Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Lautohi Faka–Sāpaté

Ko e Teuteu ke Faiako ʻi he Lautohi Faka-Sāpaté

ʻOku totonu ke hoko ʻa e ako fakafoʻituitui mo fakafāmili ʻi ʻapí ko e uho ia hono ako ʻo e ongoongoleleí. ʻOku hoko moʻoni ʻeni ʻiate koe mo kinautolu ʻokú ke akoʻí. ʻI hoʻo teuteu ke faiakó, kamata ʻaki ha ʻi ai haʻo ngaahi aʻusia ʻi he folofolá. Ko hoʻo teuteu mahuʻinga tahá ʻe hoko ia ʻi hoʻo moʻui ʻaki e ongoongoleleí, fakatotolo ʻi he folofolá, mo fekumi ki he tataki ʻa e Laumālie Māʻoniʻoní.

Ko e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ko ha konga mahuʻinga ia ʻo hoʻo ako fakatāutahá mo e teuteu ke faiakó, fakatouʻosi. ʻE tokoni atu ke ke maʻu ha mahino lahi ange ki he ngaahi tefitoʻi moʻoni fakatokāteline ʻi he folofolá. Te ne toe ʻai foki ke ke lava ʻo ueʻi mo fakaafeʻi e kau mēmipa ʻo e kalasí ke nau fakaʻaongaʻi ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fakaleleiʻi ʻenau ako folofola fakataautaha mo fakafāmilí (ki ha tokoni ʻi hono fai ʻení, vakai, “Ngaahi Fakakaukau ki hono Poupouʻi ʻo e Ako Fakatāutahá mo e Fakafāmilí” ʻi he maʻuʻanga tokoni ko ʻení). ʻI hoʻo fai iá, manatuʻi ke ke ongoʻingofua e ngaahi tūkunga ʻoku ʻi ai e kau mēmipa ʻo e kalasí ʻoku ʻikai faipoupoua ʻe honau ngaahi fāmilí ʻa e ako folofola fakafāmili maʻu peé mo e efiafi fakafāmili ʻi ʻapí.

Lolotonga hoʻo teuteú, te ke maʻu ha ngaahi fakakaukau mo ha ngaahi ongo fekauʻaki mo e kakai ʻokú ke akoʻí. Te ke maʻu ha ngaahi ʻilo ki he founga ʻe faitāpuekina ai ʻe he ngaahi tefitoʻi moʻoni ʻi he folofolá ʻa ʻenau moʻuí. ʻE tataki koe ke ke ueʻi fakalaumālie kinautolu ke nau ʻiloʻi e ngaahi tefitoʻi moʻoni ko iá, ʻi heʻenau ako mei he folofolá ʻiate kinautolu peé.

Ngaahi Fakakaukau ki hono Akoʻí

ʻI hoʻo teuteu ke faiakó, ʻe ala maʻu ha ueʻi fakalaumālie ʻaki haʻo vakaiʻi ʻa e ngaahi fakamatala fakafaiako ʻi he maʻuʻanga tokoni ko ʻení. ʻOua te ke lau e ngaahi fakakaukau ko ʻení ko ha fakahinohino fakahokohoko, ka ko ha ngaahi fokotuʻu ke ke maʻu ai haʻo tataki fakalaumālie. ʻOkú ke ʻiloʻi ʻa e kau mēmipa ʻo hoʻo kalasí, pea te ke maheni lelei ange mo kinautolu ʻi hoʻomou ako fakataha ʻi he kalasí. ʻOku ʻafioʻi foki kinautolu ʻe he ʻEikí, pea te Ne ueʻi ʻaki koe ʻa e ngaahi founga lelei taha ke tokoniʻi ai e kau mēmipa ʻo e kalasí ke nau tupulaki ʻi he ako ʻo e ongoongoleleí ʻoku nau fakahoko ʻi ʻapí.

ʻOku lahi ha ngaahi maʻuʻanga tokoni kehe ke ke fakaʻaongaʻi ʻi hoʻo teuteú, kau ai e ngaahi fakakaukau ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e ʻŪ makasini ʻo e Siasí. Ke maʻu ha fakamatala lahi ange fekauʻaki mo e ngaahi meʻá ni pea mo ha ngaahi maʻuʻanga tokoni kehe, vakai ki he konga ʻoku ui ko e “Ngaahi Maʻuʻanga Tokoni Kehé” ʻi he maʻuʻanga tokoni ko ʻení.

