Lavlavem Wanwan long Yumi, i kam long Emma Donaldson Taylor

24–30 Jenuware

Moses 7

“Lod I Bin Singaotem Pipol blong Hem, Saeon”

Taem yu stap stadi long Moses 7, tingting long ol pipol we yu stap tijim mo olsem wanem yu save helpem olgeta blong oli andastanem wanem nao japta ia i stap tijim abaot Saeon, mo ol nara prinsipol blong gospel.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Samtaem wan simpol kwestin, mo sam minit nomo blong tingting hevi, i inaf blong helpem ol pipol blong oli serem wanem we oli stap lanem long hom. Maet yu save givim sam smol taem long ol memba blong klas blong luklukbak long Moses 7, faenem wan ves we i mekem olgeta oli filim blong talem tangkyu from ol trutok ia we oli putumbak insaed long buk blong Moses, mo afta, serem olgeta.

Stap Tijim Doktrin

Moses 7:16–21, 27, 53, 62–69

Yumi save bildimap Saeon long taem blong yumi tedei.

• ?Wanem nao bae i bes wei blong presentem aedia ia blong Saeon insaed long klas blong yu? Wan aedia, hem i blong kasem ol memba blong klas long taem blong wik ia, bifo long klas, mo invaetem olgeta blong oli karem wan samting i kam, we i kam long hom, we i ripresentem ol stret fasin blong ol pipol blong Saeon, olsem we oli tokbaot insaed long Moses 7:18. Taem yufala i stap toktok raon long ves ia tugeta, ol memba blong klas oli save eksplenem mining blong samting ia we oli tekem i kam.

  

  Yumi mas traehad blong “gat wan hat mo wan maen” ( Moses 7:18).

• Vidio ia: “We Come Together and Unite as One” (ChurchofJesusChrist.org) i save helpem yu blong statem wan toktok storian abaot wei we yumi save “gat wan hat mo wan maen” (Moses 7:18) insaed long ol wod mo ol famli blong yumi. Tingting blong askem ol memba blong klas blong oli tingting abaot ol taem we oli bin filim yuniti insaed long ol famli blong olgeta mo long semtaem oli stap givim seves long ol narawan insaed long Jos o long komuniti. ?Wanem nao ol pipol oli stap mekem blong krietem yuniti long ol situesen ia? ?Wanem nao yumi stap lanem abaot Saeon mo yuniti aot long Moses 7? (luk speseli long ol ves 16–21, 27, 53, 62–69). Hemia sam narafala skripja we oli save help: Filipae 2:1–4; 4 Nifae 1:15–18; Doktrin mo Ol Kavenan 97:21; 105:5.

Moses 7:28–44

God i stap krae from ol pikinini blong Hem.

• Sam pipol oli stap luk se God i wan man we i stap longwe, oli no save go kolosap long Hem, mo i no save kea. ?Olsem wanem yu save yusum visen blong Inok blong helpem klas blong yu i andastanem se God i stap insaed long ol laef blong yumi, mo Hem i stap kea long yumi? Yu save invaetem ol memba blong klas blong oli ridim Moses 7:28–44 mo oli mekem wan lis blong sam long ol risen we God i bin stap krae. ?Wanem nao ol ves ia oli stap tijim yu abaot wei we God i stap filim abaot ol pikinini blong Hem? Ol toktok insaed long “Sam Moa Risos” i save givim sam moa tingting long taem blong toktok insaed long klas.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim sam tingting blong stap tingting hevi long wanem Moses 7:28–31, 35 i stap tijim abaot God. Olgeta we oli bin mekem hemia long hom, maet bae oli glad blong serem ol tingting blong olgeta wetem klas. O yu save invaetem ol memba blong klas blong oli tingting hevi long ol ves ia mo blong oli toktok raon long olgeta ves ia insaed long klas.

Moses 7:59–67

Lod bambae i kambak bakegen long ol las dei.

• ?Olsem wanem yu save helpem ol memba blong klas blong oli faenem wanem we Moses 7:59–67 i stap tijim abaot Seken Kaming blong Sevya? Mebi yu save putum long wan lis, tu o tri trutok o samting we i bin hapen aot long ol ves ia, i go long bod, mo afta, askem ol memba blong klas blong luklukgud insaed long ol ves ia mo ademap moa i go long lis. ?From wanem hem i wan blesing blong gat histri blong visen blong Inok—wan long ol fasfala profesi abaot Seken Kaming?

Sam Moa Risos

God i stap krae from ol pikinini blong Hem.

Elda Jeffrey R. Holland i tijim:

“Long medel blong wan bigfala visen abaot ol man, we heven i bin openem blong hem i luk, Inok, i bin stap luk tugeta ol blesing mo ol jalenj blong laef long wol ia, i tanem hem i luk Papa mo i sapraes blong luk Hem i stap krae. Hem i talem, wetem bigfala sapraes, long bigfala hae Man ia we i gat evri paoa long yunives: ‘?olsem wanem nao i save hapen se yu yu krae?’ …

Hem i lukluk long ol samting we oli stap hapen kolosap long eni dei, nao God i ansa: ‘Luk olgeta brata blong yu; oli wanem we mi wokem long han blong mi, m. … Mi bin givim komanmen long olgeta tu, se oli mas lavlavem olgeta bakegen, mo se bae oli mas jusum mi, Papa blong olgeta; be luk, oli no gat lav, mo oli no laekem nating stret bladlaen blong olgeta. … ?olsem wanem? ?Bae ol heven oli no save krae taem bae oli luk se olgeta ia bae oli safa?’ [Moses 7:29–33, 37].

“Taem ia, we i hapen wan taem ia nomo, i mekem plante moa blong tijim stret fasin blong God bitim eni kaen tingting we man i save givim. … !Hemia i no wan gudfala pikja blong God we i gat abaot laef blong yumi! !Bambae i gat bigfala wari long wan papa o mama sapos ol pikinini we oli no jusum Hem o ‘gospel blong God’ we Hem i sendem [Rom 1:1]. !Hem i isi tumas blong lavem wan we i stap lavem yumi evriwan!’ (“The Grandeur of God,” Liahona, Nov. 2003, 72).

Stap Kam Antap long Fasin blong Yumi blong Stap Tij

Leftemap tingting blong ol memba blong klas blong oli stadi long ol skripja long hom. Wan wei we yu save leftemap tingting blong gat skripja stadi long hom, hem i blong givim taem long ol memba blong klas blong serem ol samting we oli faenem mo ol niu tingting we oli bin kasem aot long skripja stadi blong olgetawan mo famli stadi. (Luk long Teaching in the Savior’s Way, 29