28 Febwari–6 Maj

Jenesis 28–33

“Tru, Ples Ya, Hae God I Stap long Hem”

Taem yu stap rere blong tij, wetem prea, tingting long wanem prinsipol we i stap long Jenesis 28–33 bae i save helpem gud ol memba blong klas blong yu. Olgeta aedia ia, oli blong yu stadi blong yuwan mo blong yu kasem insperesen.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Wan blesing blong stap tugeta long wan klas blong Sandei Skul, i we ol memba oli save helhelpem wanwan long olgeta blong oli faenem mining insaed long ol skripja. Leftemap tingting blong ol memba blong klas blong serem, wetem wan we i sidaon kolosap, wanem nao Tabu Spirit i bin tijim olgeta taem we oli bin stadi long ol skripja long wik ia. Yu save invaetem sam long olgeta blong oli save serem wetem klas, wanem nao oli bin toktok raon long hem. Hemia bae i wan gudfala ples blong statem toktok storian insaed long klas.

Stap Tijim Doktrin

Jenesis 28:10–22

Insaed long tempol, yumi stap mekem ol kavenan wetem God.

• ?Olsem wanem nao yu save helpem ol memba blong klas blong faenem mining insaed long eksperiens blong Jekob long Betel, olsem we oli tokbaot insaed long Jenesis 28:10–22? Oli save stat taem oli luklukbak long Jenesis 27:41–45; 28:1–5 mo tingting long laef blong Jekob long tetaem ia. ?Jekob i bin filim olsem wanem? Afta, ol memba blong klas oli save luklukgud insaed long Jenesis 28:10–22. ?Olsem wanem eksperiens ia i bin blesem Jekob? ?Long wanem wei nao bae hem i save kasem kamfot? ?Olsem wanem eksperiens blong Jekob i givim insperesen long yumi taem yumi stap wosip insaed long tempol? Mo tu, klas i save singsing, ridim, o lisin long “Nearer, My God, to Thee,” we i folem ol ves ia (Hymns, no. 100). Oli save serem ol sentens blong singsing ia, o ol sentens we oli stap long Jenesis 28:10–22 we oli stap rimaenem olgeta abaot ol eksperiens we oli bin gat wetem fasin blong kam kolosap moa long Sevya.

• Lada ia we Jekob i bin luk long drim blong hem, plante taem oli bin komperem long ol kavenan blong tempol. Mebi yu save soem o droem wan pikja blong wan lada mo wan tempol. Ol memba blong klas oli save luklukbak long Jenesis 28:10–22 mo tokbaot wanem nao, lada insaed long drim blong Jekob, i stap tijim yumi abaot tempol. ?Wanem moa yumi faenem insaed long ol ves ia, we oli stap mekem yumi tingbaot bakegen ol blesing we yumi stap kasem from ol kavenan blong yumi long tempol? (Luk long “About the Temple Endowment” mo “About a Temple Sealing” [temples.ChurchofJesusChrist.org].)

• Blong helpem ol memba blong klas blong tingting hevi long ol promes blong kavenan blong Ebram, we Lod i mekem bakegen wetem Jekob, yu save invaetem olgeta blong oli ridim Jenesis 28:10–15 mo tokbaot olsem wanem yumi save kasem ol blesing ia tedei (luk tu long Jenesis 12:2–3). Mo tu, oli save ridim toktok blong Presiden Russell M. Nelson insaed long “Sam Moa Risos,” mo lukaotem ol blesing we oli kam from yumi stap mekem mo stap kipim ol kavenan. ?Olsem wanem Jekob i gat blesing taem hem i kasem ol promes we oli stap long Jenesis 28:10–15? ?Wanem samting we i joen, we yumi save luk bitwin ol samting we oli bin hapen long ol ves ia mo ol samting we oli bin hapen long Jenesis 29 mo 30 (Jekob i mared mo ol pikinini blong hem oli bon i kam long wol ia)? ?Olsem wanem Lod i blesem yumi taem yumi stap mekem mo kipim ol tabu kavenan?

Pikja droing blong Jekob mo Esao we tufala i stap haggem tufala, i kam long Robert T. Barrett

Jenesis 32–33

Sevya i save helpem yumi blong winim ol smol raorao insaed long ol famli blong yumi.

• Jenesis 32–33 i save givim insperesen long ol memba blong klas we oli wantem blong faenem hiling insaed long ol famli rilesensip blong olgeta. Bae i save help blong askem wan memba blong klas blong talem sot ol samting we oli raetemdaon insaed long Jenesis 27. Aotlaen blong wik ia, insaed long Kam Folem Mi—Blong Wanwan Man, Woman mo Famli i givim sam kwestin blong tingting hevi long hem taem yu stadi long Jenesis 32–33 Maet ol memba blong klas oli save jusum wan long ol kwestin ia mo lukaotem ol ansa insaed long ol japta ia. Mo tu, maet bae oli glad blong serem ol eksperiens we oli bin gat taem oli bin traem blong mekem i kam strong moa bakegen ol rilesensip we oli no stap gud insaed long ol famli blong olgeta. Leftemap tingting blong olgeta blong tokbaot olsem wanem nao Papa long Heven i bin helpem olgeta.

Sam Moa Risos

Yumi ol pikinini blong kavenan.

Presiden Russell M. Nelson i tijim:

“Long baptaes blong yumi, yumi mekem kavenan ia blong wok blong Lod mo obei long ol komanmen blong Hem. Taem yumi tekem mo kakae sakramen, yumi stap riniu kavenan ia mo yumi talemaot we yumi stap tekem long yumiwan, nem blong Jisas Kraes. Long wei ia, hem i adoptem yumi olsem ol boe mo gel blong Hem, mo yumi save yumi olsem ol brata mo ol sista. Hem i papa blong niufala laef ia blong yumi. Long en, insaed long tabu tempol, bae tugeta yumi kasem ol blesing blong gat wan famli we i no save finis, we long wan taem God i bin promesem long Ebraham, Aesak mo Jekob mo laen blong olgeta afta long olgeta. Long wei ia nao, selestial mared i kavenan ia blong kam olsem wan god.

“Taem yumi luksave se yumi ol pikinini blong kavenan, yumi save se huia yumi mo wanem nao God i wantem yumi mekem. Loa blong Hem, yumi raetem insaed long hat blong yumi. Hem i God blong yumi, mo yumi ol pipol blong Hem. Ol pikinini blong kavenan we oli komitim olgeta, oli gohed blong stanap, iven long medel blong ol agens. Taem we doktrin ia, yumi stap putum i stap strong insaed long hat blong yumi, bae harem nogud blong ded i kam isi, mo strong paoa long saed blong spirit i kam strong moa bakegen ” (“Covenants,” Liahona, Nov. 2011, 88).

Stap Kam Antap long Fasin blong Yumi blong Stap Tij

Helpem olgeta we oli stap lan blong oli tekem aksen folem ol kwaet toktok blong Spirit. “Tru fasin blong jenisim laef, i moa jes blong stap filim Spirit we i stap konfemem trutok long sol blong yumi; yumi mas tekem aksen folem ol trutok ia tu. Antap long fasin blong stap helpem olgeta we oli stap lan blong oli filim mo luksave Spirit, helpem olgeta blong tekem aksen folem ol kwaet toktok we oli kasem long Spirit” (Teaching in the Savior’s Way, 10).