li xMaria ut li xElisabet

2–8 enero

Mateo 1; Lukas 1

“Chi‘uxq we jo‘ laa waatin”

Naq maji’ nakawil ru yalaq chik hu re tzolok, il ru ut k’oxla Mateo 1 ut Lukas 1, ut tz’iib’aheb’ li musiq’ejil na’leb’ nakak’ul. Kanab’ li Musiq’ej chixk’amb’al aab’e sa’ xkawresinkil aawib’. Chirix a‘an, ileb‘ li na‘leb‘ sa‘ li tusleb‘ aatin a‘in ut sa‘ Kim, Taaqehin—Choq‘ reheb‘ li komon ut li junkab‘al.

reetalil li wotzok

Xkanab‘ankileb‘ chi wotzok

Jun li ajom tz’iib’anb’il wi’ lix hu laj Mateo, laj Lukas, ut xkomoneb’ chik li ke’tz’iib’ank resil li evangelio a’an re xch’olob’ankil naq li Jesukristo a’an li Ralal li Dios. K‘e b‘ayaq xhoonaleb‘ li komon re naq te‘ril Mateo 1 malaj Lukas 1 ut te‘xwotz jun raqal li naxnimob‘resi lix paab‘aaleb‘ chirix li Jesukristo. Ye reheb’ li wankeb’ sa’ li tzoleb’aal naq sa’ xtzolb’al li Ak’ Chaq’rab’ chiru li chihab’ a’in, taaruuq te’xtz’iib’a chi tustu eb’ li raqal li neke’xch’olob’ xyaalal naq li Jesukristo a’an li Ralal li Dios. Taaruuq ajwi’ teetz’iib’a li tusul a’in jo’ tzoleb’aal.

reetalil li k‘utuk

Xk‘utb‘al li tzol‘leb‘

Mateo 1:18–25; Lukas 1:5–80

Li qaChoxahil Yuwa’ nak’anjelak rik’in ruq’eb’ li ralal xk’ajol tiikeb’ xch’ool, re xk’eeb’al chi uxmank li rajom.

• Eb’ li komon sa’ li tzoleb’aal mas wi’chik naq te’xtaw xna’leb’ sa’ xtzolb’al li Ak’ Chaq’rab’ chiru li chihab’ a’in wi neke’xsik’ tzole’k xb’aan li k’a’ru ke’xk’ul li ani yeeb’ileb’ resil. Re xtenq’ankileb’ chixb’aanunkil a’in, naru taatz’iib’a xk’ab’a’eb’ li ani wankeb’ sa’ Mateo 1 ut sa’ Lukas 1 chiru li pizarron, rochb’een li jar raqal sa’eb’ li loq’laj hu chirixeb’, jo’ li wan arin:

  • Maria (Lukas 1:26–56)

  • Jose (Mateo 1:18–25)

  • Isabel (Elisabet) (Lukas 1:5–7, 24–25, 40–45, 57–60)

  • Sakarias (Lukas 1:5–23, 59–64)

  K‘a‘ru naqatzol sa‘eb‘ li seraq‘ a‘an li tooxtenq‘a sa‘ li kutankil a‘in?

• Re xtenq‘ankileb‘ li komon chixk‘oxlankil lix k‘anjel xMaria sa‘ lix k‘uub‘anb‘il na‘leb‘ li Yuwa‘b‘ej, naru nakak‘uteb‘ li video “Un angel anuncia el nacimiento de Cristo a Maria” ut “Maria y Elisabet se regocijan” (ChurchofJesusChrist.org). Malaj ut, naru nekeril Lukas 1:26–38, 46–56, re teesik‘ li kixye xMaria li naxk‘utb‘esi lix na‘leb‘ a‘an. K‘a‘ chik ru naqatzol rik‘in xMaria?

Lukas 1:5–25

Nachal li rosob’tesihom li Dios sa’ li kutan k’oxlanb’il xb’aan a’an.

