Noa, famli blong hem, ol animol, bigfala sip, mo wan renbo

Pikja droing blong Noa we i stap lego bigfala sip, i kam long Sam Lawlor

31 Jenuware–6 Febwari

Jenesis 6–11; Moses 8

“Noa I Kasem Gladhat long Ae blong Lod”

Aotlaen ia i tokbaot gud ol prinsipol we oli faenem long Jenesis 6–11 mo Moses 8, be ol prinsipol ia i no olgeta prinsipol ia nomo we yu save lukluk moa long hem taem yu stap tij. Trastem ol strong tingting mo filing long saed blong spirit we yu kasem taem yu stap stadi long ol skripja.

Raetemdaon Ol Filing mo Tingting blong Yu

serem aekon

Invaetem Man blong Serem Wanem Oli Gat

Tingting blong askem ol memba blong klas blong oli serem wan mesej long saed blong spirit blong taem blong yumi aot long stori blong Noa o Taoa blong Babel. Leftemap tingting blong olgeta blong serem wan skripja we i sapotem mesej ia.

tijing aekon

Stap Tijim Doktrin

Jenesis 6-8; Moses 8

I gat sefti long saed blong spirit taem yumi stap folem profet blong Lod.

• Ol rabis fasin long ol taem blong Noa i save rimaenem yumi long ol rabis fasin we yumi stap luk raon long yumi tedei. Yu save raetem Ol Woning mo Ol Samting We I Mekem Maen I Kwaetlong bod blong helpem ol klas memba oli kasem ol gudfala samting aot long ol lesen insaed lon stori blong Noa, Ol klas memba oli save luklukbak long Jenesis 6–8 o Moses 8:13–30 mo faenem wan samting we oli filim se i wan impoten woning blong taem blong yumi mo wan samting we oli ting se i save mekem maen i kwaet (luk tu long “Sam Moa Risos”). Oli save raetem wanem we oli faenem andanit long stret taetol long bod. ?From wanem stori blong Noa i gat valiu long yumi tedei?

Jenesis 9:8–17

Ol samting o ol saen oli helpem yumi blong tingbaot ol kavenan blong yumi wetem Lod.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong ridim Jenesis 9:8–17 mo tingting hevi long olsem wanem ol saen o samting i save stap olsem ol rimaenda abaot ol kavenan blong yumi. Blong helpem ol klas memba blong serem ol tingting blong olgeta, maet bae yu wantem blong karem sam samting we i rimaenem yumi long ol impoten samting i kam long klas—olsem wan ring blong mared, wan flag blong wan kantri, o wan misinari nem tag—mo komperem wetem “saen” blong renbo. ?Wanem nao Josef Smit Translesen, Jenesis 9:21–25 (insaed long Baebol apendiks) i tijim yumi abaot saen ia? ?Olsem wanem nao, Papa God i yusum ol samting o saen blong helpem yumi blong tingbaot ol kavenan blong yumi?

Jenesis 11:1–9

Wei ia nomo blong kasem heven i blong stap folem Jisas Kraes.

• Stori blong ol pipol blong Babel we oli stap bildim wan taoa i givim wan intresting fasin blong komperem samting wetem stori blong Inok wetem ol pipol blong hem we oli stap bildim Saeon, we ol memba blong klas i bin stadi long hem long las wik. Tugeta grup blong ol pipol i stap traem blong kasem heven, be long ol defren wei. Maet yu wantem blong invaetem ol klas memba blong mekem lis blong eni samting we oli tingbaot abaot ol pipol blong Saeon long bod (luk long Moses 7:18–19, 53, 62–63, 69) mo wanem oli lanem aot long Jenesis 11:1–9 mo Hileman 6:26–28 abaot ol pipol blong Babel. ?Wanem ol samting we oli defren we oli faenem? ?Wanem nao hemia i tijim yumi abaot ol hadwok blong yumiwan blong gobak stap wetem God?

  taoa blong Babel

  Pikja droing blong Taoa blong Babel, i kam long David Green

• Olfala siti blong Babel i nomo gat, be hae tingting mo fasin blong wol we hem i ripresentem i stap yet. Blong helpem ol klas memba oli praktisim ol samting we oli lanem aot long ol lesen blong Taoa blong Babel long laef blong olgeta, stat blong invaetem olgeta blong luklukbak long Jenesis 11:1–9. Afta yu save serem ol pis pepa mo invaetem ol klas memba blong raetem ol samting we ol man oli stap mekem we i stap karemaot olgeta longwe long God; afta, long ol nara pis pepa, oli save raetem ol samting we ol man oli stap mekem we i stap mekem olgeta i kam moa kolosap long God. Maet bae ol yut oli laekem blong putum gud ol fas grup blong pepa long bod long sep blong wan taoa mo afta nambatu grup blong ol pepa long sep blong wan tempol. ?Wanem nao God i bin givim blong helpem yumi blong go kasem long heven? (Jenesis 11:4; luk tu long Jon 3:16). Maet yu save singsing wan hym long topik ia, olsem “Nearer, My God, to Thee” (Hymns, no. 100).

sam moa risos aekon

Sam Moa Risos

Ol Lesen we Oli Kam long Noa

Presiden Henry B. Eyring i talem:

“Blong yumi stap minim blong no tekem kaonsel blong profet, i mekem se yumi no gat tumas paoa blong tekem kaonsel we i kam tru long insperesen long fiuja. Bes taem blong disaed blong helpem Noa blong bildim wan bigfala sip i long fas taem ia nao we Hem i askem. Evri taem we hem i bin askem afta long hemia, evri taem we bae i no folem, bae i mekem se Spirit i no save gohed blong stap. Mekem se, evri taem we hem i askem, i olsem se hem i krangke i stap, i kasem we ren i kam. Mo afta, i let tumas.

“Evri taem long laef blong mi, taem mi bin jusum blong pulum taem blong mi blong stap folem kaonsel we i kam tru long insperesen o taem mi disaed se i oraet blong mi nomo blong no folem kaonsel ia, mi kam blong save se mi bin putum miwan long denja. Evri taem we mi bin lisin, filim we oli konfemem long mi tru long prea, mo afta folem ol kaonsel blong ol profet, mi bin faenem se mi bin muv i go kolosap long sefti” (“Finding Safety in Counsel,” Ensign, May 1997, 25).

?From wanem God i sendem Bigfala Ren We I Draonem Ol Samting?

Sam pipol oli stap askem olgetawan abaot jastis blong God taem Hem i sendem bigfala ren we i draonem ol samting blong “spolem ol man” (Jenesis 6:7). Elda Neal A. Maxwell i bin eksplenem se, long taem blong Bigfala Ren We I Draonem Ol Samting, “korapsen i bin kasem wan poen we i spolem fridom blong joes, mo oli no save sendem ol spirit i kam long wol tru long jastis” (We Will Prove Them Herewith [1982], 58).

Stap Kam Antap long Fasin blong Yumi blong Stap Tij

Givim taem blong tingting hevi. Ol gudfala kwestin i nidim blong oli tingting hevi, lukaotem, mo kasem tru long insperesen. Givim sam minit long ol memba blong klas blong oli tingting hevi long wan kwestin bifo oli stat blong askem ol ansa. (Luk long Teaching in the Savior’s Way, 31–34.)