Pikja droing blong Ebraham mo Sara i kam long Dilleen Marsh

7–13 Febwari

Jenesis 12–17; Ebraham 1–2

“Blong Mi Stap Olsem Wan Moa Bigfala Disaepol blong Stret mo Gud Fasin”

?Wanem nao Tabu Spirit i bin tijim yu long wik ia taem yu bin stap stadi long Jenesis 12–17 mo Ebraham 1–2? Meksua se yu givim sam janis long ol memba blong klas blong oli serem wanem Tabu Spirit i bin tijim olgeta.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Blong givim janis long ol memba blong klas blong oli serem wan samting we oli bin lanem long stadi blong olgetawan long Jenesis 12–17 mo Ebraham 1–2, oli save jusum wan man o woman insaed long ol japta ia, mo finisim sentens olsem hemia: “Ebraham i bin tijim mi ” o “Sara i bin tijim mi .”

Stap Tijim Doktrin

Jenesis 15:1–6; 17:15–22; Ebraham 1:1–19

God bambae i blesem yumi from fet blong yumi, mo ol stret mo gud tingting blong hat blong yumi.

• Ol eksperiens blong Ebraham mo Sara, oli raetem daon long Jenesis 15; 17; Ebraham 1 mo olgeta ia oli save helpem ol memba blong klas blong holemtaet fet blong olgeta, se ol stret mo gud tingting blong hat blong olgeta bambae i kamtru long stret taem blong Lod. ?Olsem wanem yu statem wan toktok raon long prinsipol ia? Wan aedia hem i blong invaetem klas blong luklukgud long Jenesis 15:1–6 mo Ebraham 1:1–19 mo tokbaot wanem Ebraham i wantem mo ol had situesen we i stap. ?Olsem wanem Ebraham mo Sara, tufala i soemaot fet blong tufala long ol taem we i bin had? (luk long Hibrus 11:8–13). ?Olsem wanem nao ol stret mo gud samting we tufala i bin wantem oli bin kamtru? (luk long Jenesis 17:15–22; 21:1–3; Doktrin mo Ol Kavenan 132:29; Ebraham 1:31). ?Olsem wanem nao yumi save soemaot fet blong yumi taem we ol stret mo gud samting we hat blong yumi i wantem oli no kamtru yet olsem we yumi wantem? Maet ol memba blong klas oli save serem olsem wanem Sevya i bin sapotem olgeta long ol kaen situesen olsem.

• Sam memba insaed long klas blong yu, maet oli stap kasem smol sapot nomo we i kam long famli blong olgeta taem we oli stap traehad blong stap laef folem gospel—mo tu, oli save fesem fasin blong agens. ?Wanem nao yumi lanem aot long eksampol blong Ebraham long Ebraham 1:1–19 we i save helpem olgeta we oli stap traehad blong stap laef long wan stret mo gud fasin long ol kaen situesen olsem?

• Maet yu save askem ol memba blong klas blong ridim Josef Smit Translesen, Jenesis 14:36–40 (insaed long Baebol apendiks) mo serem wanem we oli lanem abaot fet blong Ebraham mo wanem we hem i wantem. Mo tu, oli save serem olsem wanem oli bin kasem blesing taem we oli bin praktisim fet blong olgeta blong stap pem taeting.

Ebraham 2:6–11

Kavenan blong Ebraham i blesem yumi evriwan.

• Blong helpem ol memba blong klas blong andastanem wanem hem i kavenan blong Ebraham, yu save serem ol toktok we oli kam long Presiden Russell M. Nelson insaed long “Sam Moa Risos” (mo tu luk long Gaed long Ol Skripja, “Kavenan blong Ebram,” olskripja.ChurchofJesusChrist.org). Ol memba blong klas oli bin lanem abaot Kavenan blong Ebraham aot long Ebraham 2:6–11, olsem we oli talem long aotlaen blong wik ia insaed long Kam Folem Mi—Blong Wanwan Man, Woman mo Famli. Maet ol memba blong klas oli save serem wanem we oli bin lanem, o klas i save stadi long ol ves ia tugeta. ?Wanem promes mo responsabiliti nao yumi kasem tru long kavenan blong Ebraham? Vidio ia, we i stap long Inglis: “Special Witness—President Nelson” i save help blong ansarem ol kwestin ia (ChurchofJesusChrist.org/media-library/video/2011-04-18-special-witness-president-nelson). ?Wanem nao yumi nidim blong mekem blong kasem ol blesing blong kavenan ia? ?Olsem wanem nao, yumi, olsem laen blong Ebraham, i save blesem “evri famli ia blong wol”? (Ebraham 2:11).

Jenesis 14:18–19; Josef Smit Translesen, Jenesis 14:25–40

“Melkesedek i bin wan man we i gat fet.”

• From Restoresen blong gospel, plante long ol memba blong Jos oli save gud Melkesedek Prishud, be sam oli no save abaot man ia we i Melkesedek. Blong helpem ol memba blong klas blong oli lanem moa abaot hem, maet yu save invaetem olgeta blong traem tingting, insaed long maen blong olgeta, se oli askem olgeta blong oli presentem Melkesedek long wan we i no save hem, mo mekem wan lis long bod abaot ol samting we bae oli talem. Ol samting we oli talem, maet oli ol samting we oli bin ridim long Josef Smit Translesen, Jenesis 14:26–27, 33–38 (insaed long Baebol apendiks); Alma 13:13–19; mo Doktrin mo Ol Kavenan 107:1–4. ?Wanem nao yu lanem abaot Melkesedek Prishud aot long ol ves ia?

  

  Melkesedek i blesem Ebram, i kam long Walter Rane

Sam Moa Risos

Ol Blesing blong Kavenan blong Ebram.

Presiden Russell M. Nelson i tijim:

“Kavenan ia we God i bin mekem wetem Ebraham, mo afta, Aesak mo Jekob i bin talem se i hapen, hem i impoten bigwan mo i impoten tumas. … Lod i bin kamkamaot long ol las dei ia blong mekem bakegen kavenan ia blong Ebram. … Taem hemia i hapen, yumi bin kasem, semmak olsem olgeta bifo, tabu prishud mo gospel ia we i no gat en. Yumi gat raet blong kasem gospel ia we i fulwan, stap glad long ol blesing blong prishud, mo kwalifae blong kasem blesing blong God we oli hae bitim evriwan—we i laef we i no save finis” (“Covenants,” Liahona, Nov. 2011, 87–88).

“Ol stamba blesing blong kavenan blong Ebram, oli kasem olgeta insaed long ol tabu tempol. Olgeta blesing ia, oli letem yumi kam fored long Fas Laef Bakegen long Ded, mo kasem ol jea blong king, ol kingdom, ol paoa, ol ples blong prins i rul, mo ol ples blong rul, mo ‘go long ples we [yumi] kam olsem wan god mo kasem glori long evri samting ’ [Doktrin mo Ol Kavenan 132:19]” (“Special Witnesses of Christ,” Ensign, Apr. 2001, 7).

Stap Kam Antap long Fasin blong Yumi blong Stap Tij

Serem testemoni blong yu plante taem. “Simpol mo tru witnes blong yu abaot wan trutok i save gat paoa blong lidim tingting blong olgeta we yu stap tijim. Eksampol: yu save serem wan simpol testemoni abaot wei we ol kavenan oli bin blesem laef blong yu.