Moses mo Tri Wetem Faea, i kam long Harry Anderson

21–27 Maj

Eksodas 1–6

“Mi Stap Tingbaot Promes Ya blong Mi Yet”

Taem yu stap ridim Eksodas 1–6, tingting abaot ol pipol we yu stap tijim. . ?Wanem trutok nao, we oli stap long ol japta ia we bae oli gat moa mining long olgeta? ?Olsem wanem bae yu helpem olgeta blong faenemaot olgeta trutok ia?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Wan aedia blong leftemap tingting blong ol memba blong klas blong serem wanem we oli stap lanem, hem i blong stap raetem wan kwestin olsem hemia, antap long bod: Taem yu bin stap ridim Eksodas 1–6, ?wanem nao yu bin tekem not long hem, we yu no bin tekem not long hem bifo? Invaetem ol memba blong klas blong serem ol ansa blong olgeta.

Stap Tijim Doktrin

Eksodas 1–2

Jisas Kraes I Man we Mekem Yumi Kam Fri

• Iven we oli no talemaot stret nem blong Sevya long Eksodas 1–2, stori ia i save helpem ol memba blong klas blong bildimap fet blong olgeta long misin blong Hem, we i blong mekem yumi kam fri long fasin blong yumi stap olsem prisena. Ol memba blong klas oli save faenem ol toktok o ol sentens insaed long Eksodas 1–2 we i tokbaot ol hadtaem we Ol Man Isrel oli bin stap fesem. ?Olsem wanem ol samting ia we oli tokbaot oli semmak long fasin blong stap prisena long saed blong spirit, o i semmak long eni hadtaem we yumi stap fesem? ?Olsem wanem nao ol pikinini blong Isrel oli lukaotem blong kam fri, mo olsem wanem nao God i bin ansarem olgeta? Eksodas 2:23–25; 3:7–8). ?Olsem wanem yumi save yusum paoa blong God taem yumi nid blong kam fri? ?Olsem wanem God i stap ansarem ol strong prea blong yumi blong kasem help? Ol memba blong klas oli save lukluk blong kasem sam moa niu tingting insaed long mesej blong Presiden Russell M. Nelson: “Pulum Paoa blong Jisas Kraes Insaed long Laef blong Yumi” (Jeneral Konfrens, Epril 2017, Churchofjesuschrist.org/general-conference/conferences?lang=bis).

  

  Moses insaed long ol smol bus, © Providence Collection/oli karem laesens aot long goodsalt.com

Eksodas 3:4

Taem yumi stap mekem wok blong Lod, yumi save gat paoa blong Lod.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong luklukgud insaed long Eksodas 3–4 blong faenem olsem wanem Lod i bin ansa long ol wari blong Moses abaot wok ia blong mekem Ol Man Isrel oli kam fri long fasin blong stap prisena. Sapos ol memba blong klas blong yu oli bin mekem aktiviti ia insaed long hom, invaetem olgeta blong serem wanem we oli bin lanem. O yu save mekem aktiviti ia olsem wan klas. Blong yu moa spesifik, ol memba blong klas oli save luklukgud insaed long Eksodas 3:11–18; 4:1–17, mo oli lukaotem ol wari blong Moses mo ol ansa blong Lod long saed blong wanwan long ol wari ia. ?Olsem wanem nao ol ansa blong Lod oli stap helpem yumi taem we yumi gat ol tu tingting abaot hamas paoa yumi gat blong mekem wok blong Hem?

Eksodas 3:5

Yumi sapos blong soem respek from ol tabu samting mo ples.

• ?Olsem wanem nao yu save yusum eksampol blong Moses, blong givim insperesen blong gat wan toktok raon long wei we yumi sapos blong tritim ol tabu samting? Eksampol: afta we yufala i ridim Eksodas 3:5 tugeta, yu save soem ol tabu samting, o ol pikja blong ol tabu samting (olsem ol skripja, o ol tempol) mo ol nara evri dei samting, o pikja blong ol evri dei samting (olsem ol nomol buk, o ol nomol bilding). Ol memba blong klas oli save tokbaot ol nara samting we oli tekem se oli tabu, mo serem olsem wanem oli soem respek long ol samting ia (luk tu long Levitikas 19:30; Doktrin mo Ol Kavenan 6:10–12). ?From wanem nao Sevya i wantem yumi blong tritim ol tabu samting wetem respek?

Eksodas 5:4–9, 20–23; 6:1–13

Ol stamba tingting blong Lod bae oli kamtru long taem we Hem i wantem.

• Samtaem tingting i save kam slak taem we ol tru hadwok blong yumi blong mekem gud samting, i luk se oli no wok—maet wan fren i no mekem eni samting afta long ol givhan hadwok blong yumi, o afta we i no gat ansa long ol prea blong yumi from wan pikinini we i stap mestem rod. Blong lanem abaot wan semmak eksperiens we Moses i bin hat, ol memba blong klas oli save ridim Eksodas 5:4–9, 20–23. ?Olsem wanem nao Lod i stap helpem Moses blong winim ol filing blong hem we hem i wantem givap? (luk long Eksodas 6:1–13). Ol memba blong klas oli save serem ol eksperiens blong olgeta abaot wan taem we oli no bin luk kwiktaem ol risal blong ol hadwok blong olgeta blong wok blong Lod. ?Wanem nao eksperiens blong Moses, long ol japta ia, oli stap tijim yumi abaot wei we yumi save folem long ol semmak situesen olsem? (Luk tu long “Sam Moa Risos.”)

Sam Moa Risos

Yumi givim seves long ol narawan long bihaf blong Lod.

Presiden Joy D. Jones i bin talem olsem wanem hem mo hasban blong hem i bin fetful blong givim seves long wan givhan wok we oli givim long tufala, be tufala i no bin luk sakses blong hadwok blong tufala. Kapol ia i tingting hevi mo i bin prea blong save wanem rod blong folem. Taem hem i stap tokbaot bakegen ansa blong ol prea blong tufala, Presiden Jones i talem:

“Mitufala i luksave se mitufala i traehad wetem tru hat blong helpem famli ia mo helpem bisop, be mitufala i mas askem mitufalawan bakegen sapos mitufala i stap helpem famli ia from mitufala i lavem Lod, o no. King Benjamin i mekem i klia taem hem i se, ‘Luk, mi talem long yufala se from mi bin talem long yufala se mi bin spenem ol dei blong mi long wok blong yufala, mi no gat tingting blong tok flas, from mi bin mekem wok blong God nomo’ [Mosaea 2:16; oli ademap italik].

“?So King Benjamin i stap givim seves long hu? Papa long Heven mo Sevya. Blong save hu mo from wanem yumi givim seves long ol narafala, i helpem yumi andastanem se bigfala wei blong soem lav, hem i blong givim evri samting long God” (“Blong Hem,” Liahona, Nov 2018, 50).

Stap Kam Antap long Fasin blong Yumi blong Stap Tij

Serem ol eksperiens long saed blong spirit. Wan wei blong stap invaetem Spirit blong i lidim tingting insaed long klas, hem i blong leftemap tingting blong ol memba blong klas blong serem wanem we Tabu Spirit i bin tijim olgeta taem we oli bin stap stadi long ol skripja long wik ia.