27 Disemba–2 Jenuware

Moses 1; Ebraham 3

“Hemia I Wok mo Glori blong Mi”

Taem yu stap ridim Moses 1 mo Ebraham 3, kipim maen mo hat blong yu i stap open oltaem blong kasem insperesen we i kam long Spirit. Bae Hem i givim insperesen long ol tingting mo aedia blong yu we bae i helpem yu blong rere blong tij.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Maet ol memba blong klas blong yu oli bin gat sam naesfala eksperiens taem oli stap ridim Moses 1 mo Ebraham 3 long hom. ?Olsem wanem nao bae yu save givim ol janis long ol klas memba blong oli serem ol eksperiens ia? Maet bae i simpol nomo, olsem blong askem ol kwestin olsem olgeta ia: ?Wanem i bin mekem yu glad taem yu stap ridim ol skripja long wik ia? ?Wanem nao i bin sapraesem yu? ?Wanem i bin mekem yu stop mo tingting? ?Wanem i bin helpem yu blong filim moa kolosap long Papa blong yu long Heven mo Jisas Kraes?

Stap Tijim Doktrin

Moses 1:1–10, 37–39; Ebraham 3:22–26

Olsem ol pikinini blong God, yumi gat wan tabu stamba tingting long wol ia.

• Ol trutok we i kamaot long visen blong Moses mo Ebraham i save gat wan strong paoa long ol joes blong yumi mo paoa blong yumi blong winim ol jalenj blong laef. ?Olsem wanem yu save helpem ol memba blong klas blong yu blong faenemaot ol trutok ia long Moses 1 mo Ebraham 3? Wan aedia, hem i blong serem klas long ol grup, mo asaenem wanwan grup wan long olgeta skripja ia: Moses 1:1–10; Moses 1:37–39; Ebraham 3:22–26. Wanwan grup i save lukaotem ol ansa long ol kwestin olsem “?Huia mi?” “?From wanem mi stap ia?” mo “?Huia nao God i wantem mi blong kam olsem?” Afta long wan taem we inaf, ol grup i save serem ol ansa blong olgeta. ?Olsem wanem ol ansa ia oli gat paoa long ol evri dei aksen blong yumi?

  

  Kraes mo Kriesen, i kam long Robert T. Barrett

Moses 1:12–23

Yumi save go agensem paoa blong Setan.

• Taem ia we Moses i fesem Setan, we oli tokbaot long Moses 1:12–23, i givim ol lesen we oli save helpem ol memba blong klas blong yu taem oli stap fesem ol temtesen, o ol trik blong enemi. ?Wanem nao yumi save lanem aot long wanem Moses i bin mekem? Vidio ia, “I Am a Son of God” (ChurchofJesusChrist.org) i save helpem ol memba blong klas blong toktok raon long wan long ol teknik blong Setan—we i temtem yumi blong gat tu tingting long ol eksperiens we yumi stap gat long saed blong spirit (luk tu long “Sam Moa Risos”). Hemia bae i save gat mining sapos ol memba blong klas oli serem ol aedia mo ol toktok blong leftemap tingting blong stap helpem wanwan long yumi blong luksave mo stanap agensem ol hadwok blong Setan.

• Wan lesen we i kamaot long eksperiens blong Moses, i we Setan i stap temtem yumi wetem ol giaman kopi blong trutok mo paoa blong God. Blong helpem ol memba blong klas oli kasem wan pikja abaot hemia, yu save tekem samfala samting we oli wan kopi blong wan nara samting, olsem wan giaman flaoa, o wan bebi doli. ?Olsem wanem yumi save talem se olgeta ia oli ol giamanwan? ?Wanem nao sam giaman samting we Setan i stap yusum tedei blong temtem yumi? ?Olsem wanem yumi save luksave olgeta mo sakemaot olgeta? (Blong lanem olsem wanem Moses i bin mekem hemia, luk long Moses 1:13–18.) ?Olsem wanem nao Lod i stap helpem yumi long ol hadwok blong yumi? (Luk long Moses 1:24–26).

Ebraham 3:22–28

Laef ia i janis blong yumi, blong soem we bambae yumi mekem wanem we God i givim oda long yumi blong mekem.

• ?Olsem wanem yu save helpem ol memba blong klas blong luk laef blong olgeta olsem wan janis blong pruvum se oli fetful long ol oda o komanmen blong God? Maet bae yu save stat blong askem olgeta blong tokbaot ol eksperiens blong wan taem we oli mas soem se oli gat skil long saed blong wan samting—eksampol, long skul, long wok, o insaed long tim blong resis. Oli save tokbaot tu wanem oli bin nidim blong mekem blong save pruvum olgeta. ?Olsem wanem ol eksperiens ia oli semmak long wanem we i stap long Ebraham 3:24–26? ?Long wanem wei nao ol eksperiens ia oli no semmak? ?Olsem wanem nao yumi putum Papa long Heven mo Sevya insaed long ol hadwok blong yumi blong yumi “pruvum” yumiwan? (Ebraham 3:25). ?Olsem wanem nao we, blong save se yumi stap long ples ia blong yumiwan yumi pruvum se bae yumi obei i jenisim wei we bae yumi fesem ol jalenj blong laef?

• ?Wanem moa yumi lanem aot long Ebraham 3:22–28 long saed blong laef bifo laef long wol ia, o “fasfala laef” blong yumi? (ves 26). ?From wanem ol trutok ia oli impoten tumas long yumi?

Sam Moa Risos

Yu no gat tu tingting long wanem we Lod i stap talemaot long yu tru long revelesen.

Elda Jeffrey R. Holland i tijim hemia abaot eksperiens we Moses i bin gat long Moses 1: “Mesej blong Moses i go long yu tedei hem i: Yu no mestem blong no stap lukaot. Yu no ting se wan bigfala revelesen, sam taem we yu kasem bigfala laet, wan rod we yu faenem tru long insperesen we i jes open long fored blong yu, i en blong evri samting. … Taem we yu kasem moa laet, lukaot long temtesen ia blong kamaot long wan gudfala samting. Sapos i bin raet taem yu bin prea abaot wan samting, mo yu bin trastem laet ia, mo yu bin laef from, nao hem i raet tu naoia. Yu no givap taem we evri samting oli kam strong moa. Mo tu, yu no slakem yu mo folem nomo man ia we tingting blong hem i blong stap prapa spolem hapines blong yu. Fesem ol tu tingting blong yu. Kontrolem ol fraet blong yu. ‘Nao from samting ya, yufala i mas stanap strong, from we i gat bigfala pei blong yufala i stap, we bambae yufala i kasem’ [Hibrus 10:35]. Stap long rod ia mo luk ol naes samting blong laef oli stap open blong yu” (“Cast Not Away Therefore Your Confidence,” Ensign, Mar. 2000, 7, 9).

Stap Kam Antap long Fasin blong Yumi blong Stap Tij

Helpem olgeta we oli stap lan blong oli faenem ol trutok aot long ol skripja. Bifo yu invaetem ol memba blong klas blong ridim wan skripja, yu save talem long olgeta blong lukaotem wan spesifik samting insaed long hem. Eksampol: oli save lukaotem wan samting we oli bin lanem abaot Sevya, o wan samting we oli wantem serem wetem wan memba blong famli. (Luk long Teaching in the Savior’s Way, 21.)