“26 diciembre–1 enero. Tento sa‘ qab‘een laa‘o naq tootzoloq,” Kim, Taaqehin—Choq‘ re li Dominkil Tzoleb‘aal: Li Ak‘ Chaq‘rab‘ 2023 (2022)
“26 diciembre–1 enero. Tento sa‘ qab‘een laa‘o naq tootzoloq,” Kim, Taaqehin—Choq‘ re li Dominkil Tzoleb‘aal: 2023
26 diciembre–1 enero
Tento sa‘ qab‘een laa‘o naq tootzoloq
Naq nakawil ut nakak’oxlaheb’ rix li raqal reheb’ li loq’laj hu sa’ li tusleb’ aatin a’in, tz’iib’a resil li musiq’anb’il na’leb’ nakak’ul. A‘in tixb‘oq li Musiq‘ej naq yookat chixkawresinkil aawib‘. Li hu Kim, Taaqehin—Choq‘ reheb‘ li komon ut li junkab‘al ut eb‘ li na‘leb‘ sa‘ li ch‘ol a‘in tate‘xtenq‘a chixwaklesinkileb‘ xch‘ool li komon re te‘xtzol li Ak‘ Chaq‘rab‘ chiru li chihab‘ a‘in.
Xkanab‘ankileb‘ chi wotzok
Jun reheb’ laa k’anjel jo’ aj k’utunel, a’an xtenq’ankileb’ li komon chi tzolok sa’eb’ li loq’laj hu xjuneseb’ ut sa’ junkab’al. Naq te’rab’i li k’a’ru xe’xk’ul li jun ch’ol chik, a’an tixtenq’aheb’ chixsik’b’al xna’leb’eb’ xjunes. Chi jo’kan, sa’ xtiklajik li junjunq tzoleb’aal, tz’aama chiruheb’ li komon naq te’xwotz li raqal reheb’ li loq’laj hu li xe’xtzol li xwulak chiruheb’ malaj li xtenq’ank reheb’.
Xk‘utb‘al li tzol‘leb‘
Re tzolok, aajel ru li k’anjelak rik’in paab’aal.
-
Chan ru naq tatruuq chixwaklesinkileb’ xch’ool li komon sa’ laa junkab’al re te’xk’e xch’ool sa’ li tzolok, ut ink’a’ yal te’xkanab’ li k’anjel a’an sa’ xb’een laj k’utunel? A’in jun li na’leb’ naru taab’aanu: Kut junaq k‘a‘aq re ru q‘un re junaq li komon, li ak xapatz‘ re rub‘elaj naq ink‘a‘ tixyal xchapb‘al. Rik’in li k’utuk a’in, taaruuq tex’ok chi aatinak chirix lix k’anjel li ani yoo chi tzolok ut lix k’anjel laj k’utunel sa’ li tzolok chirix li evangelio. Jo‘ aj tzolonel, chan ru “naqachap” li k‘a‘ru nak‘utman sa‘ li qatzoleb‘aal? Li na‘leb‘ sa‘ “Xkomon chik li k‘anjeleb‘aal ” naru natenq‘an sa‘ li aatinak.
-
Chixjunileb’ li komon tento sa’ xb’eeneb’ xb’oqb’al chaq li Musiq’ej sa’ li tzoleb’aal. Re xtenq‘ankileb‘ li komon chixtawb‘al ru a‘in, patz‘ reheb‘ naq te‘ril Alma 1:26 ut Tzol‘leb‘ ut Sumwank 50:13–22; 88:122–23 ut te‘xye k‘a‘ru naru naxb‘aanu li nak‘utuk ut eb‘ li neke‘tzolok, re xb‘oqb‘al li Musiq‘ej. Maare us xtz‘iib‘ankil li k‘a‘ru xe‘xsume chiru li pizarron, rik‘in li aatin a‘in sa‘ xjolomil: K‘a‘ru naru tixb‘aanu li nak‘utuk ut K‘a‘ru naru te‘xb‘aanu li neke‘tzolok. Li komon naru te‘xsume chiru jun nimla hu re taaruuq chi k‘utmank chiru junjunq xamaan chik.
Tento taqanaw li yaal qajunes.
-
Wankeb’ naab’al li raqal sa’ li Ak’ Chaq’rab’ li neke’xk’ut li na’leb’ li te’xk’am qab’e re xsik’b’al li yaal. Sa’ xyanqeb’ wan Lukas 11:9–13; Jwan 5:39; 7:14–17; ut 1 Korintios 2:9–11. Wi wankeb’ li komon sa’ laa tzoleb’aal li ak xe’rileb’ li raqal a’in naq xe’tzolok xjuneseb’, naru taapatz’ reheb’ naq te’xwotz li k’a’ru xe’xtzol. Malaj ut, taaruuq teeyaab’asi sa’ komonil eb’ li raqal a’in, ut taapatz’ reheb’ li komon naq te’xwotz chan ru naq xe’xtaw lix nawomeb’ xch’ool.
Jalam-uucheb’ li saaj winq ut saaj ixq sa’ jun li tzoleb’aalXsik’b’al li na’leb’ rik’in li paab’aal tooxtenq’a chixtawb’al xnawom qach’ool.
