Ko ha Faiako Koe ʻi he Siasi ʻo Sīsū Kalaisí

Kuo ui koe ʻe he ʻOtuá ke akoʻi ʻEne fānaú ʻi he founga ʻa e Fakamoʻuí. Naʻe vaheʻi koe ki he uiuiʻi ko ʻení ʻaki e mafai ʻo Hono lakanga fakataulaʻeiki māʻoniʻoní. Neongo kapau ʻoku ʻikai ko ha faiako taukei koe, ʻe foaki atu ʻe he Tamai Hēvaní ʻa e ivi tākiekina mo e mālohi ʻo e Laumālie Māʻoniʻoní ke ke lavameʻa ʻi hoʻo moʻui taau, lotu maʻu pē, mo ako e folofolá (vakai, 2 Nīfai 33:1).

Ko kinautolu kuo fakafalala atu ke mou tokangaʻí, ko ha fānau kinautolu ʻa e Tamai Hēvaní, pea ʻokú Ne ʻafioʻi e meʻa ʻoku nau fie maʻú mo e founga lelei taha ke tokoni ai kiate kinautolú. ʻI hoʻo kumia ʻi he faʻa lotu e ivi tākiekina ʻo e Laumālie Māʻoniʻoní, te Ne tataki koe ʻi hoʻo teuteú mo e lolotonga hoʻo faiakó. Te Ne fakahā kiate koe ʻa e meʻa ʻoku totonu ke ke lea ʻakí mo ia ʻoku totonu ke ke faí (vakai, 2 Nīfai 32:5).

Ko e taumuʻa mahuʻinga ʻo hono akoʻi mo ako ʻo e ongoongoleleí ke fakaloloto e fakaului ki he Tamai Hēvaní mo Sīsū Kalaisí. Ko hoʻo taumuʻa ko e faiakó, ke tokoniʻi kinautolu ʻokú ke akoʻí ke nau fai e meʻa kotoa ʻoku nau lavá ke nau ului lahi ange [ki he ongoongolelei ʻo Sīsū Kalaisí]–ko ha ngāue ia ʻoku ope atu ʻi he taimi kalasí. Fakaafeʻi kinautolu ʻokú ke akoʻí ke nau kau moʻoni ʻi he ako kia Sīsū Kalaisi pea mo ʻEne ongoongoleleí pea mo fakahoko ʻa e meʻa ʻoku nau ako. Fakalotolahiʻi kinautolu ke ʻai ʻenau ako fakafoʻituitui mo fakafāmili mavahe mei he kalasí ko e tefitoʻi maʻuʻanga tokoni ia ʻo ʻenau ako e ongoongoleleí. ʻI heʻenau ngāue ʻi he tui ʻo ako fakafoʻituitui mo fakafāmilí, te nau fakaafeʻi e Laumālié ki heʻenau moʻuí, pea ko e Laumālié ʻokú Ne fakahoko ʻa e ului moʻoní. Ko e meʻa kotoa pē ʻokú ke fakahoko ʻi hoʻo hoko ko e faiakó, ʻoku totonu ke fakataumuʻa ki he kaveinga toputapú ni.

Akoʻi pē ʻa e tokāteline ʻo e ongoongolelei ʻo Sīsū Kalaisi kuo fakafoki maí ʻo hangē ko ia ʻoku hā ʻi he folofolá pea mo e ngaahi lea ʻa e kau palōfita ʻo e ngaahi ʻaho kimui ní. ʻOku hanga ʻe he tokāteline haohaoá—ngaahi moʻoni taʻeliua taʻengata kuo akoʻi ʻe he ʻOtuá mo ʻEne kau tamaioʻeikí—ʻo fakaafeʻi e Laumālié pea ʻokú ne maʻu e mālohi ke liliu e moʻuí.

Ko e ui ke faiakó ko ha falala toputapu, pea ʻoku fakanatula pē ke ongoʻi mafasia he taimi ʻe niʻihi. Kae manatuʻi naʻe uiuiʻi koe ʻe hoʻo Tamai Hēvaní, pea he ʻikai te Ne teitei liʻaki koe. Ko e ngāue ʻeni ʻa e ʻEikí, pea ʻi hoʻomou ngāue ʻaki “homou lotó, iví, ʻatamaí mo e mālohí kotoa” (Tokāteline mo e Ngaahi Fuakava 4:2), te Ne fakalahi homou iví, ngaahi meʻafoakí, mo e ngaahi talēnití, pea ʻe tāpuekina ʻe hoʻomou fua fatongiá ʻa e moʻui ʻa kinautolu ʻoku mou akoʻí.