• Maare wankeb’ sa’ laa tzoleb’aal li ani jo’ li xIsabel ut laj Sakarias wankeb’ chi tiikeb’ xch’ool, a’ut ink’a’ xe’xk’ul jun li osob’tesink li mas neke’xyo’oni. Naru nakapatz‘ reheb‘ li komon naq te‘ril Lukas 1:5–25, re te‘xsik‘ k‘a‘ru naru neke‘xtzol chirix xElisabet ut laj Sakarias chirix royb‘eninkil li Qaawa‘. K’a’ chik ru li na’leb’ chirix royb’eninkil li kutan k’oxlanb’il xb’aan li Qaawa’ naru neke’xk’ul li komon rik’in li k’a’ru xe’xk’ul sa’ xyu’ameb’, malaj rik’in li yeeb’il resil sa’eb’ li loq’laj hu? K’a’ru naqatzol rik’ineb’ li na’leb’ a’in? Eb‘ li komon naru ajwi‘ neke‘xtz‘il rix li aatin wan sa‘ “Xkomon chik li k‘anjeleb‘aal.”

Lukas 1:26–38

“Maak’a’ ch’a’aj chiru li Dios.“

• Wan naq eb’ li komon te’xpatz’—jo’ kixb’aanu xMaria—chan ru taaruuq chi uxk li kixk’uub’ li Dios choq’ reheb’, malaj chan ru taatz’aqloq ru li k’a’ru xyeechi’i reheb’. Re xtenq‘ankileb‘ li komon chixtawb‘al ru naq rik‘in lix wankil li Dios chixjunil naru, naru taak‘ut li jalam-uuch Xchalik li anjel: Li anjel aj Gabriel naxk‘ut rib‘ chiru li xMaria (Hu reheb‘ li Jalam-uuch re li Evangelio, 28) ut taapatz‘ reheb‘ naq te‘ril sa‘ komonil Lukas 1:26–38. K’a’ru naru naqatzol chirix numtaak sa’ xb’een li k’a’ru chanchan ink’a’ naru xb’aanunkil, rik’in xtzolb’al lix yehom ut lix b’aanuhom xMaria? Ye reheb’ li komon naq te’xwotz chan ru naq li Dios xtenq’aheb’ chixq’axb’al ru li k’a’ru xe’xk’oxla naq ink’a’ naru xb’aanunkil.

reetalil li k‘anjeleb‘aal

Xkomon chik li k‘anjeleb‘aal

Royb’eninkil li Qaawa‘.

Rik‘in xnawb‘al naq naab‘al qe laa‘o naqapatz‘ k‘a‘ut naq tento te‘qoyb‘eni li rosob‘tesihom li Dios, li Elder Jeffrey R. Holland kixye:

“Re xsumenkil a‘an, “Yaal, li Dios naru tixb‘aanu li sachb‘a-ch‘oolej sa‘ junpaat, a‘b‘an tento taqataw ru naq xhoonalil li qayu‘am b‘eresinb‘il xb‘aan ka‘ajwi‘ li Dios, maa‘ani chik.” … Li paab‘aal, a‘an xtaaqenkil li Dios sa‘ sahil kutan jo‘ ajwi‘ sa‘ rahil kutan, us ta rahob‘tesinb‘ilaqo toj reetal naq taak‘utb‘esimanq lix tel choq‘ qe. …

“… Eb‘ li “neke‘oyb‘enink rik‘in li Qaawa‘ junelik kawaqeb‘ rib‘ ut te‘rupupiq jo‘eb‘ li t‘iw; te‘aanilaq chi ink‘a‘ te‘lub‘q, ut te‘b‘eeq chi ink‘a‘ te‘tawaaq” [Isaias 40:31; tiqb‘il xkawil li aatin]. Nintz‘aama naq chi “moko taanajto‘q ta chik”—anajwan malaj moqon—tex‘osob‘tesiiq chejunilex li nekesik‘ eetenq‘ankil chiru xrahil lee raam ut eerach‘ab‘ankil chiru xrahil eech‘ool. Ninch‘olob‘ xyaalal lix rahom li Dios ut lix k‘ojob‘ankil wi‘chik lix evangelio, li naxsume chixjunil li ch‘a‘ajkilal sa‘ qayu‘am” (“Royb‘eninkil li Qaawa‘,” Jolomil ch‘utub‘aj-ib‘ re octubre 2020).

Xkawresinkil qib‘ jo‘ aj k‘utunel

Tenq‘aheb‘ li komon re naq te‘raj xtzolb‘al li loq‘laj hu sa‘ rochoch. Naru taatenq‘aheb‘ chi tzolok sa‘ ochoch wi nakak‘e xhoonaleb‘ sa‘ li tzoleb‘aal re naq te‘xye resil li na‘leb‘ li neke‘xtaw xjuneseb‘ rib‘ malaj sa‘ junkab‘al (chi‘ilmanq Li k‘utuk jo‘ li Kolonel, 29).