-
Sa’ Hechos 17:10–12, nayeeman resileb’ laj santil paab’anel li ke’xtzoleb’ li loq’laj hu ut ke’xtaw xnawomeb’ xch’ool chirix li yaal. Re xwaklesinkileb’ xch’ool li komon chixb’aanunkil jo’ ke’xb’aanu a’an, yaab’asihomaq sa’ komonil eb’ li raqal a’in ut patz’ reheb’ li komon naq te’xwotzeb’ li raqal sa’eb’ li loq’laj hu li xnimob’resink re lix nawomeb’ xch’ool chirix li evangelio.
Chan ru naq nokoru chixtawb’al qana’leb’ chi mas wi’chik sa’ xtzolb’aleb’ li loq’laj hu?
-
Maare wankeb’ li komon li te’k’oxlanq re naq ch’a’aj li k’ayk rik’in xtzolb’aleb’ li loq’laj hu xb’aan naq moko tz’aqal ta lix hoonaleb’, lix na’leb’eb’, malaj lix seeb’aleb’. K’a’ru naru taab’aanu re xtenq’ankileb’ re te’ruuq chixb’aanunkil? Re xtenq‘ankileb‘ li komon chi wank xkawilaleb‘ xch‘ool chirix xtzolb‘aleb‘ li loq‘laj hu, naru taak‘ut li na‘leb‘ sa‘ “Li na‘leb‘ re xchaab‘ilob‘resinkil li tzolok aajunes” sa‘ Kim, Taaqehin—Choq‘ reheb‘ li komon ut li junkab‘al. Maare laa’at ut jalaneb’ chik li komon sa’ li tzoleb’aal texruuq chixwotzb’al li k’a’ru xek’ul rik’in li na’leb’ a’in, malaj chirix li k’a’ chik ru xek’ul rik’in xtzolb’aleb’ li loq’laj hu. Naru ajwi’ taasik’ ru jun ch’ol sa’ li Ak’ Chaq’rab’, ut teeyal sa’ komonil xtzolb’al rik’in roksinkil junjunq li na’leb’ a’in.
Xkomon chik li k’anjeleb’aal
Xk’ulb’al qajunes li musiq’ejil nawom.
Li profeet aj Jose Smith kixye: “Li k‘a‘ ru re li Dios tz‘aqal aajeleb‘ ru, ut naru neke‘tawman ru ka‘ajwi‘ rik‘in xnumik li hoonal, li k‘a‘ru nak‘ulman, ut eb‘ li k‘oxlahom chaab‘il ut loq‘. Laa k‘a‘uxl, At winq! Wi nakawaj xk‘amb‘al laa waam sa‘ li kolb‘a-ib‘, tento taataqsi laa wanjik toj sa‘ li choxa nim tz‘aqal xteram, ut taatz‘ileb‘ rix ut taawileb‘ chi us li q‘ojyinil jul ut li xnimal ru li junelik q‘e kutan—tento naq wanqat sa‘ aatin rik‘in li Dios. Jwal saqeb‘ ut jwal q‘uneb‘ wi‘chik lix k‘oxlahom li Dios chiru lix jo‘maajo‘il k‘a‘uxl li raam li winqilal!” (Enseñanzas de los Presidentes de la Iglesia: José Smith [2007], 281).
Li Elder David A. Bednar kixye: “Wi laa‘ex ut laa‘in naqataw qanawom chirix li Jesukristo ut lix evangelio li k‘ojob‘anb‘il wi‘chik ka‘ajwi‘ rik‘in li k‘utb‘il malaj yeeb‘il qe xb‘aaneb‘ jalan, chi jo‘kan naq lix k‘ojleb‘aal lix nawom qach‘ool chirix a‘an ut lix xnimal ru k‘anjel sa‘ roso‘jikeb‘ li kutan kab‘lanb‘il sa‘ xb‘een li samahib‘. Ink‘a‘ naru taqakanab‘ qib‘ ka‘ajwi‘ chiru malaj taqato‘ni lix saqenkil li evangelio ut li nawom wan reheb‘ jalan chik li kristiaan—ink‘a‘ ajwi‘ rik‘ineb‘ li raarookeb‘ qab‘aan” (“Kawresinb‘il re xk‘ulb‘al chixjunil li k‘a‘ru na‘ajman,” Jolomil ch‘utub‘aj-ib‘ re abril 2019).
Xchaab’ilob’resinkil li qak’utum
Junelik chajayali aawib’ sa’ li tz’aqal tzol’leb’. K’e aach’ool naq li aatinak sa’ laa tzoleb’aal taawanq chi k’ojob’anb’il sa’ xb’eeneb’ li loq’laj hu ut li raatineb’ li profeet. Naru taab’aanu a’in rik’in xpatz’b’al xkomon li patz’om a’in: “K’a’ru li na’leb’ chirix li evangelio li xqatzol rik’in li k’a’ru xyeeman?” malaj “Ma wan ani naru chixk’utb’al jun raqal sa’eb’ li loq’laj hu li na’aatinak chirix li yooko chi aatinak wi’?” (Chi‘ilmanq Li k‘utuk jo‘ li Kolonel, 20–21.)