oxib‘eb‘ li winq neke‘b‘eek chirix camello

Chalqex chixnimankil, xb‘aan laj Dana Mario Wood

9–15 enero

Mateo 2; Lukas 2

Xoochalk chixloq‘oninkil

Naq maji‘ nakawil li na‘leb‘ sa‘ li hu a‘in, il Mateo 2 ut Lukas 2, ut tz‘iib‘a li musiq‘ejil na‘leb‘ nakak‘ul. A’in tatxtenq’a chixk’ulb’al li k’utb’esink chirix chan ru xtenq’ankil laa tzoleb’aal.

reetalil li wotzok

Xkanab‘ankileb‘ chi wotzok

Chan ru taawaklesi xch‘ooleb‘ li komon re naq te‘xwotz li na‘leb‘ ut li k‘a‘ru xe‘xk‘ul naq xe‘xtzoleb‘ li loq‘laj hu xjuneseb‘ ut rik‘in lix junkab‘aleb‘? Us ta ak rab‘ihomeb‘ resil lix yo‘lajik li Kolonel li wan sa‘ Mateo 2 ut Lukas 2, toj wan li ak‘ musiq‘ejil na‘leb‘ naru neke‘xk‘ul. Maare taapatz‘ re junjunq li komon naq te‘xwotz junaq na‘leb‘ xe‘xtaw ut li xe‘reek‘a xwankil chi ak‘il.

reetalil li k‘utuk

Xk‘utb‘al li tzol‘leb‘

Mateo 2:1–12; Lukas 2:1–38

Wankeb‘ naab‘al aj yehol nawom chirix lix yo‘lajik li Kristo.

• Li k‘a‘ru ke‘xk‘ul laj loq‘oninel sa‘ Mateo 2:1–12 ut Lukas 2:1–38 naru naxtenq‘aheb‘ li komon re te‘xk‘oxla chan ru naq neke‘xk‘ut lix rahomeb‘ choq‘ re li Kolonel. Il xk‘ab‘a‘eb‘ laj yehol nawom chirix xyo‘lajik li Kristo sa‘ li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut li junkab‘al. Maare wankeb’ li komon sa’ laa tzoleb’aal li te’raj xwotzb’al li na’leb’ xe’xk’ul rik’in li k’anjel a’in, malaj ut taaruuq teeb’aanu li k’anjel jo’ tzoleb’aal. K’a’ut naq wan xwankil naq eb’ laj yehol nawom chirix li Kristo jalan jalanq li ke’wan wi’ chaq sa’ lix yu’ameb’? Chan ru naru naq laa’o taqab’aanu jo’ xe’xb’aanu eb’ a’an?

  jun aj ilol karneer rik’ineb’ li karneer

  Eb’ laj ilol xul ke’wan sa’ xyanqeb’ li xb’een aj yehol nawom chirix lix yo’lajik li Kolonel.

• Rub’elaj naq eb’ laj yehol nawom a’in ke’xloq’oni li ch’ina al Jesus, xb’een wa ke’xsik’ a’an. Re xtenq‘ankileb‘ li komon chi tzolok rik‘in li k‘a‘ru xe‘xb‘aanu, naru taatz‘iib‘aheb‘ li aatin a‘in chiru li pizarron: Eb‘ laj ilol xul, xAna, laj Simehon, ut Eb‘ laj q‘e. Chirix a‘an, naru neke‘xtz‘il rix Mateo 2 ut Lukas 2 ut te‘xtz‘iib‘a chiru li pizarron k‘a‘ru ke‘xb‘aanu li kristiaan a‘in re xsik‘b‘al li Kolonel. K’a’ru neke’xye li esil a’in chirix chan ru naq laa’o nokoru chixsik’b’al li Kristo?

Mateo 2:13–23

Eb‘ li na‘b‘ej yuwa‘b‘ej naru neke‘xk‘ul li na‘leb‘ chi k‘utb‘esinb‘il re xkolb‘al rix lix junkab‘aleb‘.

• Re xtz‘ilb‘al rix chan ru naq li qaChoxahil Yuwa‘ kixk‘am xb‘e laj Jose ut xMaria chi wank choq‘ xna‘ xyuwa‘ li Kolonel, naru taapatz‘ reheb‘ li komon naq te‘xtz‘iib‘a chiru li pizarron junjunq reheb‘ li xiwxiw neke‘qanumsi sa‘eb‘ li kutan a‘in. K‘a‘ru naqatzol sa‘ Mateo 2:13–23 chirix xkolb‘al rix li qajunkab‘al chiruheb‘ li ch‘a‘ajkilal a‘in? Chan ru naq li k’utb’esinb’il na’leb’ xqak’ul xooxtenq’a chixkolb’al rix li qajunkab’al malaj li ani raaro qab’aan chiru junaq ch’a’ajkilal? K‘a‘ru li na‘leb‘ xe‘xk‘e li profeet ut eb‘ li apostol re qatenq‘ankil chixkolb‘al qix sa‘ musiq‘ej?