Ko Ha Ngaahi Meʻa ke Manatuʻí

• ʻOku lelei taha ʻa hono ako ʻo e ongoongoleleí ʻi he taimi ʻoku fakatefito ai ia ʻi ʻapí. ʻOku kau ʻi ho fatongia mahuʻinga ko e faiakó ʻa hono poupouʻi, fakalotolahiʻi mo fakatupulaki hono ako ʻe he kau mēmipa ʻo e kalasí ʻa e ongoongoleleí ʻi ʻapí.

• ʻE loloto ange ului ʻa e kau mēmipa ʻo e kalasí kia Sīsū Kalaisi mo ʻEne ongoongoleleí ʻi he mahino kiate kinautolu ʻa e tokāteline moʻoní mo nau moʻui ʻakí. Poupouʻi ke nau lekooti mo ngāueʻi e ngaahi ongo ʻoku nau maʻu mei he Laumālie Māʻoniʻoní.

• ʻOku mahulu hake ʻa e faiakó ʻi he fakamatala ʻataʻatā peé, ka ʻoku toe mahulu lahi hake foki ia ʻi he fakahoko pē ʻo ha fealeaʻakí. Ko e konga ho fatongiá ke poupouʻi ʻa e faʻahinga kau mai ko ē ʻoku langaki moʻuí pea mo fakavaʻe ʻi he folofolá. ʻOku totonu foki ke ke vahevahe ha ngaahi ʻilo fakalaumālie ne ke maʻu ʻi hoʻo ako ʻa e folofolá.

• Manatuʻi ʻoku maʻu ʻe ha tokolahi ʻo e kau mēmipa e kalasí ha ngaahi aʻusia ʻoku mahuʻinga ʻi hono ako ʻi ʻapi e folofola tatau mo ia te mou ako ʻi he kalasí. Te ke lava ʻo poupouʻi ʻenau ako e folofolá ʻaki haʻo toutou ʻoange ha ngaahi faingamālie ke nau vahevahe ai e meʻa ʻoku nau ako ʻi ʻapí.

• ʻOku finangalo e Tamai Hēvaní ke ke lavameʻa ʻi hoʻo hoko ko e faiakó. Kuó Ne ʻomi ha ngaahi maʻuʻanga tokoni lahi ke tokoniʻi koe, kau ai e ngaahi fakataha alēlea fakafaiakó. ʻI he ngaahi fakataha ko ʻení, te mou lava ai ʻo fealeaʻaki mo e kau faiako kehé ki he ngaahi pole ʻoku mo u fehangahangai mo iá. Te mou lava foki ke aleaʻi mo akoako fakahoko ʻa e ngaahi tefitoʻi moʻoni ʻo e faiako ʻi he anga faka-Kalaisí.

• ʻOku ako lelei taha ʻa e kakaí ʻi he taimi ʻoku nau maʻu ai ha ngaahi faingamālie ke faiakó. ʻI he taimi ʻe niʻihi, tuku ange ki he kau mēmipa ʻo e kalasí, ke nau akoʻi ha konga ʻo e lēsoní, kau ai mo e toʻu tupú. Fakatefito e tuʻutuʻuni ko ʻení ʻi he ngaahi fiemaʻu mo e ngaahi meʻa ʻoku malava ʻe he kau mēmipa ʻo e kalasí. Kapau te ke fakaafeʻi ha mēmipa ʻo e kalasí ke faiako, ʻai haʻo taimi ke ke tokoni ai kiate ia ke teuteu kei taimi ʻaki hano fakaʻaongaʻi e ngaahi fakakaukau ʻoku ʻi he maʻuʻanga tokoni ko ʻení pea mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Manatuʻi ko koe ʻokú ke fatongia ʻaki ʻa e meʻa ʻoku akoʻi ʻi he kalasí, ʻi hoʻo hoko ko e faiako kuo uiuiʻí.

ʻOku kau ʻi he maʻuʻanga tokoni ko ʻení ʻa e ngaahi fokotuʻutuʻu fakafaiako ki he uike kotoa pē ʻo e taʻú. Ko e ngaahi Sāpate ʻoku ʻikai fakahoko ai ʻa e Lautohi Faka-Sāpaté koeʻuhí ko ha konifelenisi lahi, konifelenisi fakasiteiki, pea ha toe ʻuhinga, ʻoku poupouʻi e kau mēmipa ʻo e kalasí ke nau kei lau pē Fuakava Foʻoú ʻi ʻapi ʻo fakatatau mo e taimi tēpile kuo ʻoatu ʻi he Haʻu, ʻo Muimui ʻIate Aú—Maʻá e Fakafoʻituituí mo e Ngaahi Fāmilí. Ko e taimi ʻoku fakahoko ai e Lautohi Faka-Sāpaté, te ke lava ʻo fili ke hiki fakalaka pe fakatahaʻi ʻa e ongo lēsoní.