Kutumia Njoo, Unifuate—Kwa Ajili ya Shule ya Jumapili

Kujiandaa Kufundisha katika Shule ya Jumapili

Kujifunza binafsi na kama familia nyumbani kunapaswa kuwa kitovu cha kujifunza injili. Hii ni kweli kwako wewe na kwa wale unaowafundisha. Unapojiandaa kufundisha, anza kwa kuwa na uzoefu wako mwenyewe katika maandiko. Maandalizi yako muhimu zaidi yatatokea kadiri unavyoishi injili, unapopekua maandiko na kutafuta mwongozo wa kiungu wa Roho Mtakatifu.

Njoo, Unifuate—Kwa Ajili ya Watu Binafsi na Familia ni sehemu muhimu kwa kujifunza kwako binafsi na maandalizi yako ya kufundisha. Itakusaidia kupata uelewa wa kina wa kanuni za kimafundisho zinazopatikana katika maandiko. Itakuwezesha pia wewe kuwashawishi na kuwaalika washiriki wa darasa kutumia Njoo, Unifuate—Kwa Ajili ya Watu Binafsi na Familia ili kuboresha kujifunza kwao maandiko wao binafsi na kama familia (kwa msaada katika hili, ona “Mawazo ya Kuhimiza Kujifunza Binafsi na Kifamilia” katika nyenzo hii). Unapofanya hivi, kumbuka kuwa mwepesi kuona washiriki wa darasa ambao mazingira ya familia zao yanaweza yasiruhusu kujifunza maandiko kama familia na jioni ya familia nyumbani kila mara.

Wakati wa maandalizi yako, mawazo na misukumo itakujia kuhusu watu unaowafundisha. Utapokea utambuzi kuhusu jinsi kanuni katika maandiko zitakavyobariki maisha yao. Utaongozwa ili uwahamasishe kugundua kanuni hizo wakati wanapojifunza kutoka katika maandiko wao wenyewe na pamoja na familia zao.

Mawazo ya Kufundisha

Unapojiandaa kufundisha, ungeweza kupata mwongozo wa kiungu wa ziada kwa kuchunguza mihtasari ya kufundishia katika nyenzo hii. Usifikirie mawazo haya kama maelekezo ya hatua kwa hatua lakini badala yake ni kama mapendekezo ya kuchochea kupata mwongozo wako mwenyewe. Unawajua washiriki wa darasa lako na utapata kuwajua hata vizuri zaidi pale mnapojifunza pamoja darasani. Bwana anawajua pia, na atakupa mwongozo wa njia nzuri zaidi za kuwasaidia washiriki wa darasa kujenga juu ya kujifunza injili wanakokufanya majumbani mwao.

Nyenzo nyingine nyingi zinapatikana kwa ajili yako ili kuweza kutumia wakati unapojiandaa, ikiwa ni pamoja na mawazo katika Njoo, Unifuate—Kwa Ajili ya Watu Binafsi na Familia na magazeti ya Kanisa. Kwa maelezo zaidi kuhusu nyenzo hizi na zingine, ona sehemu yenye kichwa cha habari “Nyenzo za Ziada” ndani ya nyenzo hii.

Baadhi ya Mambo ya Kukumbuka

• Kujifunza Injili kunakuwa na tija zaidi wakati kitovu chake kinapokuwa nyumbani. Kama mwalimu, una wajibu muhimu wa kuunga mkono, kutia moyo, na kujenga juu ya washiriki wa darasa kujifunza injili nyumbani.

• Uongofu wa washiriki wa darasa kwa Yesu Kristo na injili Yake utaongezeka wanapoelewa na kufanyia kazi mafundisho ya kweli. Wahimize kuandika na kutendea kazi misukumo wanayopokea kutoka kwa Roho Mtakatifu.

• Kufundisha ni zaidi ya kutoa mhadhara, lakini pia ni zaidi ya kuongoza tu majadiliano. Sehemu ya wajibu wako ni kuhimiza ushiriki ambao unaadilisha na msingi wake ukiwa katika maandiko. Unapaswa pia kushiriki utambuzi wenye kushawishi ambao ulipokea pale ulipojifunza maandiko.

• Kumbuka kwamba washiriki wengi wa darasa wanapata uzoefu wa maana wanapojifunza maandiko yale yale nyumbani ambayo mtajadili darasani. Unaweza kuunga mkono kujifunza maandiko kwa kuwapa nafasi za kila mara za kuelezea wanachojifunza nyumbani.

• Baba wa Mbinguni anataka wewe ufanikiwe kama mwalimu. Ametoa nyenzo nyingi ili kukusaidia, ikiwa ni pamoja na mikutano ya baraza la walimu. Katika mikutano hii unaweza kushauriana na walimu wengine kuhusu changamoto zinazokukabili. Unaweza pia kujadili na kufanyia mazoezi kanuni za kufundisha kama Kristo.

• Watu hujifunza vizuri zaidi wanapokuwa na nafasi ya kufundisha. Mara moja moja, fikiria kuwaruhusu washiriki wa darasa, ikijumuisha vijana, kufundisha sehemu ya somo. Fanya uamuzi huu kulingana na mahitaji na uwezo wa washiriki wa darasa. Kama unamualika mshiriki wa darasa kufundisha, chukua muda kumsaidia kujiandaa mapema kwa kutumia mawazo yanayopatikana katika nyenzo hii na katika Njoo, Unifuate—Kwa Ajili ya Watu Binafsi na Familia. Kumbuka kwamba kama mwalimu aliyeitwa, unawajibika ipasavyo kwa kile kinachofundishwa katika darasa.

Nyenzo hii inajumuisha muhtasari wa kufundisha kwa kila wiki ya mwaka. Kwenye Jumapili ambayo Shule ya Jumapili haifanyiki kwa sababu ya mkutano wa kigingi au sababu nyingine yoyote, familia zinaweza kuendelea kusoma Agano Jipya nyumbani kufuatana na ratiba iliyoainishwa katika Njoo, Unifuate—Kwa Ajili ya Watu Binafsi na Familia. Wakati Shule ya Jumapili inafanyika, unaweza kuchagua kuruka somo au kuunganisha masomo mawili.