Sarah and Isaac [Sara ug Isaac], ni Scott Snow

Pebrero 14–20

Genesis 18–23

“Aduna Bay mga Butang nga Makuli sa Ginoo?”

Samtang mangandam ka sa pagtudlo, hinumdumi nga daghang sakop sa klase mahimo nga adunay makahuluganon nga kaugalingon nilang mga kasinatian samtang nagbasa sa Genesis 18–23. Unsay imong mabuhat aron sa pag-awhag kanila nga mopaambit niining mga kasinatian ug mga ideya? Ikonsiderar ang pagtugot niadtong mga ideya nga makaimpluwensya sa panaghisgutan sa klase.

Irekord ang Imong mga Impresyon

Dapita ang Pagpaambit

Ang atong mga pagsulay kasagaran mahimong mga gutlo nga motino sa mahinungdanong mga sangputanan sa atong kinabuhi. Ang Genesis 18–23 naghulagway sa pipila nianang mga gutlo sa kinabuhi ni Abraham ug ni Lot. Tingali ang mga sakop sa klase mahimo nga mopaambit og usa ka bersikulo nga ilang nakit-an atol sa ilang personal nga pagtuon niini nga semana nga naghulagway og usa ka gutlo nga motino sa mahinungdanong mga sangputanan alang ni Abraham. Mahimo dayon silang mopaambit sa unsay ilang nakat-unan gikan niini.

Itudlo ang Doktrina

Genesis 18:9–14; 21:1–7

Ang Ginoo motuman sa Iyang mga saad sa kaugalingon Niyang panahon.

• Ang asoy diha niini nga mga bersikulo makapadasig sa mga sakop sa klase nga naghunahuna kon ang mga saad sa Dios ngadto kanila matuman ba. Sa pagsugod og panaghisgutan, siguro makatabang ang pagdapit sa mga sakop sa klase nga magribyu uban sa lain nga tawo diha sa klase sa asoy bahin sa mga saad sa Dios ngadto kang Abraham ug Sara sa Genesis 17:4, 15–22; 18:9–14 ug ang katumanan niadtong mga saad sa Genesis 21:1–7. Unsa ang anaa niini nga mga bersikulo nga makahuluganon ngadto sa mga sakop sa klase? Unsa nga mga kamatuoran ang atong makuha gikan sa kasinatian ni Abraham ug ni Sara nga mapaambit sa usa ka higala kinsa nawad-an na og paglaum nga ang Dios motuman sa Iyang mga saad? Unsa ang lain pa nga mga kasulatan o personal nga mga kasinatian nga mahimo natong mapaambit? (tan-awa, sama pananglit, Mga Taga-Roma 8:28; Mga Hebreohanon 11; Mormon 9:19–21; Doktrina ug mga Pakigsaad 88:64). Unsa nga mga kasinatian ang mahimong mapaambit sa mga sakop sa klase diin ang mga saad sa Dios natuman diha sa ilang kinabuhi? Unsaon nato sa pagpatunhay ang atong hugot nga pagtuo kon ang gisaad nga mga panalangin mahimong dili madawat niini nga kinabuhi? (tan-awa sa Mga Hebreohanon 11:8–13).

Genesis 19:15–26

Isip mga disipulo ni Jesukristo, kinahanglan kitang mopalayo sa pagkadautan ug dili molingi.

• Unsa nga mga leksyon ang imong gibati nga mahimong makat-unan sa mga sakop sa klase gikan sa asoy bahin sa pamilya ni Lot nga mipalayo sa Sodoma ug Gomorra? Usa ka posible nga leksyon gisugyot diha sa pamahayag ni Elder Jeffrey R. Holland sa “Dugang nga mga Kapanguhaan.” Tingali mahimo nimo kining ipaambit sa klase human ma-summarize ang mga panghitabo nga gihulagway diha sa Genesis 19:15–26. Sa unsang mga paagi o sa unsang mga sitwasyon nga usahay kita “[molingi]” (bersikulo 26) nga angay unta kitang motan-aw sa unahan nga adunay hugot nga pagtuo diha sa Manluluwas? Tingali ang mga sakop sa klase mahimong mopaambit og mga kasinatian nga nagpakita sa kaimportante nga dili molingi. Unsa ang ikadugang sa Lucas 9:62 sa atong pagsabut bahin niini nga konsepto?

