Josef blong Ijip i stap long kalabus

Pikja droing blong Josef blong Ijip we i stap long kalabus, i kam long Jeff Ward

7–13 Maj

Jenesis 37–41

“Hae God I Stap Wetem Josef”

Oli no minim blong yu tijim evriwan long ol aktiviti we oli stap long aotlaen ia. Taem yu stap rere blong tij, prea se Spirit bae i helpem yu save wijwan long ol aktiviti ia (sapos i gat eniwan) long aotlaen ia we bae i stretwan blong lukluk long ol nid insaed long klas blong yu.

Raetemdaon Ol Filing mo Tingting blong Yu

serem aekon

Invaetem Man blong Serem Wanem Oli Gat

Blong leftemap tingting blong ol memba blong klas blong serem wanem we oli bin lanem long stadi blong olgetawan mo famli stadi blong olgeta, yu save invaetem olgeta blong faenem wan sentens long Jenesis 37–41 we i talemaot wan lesen o wan prinsipol we oli filim se i impoten.

tijing aekon

Stap Tijim Doktrin

Jenesis 37:1–28; 39; 40:1–19; 41:9–45

“Hae God i stap wetem Josef” long ol taem blong hem we hem i fesem agens.

• Semmak olsem Josef, ol memba blong klas oli save gotru long sam tes we oli had. Blong helpem klas blong faenem insperesen long eksampol blong Josef, yu save serem olgeta oli go long tri klas mo askem wanwan grup blong luklukbak long wan long olgeta skripja ia: Jenesis 39; 40:1–19; o 41:9–45. Wanwan grup i save serem ol wei we Lod i bin stap wetem Josef long ol taem blong jalenj ia. Olsem we i stret, ol memba blong klas oli save serem ol eksperiens blong olgeta abaot ol taem we Lod i bin stap wetem olgeta long wan tes we i had. ?Olsem wanem yumi save lanem blong luk gud moa we Lod i stap insaed long laef blong yumi?

• Lesen ia we i yusum wan samting insaed long hem, i save help blong soemaot olsem wanem yumi save girap i go antap long wanem i kam agensem yumi: putum wan samting we i no hevi, olsem wan smol plastik balong, i stap daon evriwan, insaed long wan kontena, mo afta yu fulumap kontena haf wei wetem drae aes, o drae bin. Invaetem wan blong seksekem kontena ia sloslo kasem taem we balong i muv i go antap kasem top. ?Olsem wanem nao Josef i semmak long balong ia? Ol memba blong klas oli save serem ol eksampol blong Lod we i stap helpem Josef blong i girap i go antap long wanem i kam agensem hem, aot long Jenesis 37:5–11; 39; 40:1–19; 41:9–45. Oli save serem tu ol taem we Lod i bin helpem olgeta long ol semmak wei.

• Yu save askem ol memba blong klas blong singsing o ridim ol toktok blong wan hym abaot fasin blong mekem ol joes we oli stret mo gud, olsem hym ia, “Do What Is Right” (Hymns, no. 237). Afta, ol memba blong klas oli save ol niu tingting o sentens insaed long Jenesis 37:1–28; 39; 40:1–19; 41:9–45 we oli givim pikja long wanem i stap insaed long mesej blong ol hym. ?Olsem wanem nao Josef i bin kasem blesing, i nomata wanem i kam agensem hem, taem hem i bin mekem wanem we i raet? ?Wetaem nao Lod i bin blesem yumi long ol taem blong agens from yumi bin stap mekem samting we i raet?

Jenesis 37:5–11; 40; 41:1–38

Sapos yumi stap fetful, Lod bae i lidim yumi mo givim insperesen long yumi.

• I nomata se i no evriwan we i kasem revelesen we i blong yumiwan tru long ol drim, i gat ol samting we yumi save lanem abaot revelesen aot long ol eksperiens blong Josef, ol wokman blong king blong Ijip, mo Fero, king blong Ijip. Yu save invaetem ol memba blong klas blong luklukbak long Jenesis 37:5–11; 40:5–8; 41:14–25, 37–38 mo serem eni samting we oli bin lanem abaot revelesen. Yu save invaetem olgeta blong serem wanem i bin helpem olgeta blong rere blong kasem, andastanem, mo mekem folem revelesen.

