Ko Ha Sīpinga ki he Akoʻí

ʻOku muimui ʻa e lēsoni kotoa pē ʻi he maʻuʻanga tokoni ko ʻení ʻi ha sīpinga ki he fakaafeʻi ʻo e feʻinasiʻakí mo e akoʻi ʻo e tokāteliné. ʻI he ngaahi meʻa lahi, ʻe ala femahulunaki pe hoko ʻa e ngaahi ʻelemēniti ʻo e sīpinga ko ʻení ʻi ha founga kehekehe lolotonga hoʻo faiakó. Hangē ko ʻení, fakakaukau ko e feʻinasiʻakí ko ha faingamālie ia ke akoʻi ai e tokāteliné, pea ʻoku totonu ke kau ʻi hono akoʻi ʻo e tokāteliné ha ngaahi fakaafe ke feʻinasiʻaki. Fakaʻatā ke fai ha ngaahi liliu fakanatula pē ʻi he sīpinga ko ʻení, ʻo muimui ki he ngaahi ueʻi ʻa e Laumālié ke feau e ngaahi fiemaʻu ʻa kinautolu ʻokú ke akoʻí.

Fakaafeʻi e Feʻinasiʻakí

Fakaafeʻi e kau mēmipa ʻo e kalasí ke nau vahevahe ha ngaahi ʻilo mo ha ngaahi aʻusia ne nau maʻu ʻi he uike kimuʻá, ʻi heʻenau ako fakafoʻituitui mo fakafāmili e ngaahi folofolá pea mo fakahoko e meʻa ne nau akó, ko ha konga ʻo e kalasi kotoa pē. Tokoni ke ʻilo ʻe he kau mēmipa ʻo e kalasí ko ʻenau ako fakafoʻituitui ʻi tuʻa, mavahe mei he kalasí, ʻoku mahuʻinga. ʻOku ʻikai toki maʻu pē ʻa e ului fakafoʻituitui ki he Tamai Hēvaní mo Sīsū Kalaisí, ʻi he ako he Sāpaté ka ʻi heʻenau ngaahi aʻusia fakaʻahó foki. ʻI he taimi ʻoku fefanongoʻaki ai e kau mēmipa ʻo e kalasí ki heʻenau ngaahi aʻusia mo e ngaahi fakamoʻoni kia Sīsū Kalaisi mo ʻEne ongoongoleleí, ʻoku ngalingali te nau feinga ki ha ngaahi aʻusia tatau ʻanautolu pē.

He ʻikai ke lau ʻe he taha kotoa ʻa e ngaahi vahe ki he lēsoní takitaha, pea naʻa mo kinautolu naʻa nau laú mahalo he ʻikai ke nau ongoʻi fiemālie ke vahevahe. Fakapapauʻi ʻoku ongoʻi ʻe he kau mēmipa kotoa ʻo e kalasí ko ha konga mahuʻinga kinautolu ʻo e kalasí, ʻo tatau ai pē pe ʻoku ʻi ai haʻanau meʻa ke vahevahe pe ʻikai.

Akoʻi ʻa e Tokāteliné

ʻOku totonu ke mou nofotaha pē mo e kau mēmipa hoʻo kalasí ʻia Sīsū Kalaisi mo ʻEne tokāteliné—ngaahi moʻoni taʻengata ʻo e ongoongoleleí—ʻoku maʻu ʻi he ngaahi potufolofola kuo vahe atú. ʻE lava ke tokoni atu ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke mahino lelei ange ʻa e tokāteline te ke akoʻí. ʻI hoʻo fakamatalaʻi ʻa e tokāteliné mei he ngaahi folofolá, ko e hā ha ngaahi veesi, ngaahi foʻi lea, ngaahi aʻusia, ngaahi fehuʻi mo ha Ngaahi Maʻuʻanga Tokoni Kehe te ke ala vahevahe? Te ke fakaʻaongaʻi fēfē nai e ngaahi maʻuʻanga tokoni ko ʻení ke tokoniʻi e kau mēmipa ʻo e kalasí ke nau ʻilo mo mahino kiate kinautolu e ngaahi tefitoʻi moʻoni ʻo e ongoongoleleí? Te ke tokoni fēfē ke langaki ʻenau tui ki he Tamai Hēvaní mo Sīsū Kalaisí?