Pikja droing blong Josef blong Ijip, i kam long Robert T. Barrett

14–20 Maj

Jenesis 42–50

“God I Kafsaedem Plan Ya blong Yufala, I Mekem we Gudfala Samting I Kamaot long Hem”

Elda David A. Bednar i bin talem: “Haremsave long saed blong spirit we yu mo mi i gat blesing blong kasem … bae yu jes no save givim nomo long wan narawan” (“Seek Learning by Faith,” Ensign, Sept. 2007, 67). ?Olsem wanem bae yu helpem ol memba blong klas blong oli kasem, blong olgetawan, wan andastaning long saed blong spirit?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Blong givim ol memba blong klas wan janis blong serem wan samting we oli faenem se i gat mining long taem blong skripja stadi blong olgetawan o wetem famli; yu save askem ol kwestin olsem olgeta ia long stat blong klas: ?Wanem ves insaed long ol japta ia i bin kasem tingting blong yu? ?Wanem ves nao yu faenem se yu go stap ridim moa bitim wan taem? ?Wanem ves nao yu bin serem wetem wan? ?Wanem ves nao i lidim yufala blong gat wan gudfala toktok storian wetem famli o ol fren?

Stap Tijim Doktrin

Jenesis 45:1–15; 50:15–21

Fasin blong fogiv i tekem pis i kam.

• Bifo yu statem wan toktok storian abaot wanem eksperiens blong Josef i stap tijim abaot fogivnes, bae i help blong gat wan i talem long sot toktok wanem we i stap long stori long Jenesis 37; 39–45. ?From wanem nao bae i had long Josef blong hem i fogivim ol brata blong hem? ?Wanem eksperiens o fasin nao Josef i bin gat blong save fogiv? (eksampol, luk long, Jenesis 45:1–15 o 50:15–21). ?Olsem wanem eksampol blong Josef i save helpem yumi blong fogiv moa?

  Vidio ia, “Forgiveness: My Burden Was Made Light” (ChurchofJesusChrist.org) i givim wan nara eksampol blong fogivnes we i givim insperesen. ?Olsem wanem Sevya i helpem yumi blong fogivim ol narawan?

• ?Wanem blesing nao i kamaot taem we Josef i fogivim ol brata blong hem? Bae i intresting blong komperem ol rilesensip long famli blong Jekob long stat blong stori (eksampol, luk long Jenesis 37:3–11) mo hao oli bin stap long en blong stori (luk long Jenesis 45:9–15; 50:15–21). ?Wanem rol nao fogivnes i bin plei long hem blong mekem jenis insaed long famli blong Josef? ?Olsem wanem nao ol samting oli tanem i go defren sapos Josef i no bin wantem blong fogiv? Yu save invaetem ol memba blong klas blong givim tingting long sam wei we stori ia i save helpem ol famli tedei blong winim ol raorao mo fasin blong stap jalus.

Jenesis 45:5–11; Josef Smit Translesen, Jenesis 50:24–38 (insaed long Baebol apendiks)

Ol wok blong Josef, Moses, mo Josef Smit oli testifae abaot misin blong Jisas Kraes.

• Wetem sam moa laet we i kam wetem gospel ia we i kambak, yumi save se Josef, we i bin mekem famli blong hem i fri long fasin blong stap hanggri, i bin talem profesi tu abaot ol bigfala blesing we bae oli kam, wan dei, tru long Moses mo Josef Smit. Mo evriwan long ol profet ia oli poenem yumi long Hae Man Ia we I Mekem Yumi Fri, Jisas Kraes. Blong helpem ol memba blong klas blong luk Sevya long ol seves blong ol trifala profet ia, yu save droem wan jat long bod, we i semmak long hemia we i stap long “Sam Moa Risos.” Ol memba blong klas oli save wok tugeta blong fulumap jat ia. Oli save ademap ol kolom blong tokbaot wok blong Josef blong Ijip, mo Josef Smit, mo oli yusum wanem we oli bin lanem aot long Jenesis 45:5–11 mo Josef Smit Translesen, Jenesis 50:24–38 (insaed long Baebol apendiks). ?Olsem wanem nao ol seves blong ol profet ia oli testifae mo poen i go long misin blong Sevya? (Blong kasem sam eksampol blong wanem i semsemmak bitwin laef blong Josef blong Ijip mo laef blong Sevya, luk long Jenesis 37:3 mo Matiu 3:17; Jenesis 37:26–28 mo Matiu 26:14–16; Jenesis 45:5–7 mo Luk 4:18; mo Jenesis 47:12 mo Jon 6:35; luk tu long Moses 6:63.)

  

  Pikja droing blong Josef blong Ijip, we i kam long Paul Mann

Jenesis 50:19–21

God i save helpem yumi blong faenem mining insaed long ol tes blong yumi.

• I nomata we i no bin klia taem we hem i bin stap gotru long ol had tes ia, be long en, Josef i bin save lukbak long wanem i bin kam agensem hem long Ijip, mo luk se “God i kafsaedem plan ya blong [hem], i mekem we gudfala samting i kamaot long Hem” (Jenesis 50:20). Sapos yumi bin save visitim Josef taem hem i bin stap long hol ia o insaed long kalabus ia, ?bae yumi leftemap tingting blong hem olsem wanem? ?Olsem wanem nao, tingting we i stap long Jenesis 50:19–21 i save helpem yumi long taem blong tes? Maet ol memba blong klas oli wantem blong tokbaot sam wei we God i bin blesem olgeta, iven tru long ol had eksperiens we oli bin gat. Blong gat wan eksampol, luk long vidio ia, “Unto All the World: The Sam Family” (ChurchofJesusChrist.org). ?Wanem nao Doktrin mo Ol Kavenan 122 i ademap long andastaning blong prinsipol ia?

Sam Moa Risos

Laef blong ol profet oli testifae abaot Jisas Kraes mo misin blong Hem.

Laef blong Josef blong Ijip, Moses, mo Josef Smit oli save mekem yumi tingbaot Jisas Kraes. Ol memba blong klas oli save fulumap jat ia, mo afta ademap ol kolom blong Josef blong Ijip (luk long Jenesis 45:5–11), Moses (luk long Josef Smit Translesen, Jenesis 50:24, 29, 34–36 [insaed long Baebol apendiks]), mo Josef Smit (luk long Josef Smit Translesen, Jenesis 50:26–28, 30–33 [insaed long Baebol apendiks]).

	Jisas Kraes
?Huia nao i bin kam fri?
?Wanem nao Lod i bin mekem olgeta oli kam fri long hem?
?Wanem nao oli bin mekem blong mekem oli kam fri?

Stap Kam Antap long Fasin blong Yumi blong Stap Tij

Askem ol kwestin we i invaetem wan blong testifae. Blong stap askem ol kwestin i leftemap tingting blong olgeta we oli stap lan blong talem testemoni blong olgeta, i wan gudfala wei blong stap invaetem Spirit. Eksampol, taem yu stap tijim Jenesis 45:1–15, yu save askem wan kwestin olsem: “?Wanem blesing nao yu bin gotru long hem, from se yu bin fogivim wan?” (luk long Teaching in the Savior’s Way, 32).