Kōjerbale Itok, Ļoor Eō—N̄an Jabōt Jikuuļ

M̧aanjabpopo n̄an Katakin ilo Jabōt Jikuuļ

Ekkatak eo am̧ make im an baam̧le ilo m̧weo ej aikuj in ioļapen ekkatak gospel eo. Menin em̧ool n̄an kwe im n̄an ro kwoj katakin. Ilo am̧ m̧aanjabpopo n̄an katakin, jino kōn en̄jake ko am̧ make ilo jeje ko rekwojarjar. M̧aanjabpopo eo am̧ elukkuun aorōktata enaaj waļo̧k ilo am̧ mour kōn gospel eo, etale jeje ko rekwojarjar, im kappukot im̧we eo an Jetōb Kwojarjar.

Itok, Ļoor Eō—N̄an Kajjojo Armej im Baam̧le ko ej m̧ōttan eo eaorōk jim̧or ilo am̧ ekkatak im am̧ m̧aanjabpopo n̄an katakin. Enaaj jipan̄ eok bōk juon meļeļe eo em̧wilaļļo̧k an pedped in katak ko loi ilo jeje ko rekwojarjar. Enaaj barāinwōt kōmaron̄ eok n̄an am̧ im̧we im kajjitōk ippān ro uwaan kūlaaj eo n̄an kōjerbale Itok,Ļoor Eō—N̄an Kajjojo Armej im Baam̧le ko n̄an kōkōm̧anm̧anļo̧k ekkatak jeje ko rekwojarjar eo aer make im baam̧le (n̄an jipan̄ kōm̧m̧ane menin, lale “Ļōmņak ko n̄an Kōketak Ekkatak an Juon Make im an Baam̧le” ilo kein jipan̄ in). Ilo am̧ kōm̧m̧ane, keememej n̄an mejmajkaruo kōn ro uwaan kūlaaj eo me jekjek ko an baam̧le eo remaron̄ jab rie ekkatak jeje ko rekwojarjar an baam̧le im nokon in jota.

Ilo iien am̧ m̧aanjabpopo, ļōmņak ko im im̧we ko renaaj itok n̄an kwe kōn armej ro kwoj katakin er. Kwonaaj bōk ļōmņak ko kōn wāween an pedped in katak ko ilo jeje ko rekwojarjar naaj kōjeraam̧m̧an mour ko aer. Kwonaaj bōk tōl n̄an im̧we er n̄an lo pedped in katak ko ilo aer ekkatak jān jeje ko rekwojarjar kōn er make.

Ļōmņak ko n̄an Katakin

Ilo am̧ m̧aanjabpopo n̄an katakin, kwomaron̄ in bōk im̧we ko jet jān am̧ etali laajrak in katak ko ilo bok in jipan̄ in. Jab ļōmņak kōn meļeļe kein āinwōt kwoj aikuj ļoore kōmeļeļe bun̄tōn ņae bun̄tōn ak āinwōt elmakot ko n̄an kōkajoorļo̧k en̄jake ko am̧ make. Kwojeļā ro uwaan kūlaaj eo am̧, im kwonaaj kōm̧m̧an bwe kwon jeļā kajjeer em̧m̧anļo̧k ilo ami ekkatak ippān doon ilo kūlaaj. Irooj ejeļā kajjier barāinwōt, im Enaaj im̧we eok kōn wāween ko rem̧m̧antata n̄an jipan̄ ro uwaan kūlaaj eo kalōk ekkata gospel eo aer ilo m̧weo.

Kein jipan̄ ko jet repojak n̄an am̧ kōjerbali ilo am̧ kōppopo, ekoba aitia ko ilo Itok, Ļoor Eō—N̄an Kajjojo Armej im Baam̧le Ko im māākjiin ko an Kabun̄ in. Kōn eļapļo̧k meļeļe ko kōn kein jipan̄ kein im ko jet, lale jākjen eo taitōļ in “Kein Jipan̄ ko Jet” ilo bok in jipan̄ in.

