laj Jwan aj Kub‘sihom Ha‘ naq kixkub‘si xha‘ li Jesus

B‘onb‘il lem sa‘ li santil ochoch re Nauvoo, xb‘aan laj Tom Holdman

23–29 enero

Mateo 3; Markos 1; Lukas 3

“Tuqub‘omaq lix b‘e li Qaawa‘ ”

Naq nakawil ut nakak’oxla Mateo 3; Markos 1; ut Lukas 3, tz’iib’a li musiq’anb’il na’leb’ nakak’ul. A‘in tixk‘e xb‘oqb‘al li Musiq‘ej naq nakakawresi aawib‘. Jo‘ xtz‘aqob‘ li na‘leb‘ li neke‘k‘utman sa‘ li tusleb‘ aatin a‘in, li neke‘tawman sa‘ Kim, Taaqehin—Choq‘ reheb‘ li komon ut li junkab‘al naru neke‘oksiman sa‘ li tzolok.

reetalil li wotzok

Xkanab‘ankileb‘ chi wotzok

Re xtenq‘ankileb‘ li komon chixwotzb‘al chan ru naq xe‘osob‘tesiik sa‘ xyu‘ameb‘ rik‘in xtzolb‘al li Ak‘ Chaq‘rab‘, naru nakatz‘iib‘a li patz‘om a‘in chiru li pizarron: Ma wan k‘a‘ru xab‘aanu xb‘aan li k‘a‘ru xawil sa‘ li Ak‘ Chaq‘rab‘ chiru li xamaan a‘in? B‘oqeb‘ li komon chixsumenkil li patz‘om.

reetalil li k‘utuk

Xk‘utb‘al li tzol‘leb‘

Mateo 3:1–12; Lukas 3:2–18

Eb’ li tzolom neke’xkawresi rib’ xjunes ut neke’xkawresi li jun ch’ol chik chixk’ulb’al li Jesukristo.

• Chan ru naq naqakawresi qib’ naq chalk re junaq ula’ li nawb’il ru? Rik’in jun patz’om jo’ a’in naru nakatikib’ jun seraq’ chirix chan ru naq laj Jwan aj Kub’sihom Ha’ kixkawresiheb’ li tenamit chixk’ulb’al li Jesukristo. Chirix a‘an naru nakak‘eheb‘ li komon sa‘ oxib‘ ch‘uut. Li junjunq chi ch‘uut taaril Mateo 3:1–6; Mateo 3:7–12; malaj Lukas 3:10–15, re te‘xsik‘ chan ru naq laj Jwan aj Kub‘sihom Ha‘ kixkawresiheb‘ li tenamit chixk‘ulb‘al li Jesukristo sa‘ xyu‘ameb‘. Kanab‘ chixjunqaleb‘ li ch‘uut chixwotzb‘al li k‘a‘ru xe‘xtaw.

laj Jwan aj Kub’sihom Ha’ naq yoo chi jultikank aatin

Laj Jwan aj Kub‘sihom Ha‘ kijultikan aatin sa‘ li yamyookil ch‘och‘, xb‘aan laj Robert T. Barrett

Lukas 3:2–14

Aajel ru naq taak’utunq sa’ li qayu’am li “naruuchin li jalb’a-k’a’uxlej.“

• Sa’ Lukas 3:8, laj Jwan aj Kub’sihom Ha’ kixk’ut chiruheb’ li tenamit naq rub’elaj naq te’kub’eeq xha’, tento taawanq rik’ineb’ ruuchinihom li jalok k’a’uxlej. Chan ru naq tatruuq chixtenq’ankileb’ li komon chixk’eeb’al reetal li ruuchinihom lix jalb’aleb’ xk’a’uxl? Naru taaye reheb’ naq te’xsik’ sa’ Lukas 3:8–14 re xk’eeb’al reetal k’a’ru naxk’oxla laj Jwan naq “naruuchin“ li jalb’a-k’a’uxlej. Te’ruuq ajwi’ chirilb’al Moroni 6:1–3 ut Tzol’leb’ ut Sumwank 20:37. Taaruuq taatz’iib’a sa’ pizarron xjalam-uuch jun che’ li yoo chi uuchink, ut eb’ li komon te’ruuq chixtz’iib’ankil chiru li ru li che’ li “ruuchinihom“ li jalb’a-k’a’uxlej li xe’xtaw. Us ajwi’ sa’ li hoonal a’in aatinak chirix k’a’ru tz’aqal xyaalalil xjalb’al li qak’a’uxl.

Mateo 3:13–17

Naqataaqe li Jesukristo naq nakub‘e qaha‘ ut naqak‘ul li Santil Musiq‘ej.

