aal a’in re xtenq’ankileb’ li komon chixtzolb’al ut chixtawb’aleb’ ru li na’leb’ chirix li evangelio? Chan ru naru taatenq’aheb’ chixkawob’resinkil lix paab’aaleb’ chirix li qaChoxahil Yuwa’ ut li Jesukristo?