Sara i holem bebi Aesak

Sara mo Aesak i kam long Scott Snow

14–20 Febwari

Jenesis 18–23

“?Yutufala I Ting se I Gat Samting I Stap we I Strong Tumas, Mi Mi No Save Mekem?”

Taem yu stap rere blong tij, kipim long maen se plante memba blong klas, maet oli bin gat ol eksperiens blong olgeta we oli gat mining taem oli bin stap ridim Jenesis 18–23. ?Wanem nao yu save mekem blong leftemap tingting blong olgeta blong oli serem ol eksperiens ia mo ol niu tingting? Tingting blong letem ol niu tingting ia oli lidim ol storian insaed long klas.

Raetemdaon Ol Filing mo Tingting blong Yu

serem aekon

Invaetem Man blong Serem Wanem Oli Gat

Ol tes mo ol samting we oli kam traem yumi, plante taem, oli kam ol taem we oli jenisim evri samting long laef blong yumi. Jenesis 18–23 i tokbaot ol kaen taem olsem insaed long laef blong Ebraham mo Lot. Maet ol memba blong klas oli save serem wan ves we oli faenem long taem blong stadi blong olgetawan long wik ia we i tokbaot wan impoten taem long laef blong Ebraham. Oli save serem wanem oli lanem aot long hemia.

tijing aekon

Stap Tijim Doktrin

Jenesis 18:9–14; 21:1–7

Lod i mekem ol promes blong Hem oli kamtru long taem we Hem i wantem.

• Ol stori, insaed long ol ves ia, oli save givim insperesen long ol memba blong klas we oli stap askem olgetawan sapos ol promes we God i bin promesem olgeta bae oli kamtru o nogat. Blong statem wan storian insaed long klas, bae i save help blong invaetem ol memba blong klas blong luklukbak, wetem wan narawan, stori blong ol promes blong God i go long Ebraham mo Sara Jenesis 17:4, 15–22; 18:9–14 mo taem we ol promes ia oli kamtru long Jenesis 21:1–7. Long ol ves ia, ?wanem nao yu filim se i stret long yuwan? ?Wanem trutok bae yumi save karem aot long eksperiens blong Ebraham mo Sara blong save serem long wan fren we i stap lusum hop se God bae i mekem ol promes blong Hem oli kamtru? ?Wanem nara skripja o eksperiens blong yuwan nao we bae yumi save serem? (eksampol, luk long Rom 8:28; Hibrus 11; Momon 9:19–21; Doktrin mo Ol Kavenan 88:64). ?Wanem eksperiens nao ol memba blong klas oli save serem we i soem se God i bin mekem ol promes blong Hem oli kamtru insaed long laef blong olgeta? ?Olsem wanem bae yumi save holemtaet fet blong yumi taem we ol blesing we God i promesem, maet bae yumi no kasem olgeta long laef ia? (luk long Hibrus 11:8–13).

Jenesis 19:15–26

Olsem ol disaepol blong Jisas Kraes, yumi mas ronwe long fasin nogud mo yumi no mas lukbak.

• ?Wanem lesen nao yu yu filim se ol memba blong klas oli save lanem aot long ol stori blong famli blong Lod we oli stap ronwe long Sodom mo Gomora? I gat wan lesen we i stap long toktok blong Elda Jeffrey R. Holland, we i stap long “Sam Moa Risos.” Maet yu save serem wetem klas afta we yu talem sot ol samting we oli hapen we oli raetem long Jenesis 19:15–26. ?Long wanem wei nao, o long wanem situesen nao, bae samtaem yumi “lukbak” (ves 26) be yumi sapos blong luk i go fored wetem fet long Sevya? Maet ol memba blong klas oli save serem ol eksperiens we oli soemaot hamas i impoten blong no stap luk i gobak. ?Wanem nao Luk 9:62 i ademap long andastaning blong yumi abaot kaen tingting ia?

  Pikja droing blong Lot mo famli blong hem we oli stap ronwe long Sodom mo Gomora

  Stap Ronwe long Sodom mo Gomora, i kam long Julius Schnorr von Carolsfeld

Jenesis 22:1–14

Fasin ia, we Ebraham i glad blong givim Aesak olsem sakrifaes, i semmak olsem God mo Pikinini blong Hem.

• Stori blong Ebraham we i stap givim pikinini blong Hem olsem wan sakrifaes i save tijim yumi abaot sakrifaes blong Papa long Heven we Hem i givim Pikinini blong Hem. Wan wei blong luklukgud insaed long stori ia, i blong givim wok long haf blong klas blong tingting hevi long Jenesis 11:1–14 wetem lukluk we i kam long Ebraham mo God Papa, mo nara haf blong klas i tingting hevi long stori ia wetem lukluk blong Aesak mo Jisas Kraes. Askem ol memba blong klas blong serem wanem niu tingting oli bin kasem. Speseli, ?wanem nao ol memba blong klas oli lanem we i mekem se oli gat bigfala moa fasin blong talem tangkyu long Papa long Heven mo Jisas Kraes? Olsem pat blong toktok storian insaed long klas, yu save soem pikja blong Ebraham we I Tekem Aesak olsem Sakrifaes (Gospel Art Buk, namba 9) o soem vidio ia we i stap long Inglis: “Akedah (The Binding)” (ChurchofJesusChrist.org).

additional resources icon

Sam Moa Risos

“Fet, oltaem i poen i go fored i go long fiuja.”

Elda Jeffrey R. Holland i tijim:

“Hem i posibol blong waef blong Lot i bin lukluk i gobak wetem harem nogud agensem Lod from samting ia we Hem i bin stap askem hem blong lego i stap biaen. … So, i no nomo from se hem i lukluk i gobak; hem i bin lukluk i gobak wetem wan tingting long hat blong hem. Long sot toktok, hem i hang strong long laef blong hem we i pas finis, mo hemia i bin moa hevi bitim tras blong hem long fiuja. …

“ … Mi plis long yufala blong yufala i no stastap wetem ol dei we oli pas finis, mo no stap wantem tumas wanem we i blong yestedei, nating se ol yestedei ia oli bin gud tumas. Ol samting blong bifo, oli blong yumi lanem samting aot long hem, be i no blong yumi stap laef insaed long hem. Yumi lukbak blong karem ol jakol we oli laetem ol eksperiens we oli laef i stap, be i no blong karem ol asis. Mo taem yumi lanem wanem we yumi nid blong lanem mo tekem wetem yumi wanem i bes we yumi bin gotru long hem, nao yumi lukluk i go long fored, yumi tingbaot se fet, oltaem i poen i go fored i go long fiuja. …

“… [Waef blong Lot] i no bin gat fet. Hem i bin gat tu tingting long paoa blong Lod blong givim hem wan samting we i gud moa we i bitim wanem we hem i bin gat finis. I luk se, hem i bin ting se i no gat wan samting we i stap long fored we i save gud moa bitim wanem hem i bin stap lego i stap biaen. …

“ … blong stastap wetem wanem we i bin hapen long laef bifo, we i tekem ol mistek blong yumi tu, !i jes no raet nating! Hem i no gospel blong Jisas Kraes” (“The Best Is Yet to Be,” Ensign, Jan. 2010, 24, 26–27).

Stap Kam Antap long Fasin blong Yumi blong Stap Tij

Ol Blesing we Hem I Promesem. Taem yu stap invaetem olgeta we yu stap tijim blong tekem aksen folem wanem we oli stap lanem, testifae tu abaot ol blesing we God i bin promesem long olgeta we oli stap mekem hemia. (Luk tu long Teaching in the Savior’s Way, 35.)