Lukas 2:40–52

Jo‘ ch‘ajom, li Jesus k‘eek‘o xch‘ool chixb‘aanunkil li rajom lix Yuwa‘.

• Li seraq‘ chirix li Jesus naq kik‘utuk sa‘ li santil ochoch naq yal 12 chihab‘ wan re naru naxtenq‘aheb‘ li saaj komon li ink‘a‘ neke‘xnaw chan ru naq te‘ruuq chi tenq‘ank sa‘ lix k‘anjel li Dios. Naru taak‘eheb‘ li komon sa‘ sumal re rilb‘al Lukas 2:40–52 (k‘e reetal li ak‘ na‘leb‘ natawman rik‘in li Santil Hu chi jaltesinb‘il ru xb‘aan laj Jose Smith—JJS Lukas 2:46). Li junjunq sumal taaruuq chixnumsinkil junjunq k’asal sa’ xwotzb’al chirib’ileb’ rib’ k’a’ru nawulak chiruheb’ sa’ li raqal a’in. Chan ru naq laa’o nokoru chixwotzb’al qana’leb’ chirix li evangelio? Ma wan k’a’ru xqak’ul laa’o li nokoru chixwotzb’al?

• K’a’ru naqatzol sa’ Lukas 2:40–52 chirix chan ru naq kiwan li Jesus jo’ saaj winq? Li na’leb’ chirix li k’iik sa’ Lukas 2:52, naru naxtikib’ jun seraq’ chirix k’a’ru yooko chixb’aanunkil re toowanq jo’ li Kristo. Naru ajwi’ taapatz’ reheb’ li komon naq te’xk’oxla chan ru naq yookeb’ chi k’iik rik’in xna’leb’ (sa’ k’a’uxlej) ut rik’in xteram (sa’ tz’ejwalej), ut sa’ chaab’ilal chiru li Dios (sa’ musiq’ej) ut chiruheb’ li winq (sa’ komonil). Taaruuq ajwi’ te’xk’oxla junaq jayalihom chirix jun reheb’ li na’leb’ a’in. Wi toj nakawaj aatinak chirix li wulak jo‘ li Kristo sa‘eb‘ li na‘leb‘ a‘an, mas wi‘chik wi nakatzoleb‘ li saaj, naru taawoksi li na‘leb‘ wan sa‘ “Xkomon chik li k‘anjeleb‘aal.”

reetalil li k‘anjeleb‘aal

Xkomon chik li k‘anjeleb‘aal

Xtenq‘ankileb‘ li kok‘al ut li saaj chi k‘iik “rik‘in xna‘leb‘ ut rik‘in xteram, sa‘ chaab‘ilal chiru Dios ut chiruheb‘ li winq.”

Li Awa‘b‘ej Steven J. Lund kixch‘olob‘ li k‘anjeleb‘aal choq‘ reheb‘ li kok‘al ut li saaj chi jo‘ka‘in li na‘el chaq sa‘ Lukas 2:52.

“Eb‘ li Kok‘al ut li Saaj, a‘an jun k‘anjeleb‘aal re xtenq‘ankileb‘ chixjunileb‘ li kok‘al ut saaj chi ok choq‘ tzolom ut chixk‘eeb‘al reetal rik‘in xpaab‘aal k‘a‘ru li sahil ch‘oolejil. Naru te‘royb‘eni li k‘a‘ru te‘xk‘ul sa‘ xb‘ehil li sumwank naq te‘kub‘eeq xha‘, te‘k‘ojob‘aaq choq‘ komon, ut te‘ok sa‘ xmolameb‘ li tijonelil malaj xtzoleb‘aaleb‘ li Saaj Ixq, b‘ar wi‘ te‘saho‘q xch‘ool sa‘ k‘anjelak chiruheb‘ li ras riitz‘in jo‘ li Kristo. Te‘xk‘e xmeta, ninqeb‘ ut kok‘eb‘, li te‘xxaqab‘ xyu‘ameb‘ naq neke‘wulak jo‘ li Kolonel” (“Xtawb‘al li sahil ch‘oolejil rik‘in li Kristo,” Jolomil ch‘utub‘aj-ib‘ re octubre 2020).

Xchaab‘ilob‘resinkil li qak‘utum

Kanab‘eb‘ chi tz‘aqonk li ani ink‘a‘ xe‘tzolok sa‘eb‘ li loq‘laj hu sa‘ kab‘l. Us ta maare wankeb‘ li komon sa‘ li tzoleb‘aal li ink‘a‘ xe‘ru chirilb‘al Mateo 2 ut Lukas 2 rub‘elaj li tzolok, eb‘ a‘an naru ajwi‘ neke‘xtzol li chaab‘il na‘leb‘. K‘e reetal naq taakanab‘eb‘ chixjunileb‘ li komon chi tz‘aqonk ut chi aatinak sa‘ li seraq‘.