  Josef i stap long kalabus, i stap talem mining blong ol drim

  Josef I Stap Talem Mining blong Drim blong Jif Wokman mo Man blong Bekem Bred, i kam long François Gérard

Jenesis 39:1–20

Wetem help blong Lod, yumi save ronwe long temtesen.

• Yu save askem ol memba blong klas blong serem wanem we oli bin lanem abaot fasin blong stanap agensem temtesen taem we oli stap ridim Jenesis 39 long wik ia. ?Wanem nao Josef i bin mekem blong winim temtesen? (luk long ol ves 7–12). Ol vidio ia, “Leave the Party” mo “Dare to Stand Alone” (ChurchofJesusChrist.org) oli givim sam eksampol blong ol pipol we oli bin stanap agensem temtesen. Tingting blong stap askem ol memba blong klas blong mekem wan lis blong ol samting we yumi save mekem blong go kolosap long paoa blong God taem yumi stap fesem ol temtesen. (Ol memba blong klas oli save faenem ol aedia long Matiu 4:1–11 o long ol skripja we oli stap long lis blong “Temtem, Temtesen” insaed long Gaed long Ol Skripja [olskripja.ChurchofJesusChrist.org].)

• ?Olsem wanem nao yu save yusum ol eksampol blong Josef blong helpem ol memba blong klas blong stanap agensem temtesen blong mekem ol sin long saed blong seks”? Yufala i save luklukbak long Jenesis 39:1–20, mo antap long hemia, ol memba blong klas oli save wajem vidio ia “Chastity: What Are the Limits?” (ChurchofJesusChrist.org) o luklukbak long “Stap Klin long Saed blong Seks” (insaed long Blong Ol Yut Oli Kam Strong [2011], 35–37). Oli save serem wanem we oli lanem abaot fasin blong stanap agensem ol tingting, ol toktok, mo ol aksen we oli save lidim yumi long sin long saed blong seks. Sapos yufala i luklukbak long “Fasin blong Sakem Sin” (insaed long Blong Ol Yut Oli Kam Strong, 28–29) bae i save helpem ol memba blong klas blong andastanem janis ia we Jisas Kraes i stap givim long yumi blong sakem sin.

Jenesis 41:15–57

Yumi mas rere blong fesem ol hadtaem we oli save kam.

• Yu save askem wan memba blong klas blong i tokbaot smol ol drim blong king blong Ijip (luk long Jenesis 41:15–24) mo wan narawan long klas blong serem mining we Josef i bin talem abaot ol drim ia (luk long ol ves 25–32). ?Wanem tingting nao Josef i bin talem blong mekem? (Luk long ol ves 33–36, 47–49). ?Wanem lesen nao stori ia i gat blong givim long taem blong yumi tedei? (luk long kaonsel we i kam long Presiden Gordon B. Hinckley, we i stap long “Sam Moa Risos).

sam moa risos aekon

Sam Moa Risos

Stap rere from ol taem blong trabol.

Presiden Gordon B. Hinckley i bin talem: “Mi askem strong long yufala blong yufala i mas lukaot gud blong no spendem tumas mane, blong yufala i gat disiplin long wei blong spendem mane, blong mekem se yufala i no gat kaon, mo mekem hemia long hamas i posibol blong mekem. Pemaot kaon blong yufala kwiktaem olsem we yu save mekem. … Gat wan smol mane i stap long saed, nating we i smol nomo” (“To the Boys and to the Men,” Ensign, Nov. 1998, 54).

Stap Kam Antap long Fasin blong Yumi blong Stap Tij

Blong stap lisin, hem i wan aksen blong lav. “Askem Papa long Heven blong helpem yu blong andastanem wanem nao ol memba blong klas oli gat blong talem. Taem yu lisin gud long ol mesej blong olgeta we oli talem mo hemia we oli no talem, bambae yu kam blong andastanem gud moa, nid, wari, mo wanem oli wantem” (Teaching in the Savior’s Way, 34).