Та бол Есүс Христийн Сүмийн багш

Та хүүхдүүдэд нь Аврагчийн арга барилаар заахаар Бурханаар дуудагдсан. Таныг Бурханы ариун санваарын эрх мэдлээр энэ дуудлагад онцгойлон адисалсан. Та туршлагагүй багш байсан ч зохистой амьдарч, өдөр бүр залбирч, судраас судалбал, Тэнгэрлэг Эцэг амжилтад хүрэхэд тань туслах Сүнсний удирдамж, хүчийг өгөх болно (2 Нифай 33:1-ийг үзнэ үү).

Таны халамжид даатгасан хүмүүс Тэнгэрлэг Эцэгийн хүүхдүүд бөгөөд Тэрээр тэдэнд юу хэрэгтэйг мөн хэрхэн хүрч ажиллахыг мэддэг. Таныг Ариун Сүнсний удирдамжийг залбирч байгаад эрэлхийлэх үед Тэрээр хичээлээ бэлдэж заахад тань удирдан чиглүүлнэ. Тэрээр юу хэлэх, юу хийх хэрэгтэйг танд илчилнэ (2 Нифай 32:5-ыг үзнэ үү).

Сайн мэдээг заах мөн үүнд суралцах үндсэн зорилго бол Тэнгэрлэг Эцэгт болон Есүс Христэд хөрвөгдөх хөрвөлтийг гүнзгийрүүлэх явдал юм. Багшийн хувьд таны зорилго бол зааж байгаа хүмүүстээ илүү хөрвөгдөхөд нь туслахын тулд чадах бүхнээ хийх явдал бөгөөд энэ нь хичээлийн бус цагаар ч үргэлжилдэг. Зааж байгаа хүмүүсээ Есүс Христийн тухай мөн Түүний сайн мэдээний зарчим болон сургаалаас суралцахад идэвхтэй оролцож, ойлгосон зүйлээ хэрэгжүүлэхэд урь. Тэднийг хичээлээс гадуур хувиараа болон гэр бүлээрээ суралцах цагаа сайн мэдээнээс суралцах үндсэн эх сурвалж болгоход урамшуул. Тэд хувиараа болон гэр бүлээрээ суралцаж, итгэлийнхээ дагуу үйлдсэнээр Сүнсийг амьдралдаа урин авчрах бөгөөд гагцхүү Сүнс жинхэнэ хөрвөлтийг авчирдаг билээ. Багшийн хувьд таны хийх бүх зүйл энэхүү ариун нандин зорилго руу чиглэсэн байх ёстой.

Зөвхөн судруудад болон хожмын үеийн бошиглогчдын үгэнд байдаг Есүс Христийн сэргээгдсэн сайн мэдээний сургаалыг заа. Бурхан болон Түүний үйлчлэгчдийн заасан мөнхийн, өөрчлөгдөшгүй үнэн болох цэвэр сургаал Сүнсийг урьж, амьдралыг өөрчлөх хүчтэй.

Багшлах дуудлага бол ариун нандин итгэл найдвар бөгөөд заримдаа хийж чадахгүй мэт санагдах нь хэвийн үзэгдэл юм. Гэхдээ Тэнгэрлэг Эцэг тань таныг дуудсан бөгөөд хэзээ ч орхихгүй гэдгийг бүү мартаарай. Энэ бол Их Эзэний ажил бөгөөд та “бүхий л зүрх сэтгэл, хүчин чадал, оюун хийгээд чадлаараа” (Сургаал ба Гэрээ 4:2) үйлчилбэл Тэр таны чадвар, билиг авьяасыг нэмэгдүүлж, таны үйлчлэл зааж буй хүмүүсийн тань амьдралыг адислах болно.