Jet Men ko n̄an Keememeji

• Ekkatak gospel eo ekanooj ļap an jetjet n̄e ej pedped ilo m̧weo. Āinwōt juon rūkaki, emaron̄ wōr juon am̧ eddo eaorōk n̄an rie, kōketak, im kalōk ekkatak gospel eo ioon ro uwaan kūlaaj eo ilo m̧weo.

• Oktak eo an ro uwaan kūlaaj eo n̄an Jisōs Kraist im gospel eo An enaaj m̧wilaļļo̧k ilo aer meļeļe im mour kōn katak ko rem̧ool. Kōketak er n̄an je im m̧akūtkūt ekkar n̄an im̧we ko rej būki jān Jetōb Kwojarjar eo.

• Katakin eļapļo̧k jān baj kōmeļeļe wōt, ak ej barāinwōt ļapļo̧k jān baj tōl juon iien ekōnono. M̧ōttan eddo eo am̧ ej n̄an kōketak bōk koņaan me ej kōkōm̧anm̧anļo̧k im ej pedped wōt ioon jeje ko rekwojarjar. Kwoj aikuj barāinwōt kwaļo̧k en̄jake ko rej im̧we eok me kwoj būki ilo am̧ ekkatak jeje ko rekwojarjar.

• Keememej bwe elōn̄ ro uwaan kūlaaj eo ewōr aer en̄jake ko eļap meļeļeier ekkatak ilo m̧weo kōn ejja eoon ko wōt me kwonaaj ekōnono kaki ilo kūlaaj. Kwoj maron̄ rie ekkatak jeje ko rekwojarjar aer kōn leļo̧k n̄an er iien ko rem̧m̧an remakijkij n̄an kwaļo̧k ta eo rej ekkatak ilo m̧weo.

• Jemedwōj Ilan̄ ekōņan bwe kwon wājepdik am̧ katakin āinwōt juon rūkaki. Ekar kōpooji elōn̄ kein jipan̄ ko n̄an jipan̄ eok, ekoba kweilo̧k in ko̧o̧njeļ ko an rūkaki ro. Ilo kweilo̧k in kwomaron̄ ko̧o̧njeļ ippān rūkaki ro jet kōn apan̄ ko kwoj jelm̧aeiki. Kwomaron̄ bar kōnono im kamineneik pedped in katakin ko āinwōt an Kraist.

• Em̧m̧an tata an armej ro ekkatak n̄e ewōr aer iien ko rem̧m̧an n̄an katakin. Ilo jet iien, ļōmņak in kōtļo̧k an ro uwaan kūlaaj eo, ekoba jodikdik ro, n̄an katakin jidik in katak eo. Pedped wōt ioon jokāālet in kōn aikuj ko im maron̄ ko an ro uwaan kūlaaj eo. Eļan̄n̄e kwoj kajjitōk ippān juon uwaan kūlaaj eo n̄an katakin, bōk iien eo n̄an jipan̄ ļeo ak lio m̧aanjabpopo m̧oktaļo̧k jān am̧ kōjerbal ļōmņak ko loi ilo bok in jipan̄ in im ilo Itok, Ļoor Eō—N̄an Kajjojo Armej im Baam̧le ko. Keememej bwe āinwōt juon rūkaki kar kūri, kwoj lukkuun bōk eddo in ta eo im katak kake ilo kūlaaj eo.

Bok in jipan̄ in ekoba kōllaajrak in katakin ko n̄an kajjojo wiik ilo iiō eo. Ilo Jabōt ko n̄e Jabōt Jikuuļ ejjab kōm̧m̧an kōnke kōn kweilo̧k eo eļap an stake, ak jabdewōt bar un, ro uwaan kūlaaj eo rej kōketak n̄an wōnm̧aanļo̧k wōt in riiti Kallim̧ur Ekāāl ilo m̧weo ekkar n̄an jikejuuļ eo kar kōllaajrake ilo Itok, Ļoor Eō—N̄an Kajjojo Armej im Baam̧le ko. N̄e Jabōt Jikuuļ ej kōm̧m̧an, kwomaron̄ kāālet n̄an kajjieon̄ kejoon ak kobaik katak ko.