Te Banna ibukin te Anga reirei

Kabwarabwara nako n te boki aei e ira te banna n te kakao n tibwatibwa ao anga te reirei. N agniin te tai, n am tai n anga reirei, bwaai aikai a kona n ikotaki ke ni waaki n teina ae kaokoro. Te katooto, iangoia bwa te tibwatibwa bon te tai n reirei iaon reirei aika tabu, ao reiakinan reirei e riai ni kaairaki ma te kakao n tibwatibwa. Kariaia bwa e na bon kona n riki te bitaki nakon te baeten aei, n ira ana kairoro te Tamnei n tobwai kainnanoia ake ko reireinia.

Kaungaa te Tibwatibwa

Inanon tain te kiraati, kaoiia kaain te kiraati n tibwa aia nonoori ao tataneiai ake a tia n reke irouia inanon wiiki aika a nako n aia tai ni kamatebwai i bon irouia ao n te utu ao karaoi nanon baike a reiakin. Buokiia kaain te kiraati n oota bwa baike a reiakin i bon irouia itinanikun te kiraati e kakawaki. Oin rairakin temanna nakon Tamara ae i Karawa ao Iesu Kristo e na roko tiaki man tii reiakinaia n te Tabati ma bon rinanon baike a riki nakoia ni katoa bong. Ngkana kaain te kiraati a ongo tataneiai ao koaua ake a tia n rinanoi i bon imarenaia iaon Iesu Kristo ao Ana euangkerio, a na tangiria riki ni kan karekea te aeka n taneiai anne i bon irouia.

Tiaki ae ni kabane a na warekii taian mwakoro ibukin te reirei teuana ma teuana, ao tao tabeman ake a warekia tao a na aki rangi ni mwengaraoi n tibwatibwa. Taraia bwa kaain te kiraati ni kabane a namakina ae iai bonganaia n te kiraati, e ngae ngke iai ke akea te bwai ae a kan tibwauaia.

Reirei te Reirei

Ngkoe ao kaain am kiraati kam na katurua ami iango iaon Iesu Kristo ao Ana reirei–koauan te euangkerio ae akea tokina—are a reke ni koroboki aika tabu ake a tia ni baireaki. Nakomai, Iriirai—Ibukiia Aomata n Tatabemaniia ao Utu e kona ni buokiko ni kaotako n te reirei are ko na anga reirei iaona. N am tai ni maroroakina te reirei man koroboki aika tabu, tera taian kibu, taeka ake a taekinaki, taneiai, titiraki, ao bwai ni ibuobuoki riki tabeua ake ko na tibwauai? Ko na kangaa ni kabonganai bwaai ni ibuobuoki aikai ni buokiia kaain te kiraati ni kunei ao ni kamataataki n reirein te euangkerio? Ko kanga ni buokiia ni katea aia onimaki iroun Tamara are i Karawa ao Iesu Kristo?