• Re xnumsinkil resil lix kub’iha’ li Jesukristo, naru taab’aanu a’in: Patz’ reheb’ li komon chan ru naq te’ruuq chiroksinkil Mateo 3:13–17re xk’utb’al li kub’iha’ chiru anihaq, jo’ jun li ch’ina al, malaj junaq li jalan chik xpaab’aal. (Naru ajwi‘ te‘roksi li jalam-uuch wan sa‘ li tusleb‘ aatin re li xamaan a‘in sa‘ Kim, Taaqehin—Choq‘ reheb‘ li komon ut li junkab‘al.) K’a’ruheb’ li na’leb’ chirix li kub’iha’ li tento raj xch’olob’ankil? Taaruuq te’xch’olob’ lix na’leb’eb’ chirib’ileb’ rib’ re tzolok.

• Re xtenq‘ankileb‘ li komon chixjultikankileb‘ lix sumwank re li kub‘iha‘, naru nakapatz‘ re junaq reheb‘ naq tixyaab‘asi li raatin li Elder Bednar li natawman sa‘ “Xkomon chik li k‘anjeleb‘aal.” Eb’ li komon sa’ laa tzoleb’aal maare te’raj xyeeb’al resil li k’a’ru neke’reek’a chirix lix kub’iha’ ut li sumwank xe’ok wi’ sa’ li kub’iha’. Naru ajwi‘ neke‘xb‘icha junaq b‘ich li na‘aatinak chirix xtaaqenkil li Kolonel, maare “Kim, taaqehin“ (Eb‘ li B‘ich, 66).

• Laj Jwan aj Kub’sihom Ha’ kixye naq li Kolonel taakub’sinq ha’ “rik’in Santil Musiq’ej ut xam“ (Mateo 3:11). Li kub’iha’ rik’in xam nak’ulman naq nokok’ojob’aak ut naqak’ul li maatan re li Santil Musiq’ej. K’a’ut naq tento taqak’ul li maatan re li Santil Musiq’ej re tooruuq chi xik chi uub’ej sa’ lix awa’b’ejihom li Dios? K‘a‘ru xk‘anjel li kub‘iha‘ rik‘in xam ut rik‘in Santil Musiq‘ej choq‘ qe laa‘o? (chi‘ilmanq Alma 5:14). Li video “El bautismo del Espíritu Santo” (ChurchofJesusChrist.org) naru natenq‘an sa‘ li aatinak a‘in.

reetalil li k‘anjeleb‘aal

Xkomon chik li k‘anjeleb‘aal

Eb‘ li qasumwank re li kub‘iha‘.

Li Elder David A. Bednar kixye: “Sa‘ li sumwank re li kub‘iha‘ wankeb‘ oxib‘ li teneb‘ank: (1) taawanq qach‘ool chixk‘ulb‘al sa‘ qab‘een lix k‘ab‘a‘ li Jesukristo, (2) junelik taqajultika li Kristo, ut (3) taqapaabeb‘ lix taqlahom. Li osob‘tesink yeechi‘inb‘il sa‘ li sumwank a‘in, a‘an naq “taawanq junelik lix Musiq‘ [qik‘in]” [Tzol‘leb‘ ut Sumwank 20:77]. Chi jo‘kan, li kub‘iha‘ a‘an jun kawresink-ib‘ aajel ru re taaruuq taak‘eemanq qaliceens chixk‘ulb‘al qochb‘eeninkil rajlal xb‘aan rox li komon sa‘ roxichal li Dios” (“Junelik taakanaaq eerik‘in li risinkil lee maak,” Jolomil ch‘utub‘aj-ib‘ re abril 2016).

Re rilb‘al junaq seraq‘ chirix junaq ch‘ina al li naroxloq‘i xsumwank re li kub‘iha‘, chi‘ilmanq li seraq‘ li natawman sa‘ xtiklajik li raatin li Hermana Carole M. Stephens “Tenemos gran motivo para regocijarnos” (Liahona, noviembre 2013, 115–117).

Xchaab’ilob’resinkil li qak’utum

Taak’ut tz’aqal li tzol‘leb‘. Laj Hyrum Smith kixye, “K‘utumaqeb‘ li xb‘een raqal chi na‘leb‘ re li evangelio—k‘uteb‘ rajlal rajlal; teetaw naq wulaj wulaj taak‘utb‘esimanq cheru li ak‘ na‘leb‘ ut xkomon chik li saqen chirix. Taaruuq teenimob’resi ru re teetaweb’ ru chi us. Chirix a‘an saqen wi‘chik ru naq te‘xtaw ru li ani tzolb‘ileb‘ eeb‘aan” (sa‘ History, 1838–1856 [Manuscript History of the Church], tomo E-1, 1994, josephsmithpapers.org).