Kabonganaakin Nakomai, Iriirai—Ibukin Te Reirei n Tabati

Katauraoi n Anga Reirei n te Reirei n Tabati

Te kamatebwai i bon iroum ao te utu n te mweenga e na riki bwa te nne ni botaki ibukin reiakinan te euangkerio. E koaua aio nakoim ao nakoia ake ko reireiniia. N am tai ni katauraoi n anga reirei, moanna man karekean oin am taneiai man koroboki aika tabu. Te kabanea ni kakawaki ni katauraoakim e na riki ngkana ko maiuakina te euangkerio, ukeuke inanon koroboki aika tabu, ao ni karekea ana wirikiriki te Tamnei ae Raoiroi.

Nakomai, Iriirai—Ibukiia Aomata n Tatabemaniia ao Utu bon te bwai ae kakawaki ni mwakoron am kamatebwai ibon iroum ao am katauraoi n anga reirei. E na buokiko ni kananoa mataatam ni kabwarabwaraan taian koaua iaon reirei ake a kuneaki inanon koroboki aika tabu. E na anganiko naba te kona ni kaira nanoia ao n tuangiia kaain te kiraati bwa a na kabongana Nakomai, Iriirai—Ibukiia Aomata n Tatabemaniia ao Utu ni karababa aron aia kamatebwai i bon irouia ao n aia utu iaon koroboki aika tabu (ibukin te buoka ni karaoan aei, taraa “Iango ibukin Kaungakin te Kamatebwai ni Koroboki aika Tabu Ibon Iroum ao Utu” n te bwai n ibuobuoki aei). Ngkana ko karaoia, uringa n taraa aia namakin kaain te kiraati ake tao ni waakin aia utu e na aki rangi ni boutokaki te kamatebwai ni koroboki aika tabu n te utu ao bootakin te utu n te tairiki.

N am tai ni katauraoi, ao a na roko iango ao namakin nakoim ibukiia ataei ake ko na reireiniia. Ko na karekei naba nonoori bwa a na kanga reirei ake ni koroboki aika tabu ni kakabwaiai maiuia. Ko na kairaki bwa ko na kaungaia bwa a na reiakinii reirei akanne n aia tai n reirei man koroboki aika tabu bon ibukiia.

Iango Ibukin te Anga Reirei

N am tai ni katauraoi n anga reirei, ko na kona ni karekei rakan riki kairam mairoun te tamnei man norakin waaki ni kamataata n te anga reirei n te bwai n ibuobuoki aei. Tai iangoi iango aikai bwa kaetieti aika a na iraki ma iangoi bwa iango aika a na karekea oin am iango. Ko ataiia kaain am kiraati, ao are ko na kinaiia riki n ae tamaroa inanon ami tai ni waaki n reirei n te kiraati. Te Uea e kinaiia naba, ao E na kairiko ni kawai aika tamaroa ni buokiia kaain te kiraati ni kateitei iaon reirein te euangkerio are a karaoia ni mweengaia.

E mwaiti riki bwaai n ibuobuoki riki tabeua aika a tauraoi bwa ko na kabonganai n am katauraoi, n ikotaki ma iango ake n Nakomai, Iriirai—Ibukiia Aomata n Tatabemaniia ao Utu ao ana Maekatiin te Ekaretia. Ibukin rongorongona riki iaon baikai ao tabeua bwaai n ibuobuoki, taraa te mwakoro ae atunaki n “Bwaai n Ibuobuoki Riki Tabeua” inanon te boki aei.

Bwaai aika Ko na Uringii

• E na nakoraoi riki reiakinan te euangkerio ngkana e karaoaki n te mweenga. Ngkai te tia reirei ngkoe, iai tabem ae moan te kakawaki ni boutokaia, kaungaia, ao ni katea iaoia kaain te kiraati reiakinan te euangkerio n te mweenga.

• Rairakia kaain te kiraati nakon Iesu Kristo ao Ana euangkerio e na matoatoa ngkae a mataata ao a maiuakin reirei aika koaua. Kaungaia bwa a na korei mwiin ao ni mwakuri iaon namakin ake a karekei mai iroun te Tamnei ae Raoiroi.

• Te anga reirei e riaon ae tii te kabwarabwara, ma e bon riaon naba ae ko tii kaira te marooro. Mwakoron tabem bon te kaungaia bwa a na ira buakon waakin te marooro are e karika te mataata ao e boboto iaon koroboki aika tabu. Ko riai naba n tibwauai am nonoori aika a reke mai iroun te Tamnei ngkana ko kamatebwai koroboki aika tabu.

• Uringnga bwa e mwaiti kaain te kiraati ae reke tibwangaia aika tamaroa n aia kamatebwai n te mweenga ni kibu naba ake ko na maroroakini n te kiraati. Ko kona n boutokaa aia kamatebwai ni koroboki aika a tabu man anganakia aia tai n tibwai baike a reiakin ni mweengaia.

• Tamara are i Karawa e tangiria bwa kona nakoraoi n nakoam ae te tia reirei. E a tia ni katauraoi bwaai n ibuobuoki aika a mwaiti, n ikotaki ma aia bootaki ni kauntira taan reirei. N tain te bootaki aei kam kona n reirei ma tia reirei ake tabeman iaon taian kakaewenako ake kam kaaitarai. Ko kona naba ni maroroakin ao ni maiuakin reirei n aron ana anga reirei Kristo.

• E rin raoi te reirei irouia aomata ngkana e reke aia tai n anga reirei. Ni waakin te reirei n tabetai, iangoia ni kariaia kaain te kiraati, ma te roronrikirake, bwa a na anga reirei iaon mwakoron teuana te reirei. Kabotoa te iango aio iaon kainnanoia ao aia konabwai kaain te kiraati. Ngkana ko kaoa temanna kaain te kiraati bwa e na anga reirei, karekea am tai ni buoka teuanne ke neienne ni katauraoi imwain te tai ni kabonganai iango ake a kuneaki n te bwai ni ibuobuoki aio ao inanon Nakomai, Iriirai—Ibukiia Aomata n Tatabemaniia ao Utu. Uringnga bwa ngkai ko weteaki bwa te tia reirei, ko na bon bukintaeka nakon bwaai ake a reiakinaki n te kiraati.

Te boki n ibuobuoki aio iai inanona kabwarabwaraan reirei ni katoa wiiki inanon te ririki. N Tabati tabeua are e aki boo iai te Reirei n Tabati ibukin te maungatabu ni kabuta, te maungatabu n te titeiki, ke ibukina riki tabeua, a kaungaaki kaain te kiraati bwa a na reitanako warekan Ana Boki Moomon ni mweengaia n aron bairean te wareware are e kabwarabwaraaki inanon Nakomai, Iriirai—Ibukiia Aomata n Tatabemaniia ao Utu. Ngkana e karaoaki te Reirei n Tabati, ko kona n kibara te reirei are imwina ke ko a ikoti naba ni kauoua.