Rebeka

Pikja droing blong Rebeka, we i kam long Dilleen Marsh

21–27 Febwari

Jenesis 24–27

Kavenan Ia I Kam Niu Bakegen

Taem yu ridim Jenesis 24–27, prea blong save olsem wanem yu save leftemap tingting blong ol memba blong klas blong oli kasem wan eksperiens blong olgetawan, blong stap lanem samting aot long ol skripja.

Raetemdaon Ol Filing mo Tingting blong Yu

serem aekon

Invaetem Man blong Serem Wanem Oli Gat

Blong leftemap tingting blong ol memba blong klas blong oli serem ol niu tingting we oli kasem aot long Jenesis 24-27, yu save invaetem olgeta blong jusum wan spesifik skripja we i bin givim insperesen long olgeta, mo blong oli raetem long wan pis pepa. Pikimap ol pis pepa ia, mo jusum sam blong ridim mo toktok raon long ol olsem wan klas.

tijing aekon

Stap Tijim Doktrin

Jenesis 24

Kavenan mared i wan mas insaed long plan blong God.

• Hamas Ebraham i bin tekem se i impoten blong stap faenem wan waef blong Aesak, i givim wan janis blong toktok raon long hamas kavenan blong mared i impoten insaed long plan ia we God i gat long yumi. Blong statem toktok storian insaed long klas, ol memba blong klas oli save lukluk tru long Jenesis 24 mo serem ol samting we Lod i bin mekem blong help blong mekem Aesak mo Rebeka tufala i mared. ?From wanem mared i impoten long Lod? Blong helpem ol memba blong klas blong toktok raon long kwestin ia, yu save serem wetem olgeta toktok blong Elda D. Todd Christofferson we i stap long “Sam Moa Risos.” ?Olsem wanem yu save help blong meksua se ol stamba tingting blong mared we God i gat, bae oli kamtru?

• Askem ol memba blong klas wanem kwaliti oli bin luk long wan hasban o waef, long wan papa mo mama, o eni mared kapol, we i bin help blong gat wan fetful mo hapi mared. Stori we i stap long Jenesis 24 i soemaot ol kwaliti we oli save helpem wan blong mekem se i gat hapines insaed long wan mared—mo ol nara eria blong laef. Eksampol, long ves 12 yumi lanem se prea i stap lidim yumi, mo long ves 19 yumi lanem abaot fasin blong traehad moa taem yumi givim seves. ?Wanem nara prinsipol nao yumi save faenem insaed long ol japta ia? Ol memba blong klas oli save lukluk tu insaed long “Famli: Wan Ofisol Toktok I Go long Wol” (ChurchofJesusChrist.org/study?lang=bis).

Jenesis 25:29–34.

Yumi save jusum bitwin fasin blong kasem tangkyu kwiktaem from ol samting we yumi mekem, o blong kasem ol samting we oli impoten moa.

• ?Olsem wanem nao yu save helpem ol memba blong klas blong oli faenem ol lesen we i blong olgeta nomo aot long ol eksperiens blong Jekob mo Esao? Wan aedia i blong invaetem olgeta blong oli mekem tu (2) lis antap long bod—wan we i blong ol blesing we oli no save finis we God i wantem givim long yumi, mo wan narawan i ol samting we oli blong wol ia, we oli pulum ol tingting blong yumi aot long ol blesing ia. Afta, ol memba blong klas oli save ridim Jenesis 25:29-34, mo riplesem “raet blong fasbon” wetem wan samting we i stap long fasfala lis, mo i riplesem “supsup” wetem wan samting we i stap long nambatu lis. ?Olsem wanem nao man we i kam agensem yumi i stap traem blong winim tingting blong yumi blong yumi riplesem ol blesing blong God wetem ol samting we oli no impoten tumas? Tingting blong invaetem ol memba blong klas, blong oli givim advaes long wanwan long olgeta, long wei blong stap lukluk nomo long Sevya mo ol blesing we oli no save finis we Hem i stap givim long yumi.

Jenesis 26:18–25, 32–33

Jisas Kraes i wel blong wota we i stap givim laef.

• Jenesis 26 i tokbaot plante taem se Aesak mo haos blong hem i mas digim ol wel blong faenem wota, mo hemia, plante taem, i nidim blong wan i mas hadwok bigwan. Hemia ia, i save help blong tijim ol memba blong klas abaot hadwok we wanwan i mas mekem blong tekem “wota we i stap laef” blong Sevya i kam insaed long laef blong yumi (luk long Jon 4:10). Maet yu save soemaot hemia taem yu droem, long bod, wan ples blong wota we bigfala graon o doti i kavremap. Ol memba blong klas oli save kam, wan afta wan, blong waepemaot sam long ol doti ia mo semtaem tokbaot olsem wanem oli bin faenem wota ia we i stap laef, blong Sevya. Leftemap tingting blong olgeta blong stap yusum Gaed long Skripja blong faenem ol ves we oli go wetem ol samting we oli serem.

  wan wel blong bifo

  Wan wel long taem blong Bereseba, ples we Ebraham mo Aesak tufala i digim wel long hem.

sam moa risos aekon

Sam Moa Risos

Mared mo famli oli wan kriesen blong God.

Elda D. Todd Christofferson i bin givim samfala risen from wanem mared mo famli oli impoten tumas long plan ia blong God:

“Wan famli we oli bildimap long mared blong wan man wetem wan woman, i wan bes ples blong plan blong God i stap laef long hem—i ples blong pikinini i bon i kam long wol ia, we oli kam long wan fasin we i klin evriwan, mo wetem klin fasin blong God, mo i wan ples blong stap lanem samting mo wan ples blong rere we bae oli nidim blong save gat sakses long laef long wol ia mo long laef we i no save finis long wol we i stap kam. Wan bigfala grup blong ol famli we oli bildimap olgeta long ol kaen mared ia i wan mas blong ol sosaeti oli stap laef i stap mo oli tekem frut. …

“ … Be ol samting we yumi toktok strong from long saed blong rol blong mared mo famli, i no dipen long sosol saens, be i dipen long trutok ia se oli kriesen blong God. Hem nao, we long stat i bin krietem Adam mo Iv i folem imej blong Hem (o folem fasin mo bodi blong Hem), man mo woman, mo i joenem tufala olsem hasban mo waef blong tufala i kam ‘wan bodi’ mo tufala i gat fulap pikinini mo oli fulumap wol. Wanwan man mo woman, i tekem tabu fasin mo bodi ia; be insaed long yunion blong mared blong wan man we i man, mo wan we i woman nao, bae yumi save kasem mining we i fulwan blong stap olsem wan we God i bin krietem yumi folem fasin mo bodi blong Hem—we wan i man mo wan i woman. … Kaen mared ia … i pat blong plan blong hapines i semmak nomo olsem Foldaon mo Atonmen oli pat blong plan ia” (“Why Marriage, Why Family,” Liahona, May 2015, 52).

Stap Kam Antap long Fasin blong Yumi blong Stap Tij

Mekem tijing blong yu i lukluk nomo long doktrin. Taem yu stap invaetem ol memba blong klas blong serem wanem we oli gat, meksua se oltaem, yu tekem storian i kambak long doktrin we i stap insaed long ol skripja. Yu save mekem hemia taem yu askem ol memba blong klas blong ridim ol skripja insaed long klas, mo askem ol kwestin abaot wanem ol skripja oli talem, mo stap invaetem ol memba blong klas blong oli serem testemoni blong olgeta abaot doktrin we yu stap tijim.