Moa Gud Bitim Paradaes, i kam long Kendal Ray Johnson

17–23 Jenuware

Jenesis 5; Moses 6

“Yu Tijim Olgeta Samting long Ol Pikinini blong Yu”

Bifo yu ridim eni moa samting, ridim mo tingting hevi long Jenesis 5 mo Moses 6, mo raetemdaon wanem filing mo tingting long saed blong spirit, we oli kam long yu. Kam Folem Mi—Blong Wanwan Man, Woman mo Famli mo aotlaen ia i save givim sam aedia abaot wei blong helpem olgeta we yu stap tijim blong oli faenem ol trutok we oli save helpem olgeta.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

?Wanem nao bae yu mekem blong invaetem ol memba blong klas blong serem wanem we oli bin lanem taem we oli bin stadi long Jenesis 5 mo Moses 6? Yu save raetem ol nem ia, Adam mo Inok long bod mo invaetem ol memba blong klas blong raetem wan samting we wan long olgeta profet ia i bin mekem o tijim we i gat mining long olgeta.

Stap Tijim Doktrin

Moses 6:26–39

Lod i singaotem yumi blong mekem wok blong Hem i nomata wanem we yumi no save mekem.

• I gat wan gudfala janis i stap we, wan insaed long klas blong yu, i bin filim—o i stap filim—we hem i no naf, o i no save mekem wan responsabiliti long hom o long jos. Blong bildimap fet blong ol memba blong klas, se bae Lod i save helpem olgeta, yu save invaetem olgeta blong ridim eksperiens blong Inok we i stap long Moses 6:26–39. ?Olsem wanem nao God i bin helpem Inok blong mekem wok blong Hem i nomata long ol fraet blong Inok. Askem ol memba blong klas blong oli tingting long sam nara eksampol blong ol pipol we oli bin winim wiknes blong olgeta mo oli bin mekem wok ia blong Lod, we oli kam blong save tru long ol skripja, o long laef blong olgetawan. ?Wanem eksampol nao yumi save serem? (Luk tu long Eksodas 4:10–16; Jeremaea 1:4–10; 2 Nifae 33:1–4; Ita 12:23–29).

• Plante long ol aposol mo profet blong tedei, oli bin talem ol wari blong olgeta we oli semmak long hemia blong Inok taem oli i bin tokbaot olsem wanem oli i bin harem taem oli i bin kasem koling blong olgeta. Ol eksperiens ia blong olgeta, i save mekem se ol memba blong klas oli kam blong andastanem moa abaot Moses 6:26–39. Tingting blong luklukbak tu long vidio ia: “On the Lord’s Errand: The Life of Thomas S. Monson” (ChurchofJesusChrist.org; bitwin ol minit ia: 35:46 mo 39:40) o wan toktok we i kam long wan long ol niufala memba blong Kworom blong Olgeta Twelef Aposol (eksampol luk long ol testemoni blong Elda Ronald A. Rasband, Elda Gary E. Stevenson, mo Elda Dale G. Renlund [Liahona, Nov. 2015, 89–94]). Letem ol memba blong klas oli serem wanem Spirit i bin talem long olgeta long saed blong ol eksampol ia. ?Wanem nao yumi save lanem aot long ol lida ia abaot ol filing blong yumiwan abaot fasin blong no save mekem samting? Toktok we i kam long Presiden Thomas S. Monson we i stap long “Sam Moa Risos” i save helpem toktok storian insaed long klas.

Moses 6:48–65

Fet, fasin blong sakem sin, baptaes, mo fasin blong kasem Tabu Spirit, oli stap mekem yumi rere blong gobak stap wetem God.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong ridim Moses 6:48–62 blong faenemaot wanem wanwan i mas save mo mekem bifo hem i pemaot ol man. Maet ol memba blong klas oli save serem samfala tingting we oli kamaot long stadi blong olgeta insaed long hom blong olgeta. O, yufala i save toktok raon long Moses 6:48–62 tugeta, insaed long klas. ?Olsem wanem bae yumi ansa long wan we i stap askem se from wanem fet, fasin blong sakem sin, baptaes, mo blong kasem presen we i Tabu Spirit, i wan mas? ?Olsem wanem nao Lod i stap ansarem kwestin ia long ol ves 53–65, mo wanem blong mekem blong lanem samting aot long ansa ia?

  

  Papa mo mama, tufala i mas tijim gospel long ol pikinini blong tufala.

Moses 6:51–63

“Yu tijim olgeta samting long ol pikinini blong yu.”

• Long Moses 6:51–63, yumi stap lanem abaot ol trutok blong gospel we Lod i bin tijim long Adam mo i bin askem hem blong tijim long ol fiuja jeneresen. Maet ol memba blong klas oli save mekem wan lis blong ol trutok ia taem oli stadi long ol smol grup blong ol ves, olsem ol ves 51–52, 53–57, 58–60, 61–63. ?From wanem ol trutok ia oli impoten tumas long jeneresen we i stap kam antap tedei? ?Wanem nao yu wantem ol yang pipol blong oli save abaot Sevya, aot long ol ves ia? Maet bae ol memba blong klas oli glad blong serem samfala aedia o eksperiens blong helhelpem wanwan long olgeta blong oli tijim ol trutok ia, long wan wei we i wok gud moa, long ol pikinini mo ol yut. ?Wanem moa yumi save lanem aot long ol instraksen blong Lod we i go long ol papa mo mama insaed long Mosaea 4:14–15 mo Doktrin mo Ol Kavenan 68:25–28; 93:40–50?

• Blong ademap long wanem Moses 6 i stap tijim abaot responsabiliti blong ol papa mo mama blong stap tijim ol pikinini blong olgeta, yu save invaetem ol memba blong klas blong wajem wan o moa long wan long olgeta vidio ia: “Parenting: Touching the Hearts of Our Youth,” “Proclamation Series: Children,” o “Mother in Israel” (ChurchofJesusChrist.org). ?Wanem nao yumi lanem aot long ol vidio ia abaot fasin blong stap tijim gospel long ol pikinini blong yumi? Sapos yu stap tijim ol yut, yu save invaetem olgeta blong serem olsem wanem oli save sapotem ol papa mo mama blong olgeta long ol hadwok blong olgeta blong stap tijim gospel long hom.

Sam Moa Risos

“Huia Lod i singaotem hem, Lod i mekem hem i kwalifae, o i fit long wok ia.”

Presiden Thomas S. Monson i bin tijim: “Sam long yufala, i gat fasin blong semsem, o tingting we yufala i no save mekem samting blong save talem yes long wan koling. Tingbaot se wok ia, i no wok blong yu, o wok blong mi miwan. “Hem i wok blong Lod, mo taem yumi stap mekem wok blong Lod, yumi gat raet blong kasem help we i kam long Lod. Tingbaot se huia Lod i singaotem hem, Lod i mekem hem i kwalifae, o i fit long wok ia.” (“Duty Calls,” Ensign, May 1996, 44).

Stap Kam Antap long Fasin blong Yumi blong Stap Tij

Tabu Spirit i tija. Rol blong yu olsem tija, i impoten, be tingbaot se Tabu Spirit nao i ril tija. Helpem ol memba blong klas blong oli lanem samting aot long Spirit mo serem wetem wanwan long yumi wanem we oli lanem.