  

  Fleeing Sodom and Gomorrah [Pagpalayo sa Sodoma ug Gomorra], ni Julius Schnorr von Carolsfeld

Genesis 22:1–14

Ang pagkaandam ni Abraham nga isakripisyo si Isaac usa ka pagkasusama sa Dios ug sa Iyang Anak.

• Ang asoy bahin ni Abraham nga mihalad sa iyang anak isip usa ka sakripisyo makatudlo kanato mahitungod sa pagsakripisyo sa Langitnong Amahan sa Iyang Anak. Usa ka paagi sa pagsuhid niini nga asoy mao ang pagsangon sa katunga sa klase sa pagpamalandong sa Genesis 22:1–14 gikan sa mga panglantaw ni Abraham ug sa Dios nga Amahan, samtang ang laing katunga mamalandong niining asoy gikan sa mga panglantaw ni Isaac ug ni Jesukristo. Hangyoa ang mga sakop sa klase sa pagpaambit og mga ideya nga ilang nabatunan. Sa piho nga paagi, unsa ang nakat-unan sa mga sakop sa klase nga mas nagpalambo sa ilang pagpasalamat alang sa Langitnong Amahan ug ni Jesukristo? Isip kabahin niini nga panaghisgutan, mahimo nimong ipakita ang hulagway nga si Abraham Midala ni Isaac Aron Isakripisyo (Libro sa mga Hulagway sa Ebanghelyo, nu. 9).

Dugang nga mga Kapanguhaan

“Ang hugot nga pagtuo kanunay nagtumong ngadto sa umaabut.”

Si Elder Jeffrey R. Holland mitudlo:

“Posible nga ang asawa ni Lot milingi sa likod nga may kasuko sa Ginoo tungod sa Iyang sugo ngadto kaniya sa pagbiya sa lugar. … Busa wala lamang siya milingi sa likod; siya milingi sa likod nga may kahanugon. Sa mubo nga pagkasulti, ang iyang pagbati ngadto sa nangagi mas bug-at pa kay sa iyang pagsalig sa umaabut. …

“… Ako maghangyo kaninyo nga dili magpuyo sa mga adlaw nga nangagi ni magsige og hunahuna sa walay pulos nga mga kagahapon, bisan unsa pa ka maayo kadtong mga adlawa nga nangagi. Ang nangagi angay nga makat-unan apan dili puy-an. Kita motan-aw sa kagahapon aron sa pagkat-on sa maayong mga kasinatian ug dili ang mga bati nga mga kasinatian. Ug kon kita makakat-on kon unsa ang kinahanglan nga makat-unan ug atong gibuhat ang atong labing maayo sa atong nasinati, dayon kita molantaw sa unahan ug mohinumdom nga ang hugot nga pagtuo kanunay nagtumong ngadto sa umaabut. …

“… [Ang asawa ni Lot] walay hugot nga pagtuo. Siya nagduha-duha sa abilidad sa Ginoo sa paghatag kaniya og usa ka mas maayo nga butang kay sa anaa na kaniya. Klaro kaayo, siya naghunahuna nga walay anaa sa unahan nga posibleng makatupong kon unsa ang iyang gibiyaan. …

“… Ang ingon niana nga pagpuyo sa nangagi, lakip ang nangaging mga sayop, dili gayud kini sakto! Dili kini mao ang ebanghelyo ni Jesukristo” (“Ang Labing Maayo Moabut Pa,” Liahona, Ene. 2010, 17–18, 20–21).

Pagpalambo sa Atong Pagtudlo

Saad og mga panalangin. Sa imong pagdapit niadtong imong gitudloan nga molihok sa unsay ilang nakat-unan, pamatuod usab bahin sa mga panalangin nga gisaad sa Dios niadtong naghimo sa ingon. (Tan-awa usab sa Pagtudlo sumala sa Pamaagi sa Manluluwas,35.)