Kwoj Juon Rūkaki ilo Kabun̄ eo an Jisōs Kraist

Kar kūr eok jān Anij n̄an katakin ajri ro Nejin ilo wāween eo an Rilo̧mo̧o̧r eo. Kar kōjenolo̧k eok n̄an kūr in jān maron̄ eo an priesthood eo An ekwojarjar. Men̄e kwojjab juon rūkaki eo eļap imminene ippān, ilo am̧ mour erreo, jar aolep raan, im ekkatak jeje ko rekwojarjar, Jemedwōj Ilan̄ enaaj lewaj n̄an eok kareel im kajoor eo an Jetōb Kwojarjar n̄an jipan̄ eok tōprak (lale 2 Nipai 33:1).

Ro otemjej kar lewaj lōke in ņa ioom̧ n̄an kōjparok ajri ro nejin Jemedwōj Ilan̄, im Ejeļā ta eo rej aikuj im wāween eo em̧m̧antata n̄an tōpar er. Ilo am̧ jar ilo kappukōt im̧we eo an Jetōb Kwojarjar, E enaaj tōl eok ilo am̧ m̧aanjabpopo im ilo am̧ katakin. Enaaj kwaļo̧k n̄an eok ta eo kwoj aikuj in ba im ta eo kwoj aikuj in kōm̧m̧ane (lale 2 Nipai 32:5).

Jibadbad kein remenin aorōk an katakin gospel eo im ekkatak ej n̄an kam̧wilaļļo̧k oktak eo n̄an Jemedwōj Ilan̄ im Jisōs Kraist. Kōttōpar eo am̧ āinwōt juon rūkaki ej n̄an jipan̄ ro kwoj katakin kōm̧m̧ane aolep men remaron̄e n̄an an ļapļo̧k aer erom oktak—juon kijejeto eo me ererakļo̧k eļapļo̧k jān iien kūlaaj. Kajjitōk ippān ro kwoj katakin n̄an lukkuun bōk koņaer ilo ekkatak kōn Jisōs Kraist im gospel eo An im n̄an jerbale ta eo rej ekkatak. Rōjan̄ er n̄an kōm̧m̧ane ekkatak ko aer make im an baam̧le itulikin kūlaaj eo ej jipan̄ eo eļaptata an ekkatak gospel eo aer make. Ilo aer m̧akūtkūt ilo tōmak jān ekkatak āinwōt kajjojo armej im baam̧le ko, remaron̄ in karuwaineneiktok Jetōb eo n̄an mour ko aer, im ej Jetōb eo me ej bōktok oktak eo em̧ool. Aolep men kwoj kōm̧m̧ane āinwōt juon rūkaki aikuj in iookļo̧k wōt jibadbad in ekwojarjar.

Katakin wōt katak ko an jepļaaktok eo an gospel eo an Jisōs Kraist loe ilo jeje ko rekwojarjar im naan ko an rikanaan ro raan kein. Katak eo erreo—n̄an indeeo, m̧ool eo ejjab oktak katakin jān Anij im ro Rikarejeran—karuwaineneik Jetōb eo im kajoor eo an n̄an ukot mour ko.

Kūr eo n̄an katakin ej juon lōke ekwojarjar, im ekkā wōt en̄jake tōr jān jon̄an ilo elōn̄ iien ko. Ak keememej bwe Jemedwōj Ilan̄ ekar kūr eok, im Ej jāmin meļo̧kļo̧k eok. En̄in ej jerbal eo an Irooj, im ilo am̧ jerbal “kōn aolepān būruwōm̧, maron̄, ļōmņak im kajoor” (Katak im Bujen Ko 4:2), Enaaj kōļapļo̧k jon̄an maron̄ eo am̧, mennin letok ko, im tōļan ko, im jerbal in jipan̄ eo am̧ n̄an kōjeraam̧m̧an mour ko an ro kwoj katakin.