Adam mo Iv, i kam long Douglas Fryer

10–16 Jenuware

Jenesis 3–4; Moses 4–5

Foldaon blong Adam mo Iv

Taem yu stap rere blong tijim Jenesis 3-4 mo Moses 4–5, tingbaot wanem kwestin o aktiviti bae i save helpem ol memba blong klas blong andastanem moa Foldaon blong Adam mo Iv.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Ol memba blong klas oli save luklukbak, blong sot taem, long Jenesis 3–4 o Moses 4–5; afta oli save jusum wan ves we i kamaot klia long olgeta, mo oli serem ves ia wetem wan we i sidaon kolosap long hem. Afta, sam nomo oli save serem wan niu tingting we oli kasem, wetem klas.

Stap Tijim Doktrin

Moses 4:1–13; 5:1–12

Yumi nidim blong gat fridom blong mekem joes, mo samting we i kam agensem yumi blong yumi save groap, o kam antap.

• From fridom blong mekem joes i stap—we i raet ia we God i bin givim blong mekem ol joes—nao hem i wan stamba pat blong laef long wol ia, mo samtaem, yumi tekem i nating nomo. Blong mekem se ol memba blong klas oli gat moa bigfala tangkyu from presen ia, oli save ridim mo toktok raon long Moses 4:1–4. ?Wanem nao ol ves ia oli stap tijim yumi long hem long saed blong hamas, fridom blong mekem joes, i impoten? ?From wanem plan blong God bae i go lus nomo sapos yumi no gat fridom blong mekem joes? Kwot ia insaed long “Sam Moa Risos” i save givim sam moa tingting.

• Maet ol memba blong klas oli bin stadi long mesej blong Presiden Dallin H. Oaks: “Fasin blong Agens long Saed blong Evri Samting” (Jeneral Konfrens, Epril 2016, Churchofjesuschrist.org/general-conference/conferences?lang=bis) olsem pat blong wanwan stadi o famli stadi blong olgeta long wik ia. Long taem blong wik, yu save tingting blong invaetem samfala pipol oli kam, we oli rere blong serem wan samting aot long mesej ia blong hem, we i bin helpem olgeta blong andastanem Foldaon blong Adam mo Iv (speseli luk long ol seksen I mo II). ?From wanem Papa long Heven i letem yumi blong go tru long “fasin blong agens long saed blong evri samting”? 2 Nifae 2:11–16). Maet yu save invaetem ol memba blong klas blong oli ridim Doktrin mo Ol Kavenan 29:39–40 mo toktok raon long from wanem ol temtesen blong Setan i nid blong stap insaed long plan blong God. ?Olsem wanem nao Papa long Heven mo Jisas Kraes oli stap helpem yumi taem yumi stap fesem temtesen?

  

  Stap Aot long Iden, i kam long Annie Henrie Nader

Moses 4:4–12; 5:13–33

Setan i stap lukaot blong “trikim mo mekem [yumi] blaen.”

• Moses 4:4–12; 5:13–33 i save helpem ol memba blong klas blong faenem sam wei we Setan i stap yusum blong temtem yumi blong mekem rabis samting. Yu save askem wan haf blong klas blong ridim Moses 4:4–12 mo nara haf blong ridim Moses 5:13, 18–33. Taem we oli stap rid, oli save raetem long lis, sam wei we Setan i bin traem blong temtem Adam mo Iv, wetem ol pikinini blong tufala. ?Olsem wanem nao hem i stap traem ol semfala samting ia long yumi? ?Olsem wanem Papa long Heven i helpem yumi blong stap strong agensem ol giaman blong Setan?

Jenesis 3:1–7; Moses 4:22–31; 5:4–15

Atonmen blong Jisas Kraes i givim hop mo fasin blong pemaot man long Foldaon ia.

• Moa yumi andastanem wanem nao Foldaon i mekem, moa bae yumi save gat moa tangkyu from Atonmen blong Jisas Kraes. Ol memba blong klas oli save lukaotem wanem nao ol risal blong Foldaon insaed long Jenesis 3:1–7; Moses 4:22–31 mo mekem wan lis blong wanem oli faenem, antap long bod. Oli save luklukgud insaed long Moses 5:4–12, 14–15 blong lanem moa abaot plan ia blong God blong Hem i pemaot yumi aot long ol risal blong hem 2 Nifae 2:19–25; Alma 12:22–34) mo raetem wan lis blong wanem we oli faenem antap long bod. Mo tu, oli save serem wanem i pusum tingting blong olgeta taem oli ridim ol testemoni blong Adam mo Iv abaot Jisas Kraes, we oli save faenem insaed long ol ves 10–12. ?Olsem wanem nao yumi stap filim abaot plan ia blong God afta we yumi ridim ol skripja ia?

• Stori blong Adam mo Iv, long saed blong hop mo fasin blong pemaot man, i save leftemap tingting blong ol memba blong klas long taem we laef i had. Tingting blong invaetem olgeta blong faenem ol toktok mo ol sentens we oli stap long Moses 5:7–12 we i tokbaot hop we Adam mo Iv i bin gat taem we tufala i bin lanem se Sevya i save pemaot tufala. ?Wetaem nao yumi bin filim wan hop we i semmak long wanem we Adam mo Iv, tufala i bin filim? Tingting blong invaetem ol memba blong klas blong oli serem ol fevret hym we oli stap tokbaot hop we i kam tru long Atonmen blong Sevya. Yufala i save singsing sam moa singsing tugeta.

Sam Moa Risos

Yumi save mekem joes blong yumiwan.

Elda Dale G. Renlund i bin tijim:

Gol blong Papa blong yumi long Heven long saed blong stap papa mo mama, i no blong gat ol pikinini we oli mekem wanem we i raet; hem i blong gat ol pikinini blong Hem oli jusum blong mekem wanem we i raet, mo long en, blong kam olsem Hem. Sapos Hem i wantem stap obei nomo, bae Hem i yusum ol kwik praes mo panismen blong lidim ol aksen blong yumi.

“Be God i no intres blong ol pikinini blong Hem oli kasem tijing mo oli stap olsem ol “animol blong haos” we oli stap obei nating nomo, we bae oli no kakae savat blong Hem long living rum blong selestial ples. No. God i wantem ol pikinini blong Hem blong groap long saed blong spirit mo joenem Hem long famli bisnis.” (“Naoia Yufala I Mas Jusumaot,” Liahona, Nov. 2018, 104).

Stap Kam Antap long Fasin blong Yumi blong Stap Tij

Mekem ol memba blong klas oli tekpat moa long klas. Yufala i save mekem fulap aktiviti olsem wan klas, o ol smol grup, o tutu. yusum ol defren wei blong tij blong save letem ol pipol oli tekpat, mo sapos i no olsem, bae oli no save tekpat. (Luk long Teaching in the Savior’s Way, 33–34.)