Paghulagway kang Noe nga mibiya sa arka, ni Sam Lawlor

Enero 31–Pebrero 6

Genesis 6–11; Moises 8

“Si Noe Nakakaplag og Kahamuot sa mga Mata sa Ginoo”

Kini nga outline naghatag og gibug-aton sa mga baruganan nga makita diha sa Genesis 6–11 ug Moises 8, apan dili lamang kini mao ang mga baruganan nga imong matutokan samtang magtudlo ka. Saligi ang espirituhanong mga pag-aghat nga imong madawat samtang magtuon ka sa mga kasulatan.

Irekord ang Imong mga Impresyon

Dapita ang Pagpaambit

Ikonsiderar ang paghangyo sa mga sakop sa klase sa pagpaambit og espirituhanong mensahe alang sa atong panahon gikan sa istorya bahin ni Noe o sa Tore sa Babel. Awhaga sila sa pagpaambit og usa ka kasulatan nga nagsuporta niini nga mensahe.

Itudlo ang Doktrina

Genesis 6–8; Moises 8

Adunay espirituhanong kasiguroan sa pagsunod sa propeta sa Ginoo.

• Ang pagkadautan sa panahon ni Noe makapahinumdom kanato sa pagkadautan nga atong makita sa atong palibut karon. Aron matabangan ang mga sakop sa klase nga makabenepisyo gikan sa mga leksyon diha sa istorya ni Noe, mahimo nimong isulat diha sa pisara ang Mga Pasidaan ug Mga Pasalig. Ang mga sakop sa klase mahimong moribyu sa Genesis 6–8 o Moises 8:13–30 ug mangita og butang nga ilang gibati nga importante nga pasidaan alang sa atong panahon ug butang nga ilang makonsiderar nga mapasaligon (tan-awa usab sa “Dugang nga mga Kapanguhaan”). Mahimo nilang isulat kon unsay ilang nakita ubos sa tukma nga ulohan diha sa pisara. Ngano nga ang istorya bahin ni Noe bililhon man kanato karon?

Genesis 9:8–17

Ang mga timaan [token] o mga simbolo makatabang kanato nga mahinumduman ang atong mga pakigsaad sa Ginoo.

• Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot sa pagbasa sa Genesis 9:8–17 ug sa pagpamalandong kon sa unsang paagi nga ang mga simbolo o mga timaan magsilbi isip mga pahinumdom sa atong mga pakigsaad. Aron matabangan ang mga sakop sa klase nga mopaambit sa ilang mga hunahuna, mahimong magdala ka sa klase og pipila ka butang nga magpahinumdom kanato sa importante nga mga butang—sama sa usa ka singsing sa kasal, usa ka nasudnong bandila, o usa ka name tag sa misyonaryo—ug itandi kini sa “timaan” sa bangaw. Unsay gitudlo sa Hubad ni Joseph Smith, Genesis 9:21–25 (sa Giya ngadto sa mga Kasulatan) mahitungod niini nga timaan? Giunsa paggamit sa Dios ang mga timaan o mga simbolo aron makatabang kanato nga mahinumduman ang atong mga pakigsaad?

Genesis 11:1–9

Ang bugtong paagi aron moabut ngadto sa langit mao ang pagsunod kang Jesukristo.

• Ang asoy bahin sa katawhan sa Babel nga nagtukod og tore naghatag og makapainteresado nga kalainan sa asoy bahin ni Enoch ug sa iyang katawhan nga nagtukod sa Zion, nga gitun-an sa mga sakop sa klase sa miaging semana. Ang duha ka grupo sa katawhan misulay nga moabut sa langit apan sa managlahing mga paagi. Mahimo nimong dapiton ang mga sakop sa klase sa paglista diha sa pisara og bisan unsang butang nga ilang mahinumduman mahitungod sa katawhan sa Zion (tan-awa sa Moises 7:18–19, 53, 62–63, 69) ug unsay ilang nakat-unan gikan sa Genesis 11:1–9 ug Helaman 6:26–28 mahitungod sa katawhan sa Babel. Unsa ang mga kalainan nga ilang nakit-an? Unsay gitudlo niini kanato mahitungod sa atong kaugalingong mga paningkamot nga mobalik ngadto sa presensya sa Dios?

  

  Paghulagway sa Tore sa Babel, ni David Green

• Ang karaang siyudad sa Babel wala na, apan ang garbo ug pagkakalibutanon nga gisimbolo niini anaa pa gihapon. Aron matabangan ang mga sakop sa klase nga magamit ang mga leksyon sa Tore sa Babel sa ilang kinabuhi, sugdi pinaagi sa pagdapit kanila nga ribyuhon ang Genesis 11:1–9. Dayon mahimo nimong ipang-apud-apod ang mga piraso sa papel ug dapiton ang mga sakop sa klase sa pagsulat og mga butang nga gibuhat sa mga tawo nga nakapalayo kanila sa Dios; dayon, sa laing mga piraso sa papel, mahimo silang magsulat og mga butang nga gibuhat sa mga tawo aron mas mapaduol sa Dios. Ang mga batan-on mahimong malingaw sa paghan-ay sa unang pundok sa mga papel diha sa pisara nga magporma og tore ug ang ikaduhang pundok nga magporma og templo. Unsay gihatag sa Dios aron sa pagtabang kanato nga “moabut sa langit”? (Genesis 11:4; tan-awa usab sa Juan 3:16). Mahimo kamong mokanta og usa ka himno bahin niini nga hilisgutan, sama sa “Mas Magpaduol Ko Dios Kanimo” (Mga Himno, nu. 55).

Dugang nga mga Kapanguhaan

Mga Leksyon gikan ni Noe.

Si Presidente Henry B. Eyring miingon:

“Ang kapakyas sa pagsunod sa propetikanhong tambag makapahuyang sa atong gahum sa pagdawat sa dinasig nga tambag sa umaabut. Ang labing maayong panahon nga mohukom sa pagtabang ni Noe sa pagbuhat sa arka mao ang unang higayon nga siya mihangyo. Matag higayon nga siya mihangyo human niana, matag kapakyas sa pagsanong makapaminos sa pagkasensitibo sa Espiritu. Ug mao nga matag higayon nga ang iyang hangyo nga mora og binuang, hangtud miabut ang ulan. Ug dayon ulahi na kaayo.

“Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o miingon nga ako walay labut, akong nahibaloan nga akong gibutang ang akong kaugalingon sa peligro. Sa matag higayon nga ako naminaw ngadto sa tambag sa mga propeta, mibati sa paghimatuod niini diha sa pag-ampo, ug dayon misunod niini, akong namatngunan nga ako nagpaingon ngadto sa kahilwasan” (“Finding Safety in Counsel,” Ensign, Mayo 1997, 25).

Nganong gipadala man sa Dios ang Lunop?

Ang ubang mga tawo naghunahuna mahitungod sa kaangayan sa Dios sa pagpadala og lunop aron “pagalaglagon ang tawo” (Genesis 6:7). Si Elder Neal A. Maxwell mipasabut nga nianang panahon sa Dako nga Lunop, “ang kadautan misangko na sa punto sa pagguba sa kabubut-on nga ang mga espiritu, uban sa kaangayan, dili na mapadala dinhi” (We Will Prove Them Herewith [1982], 58).

Pagpalambo sa Atong Pagtudlo

Hatagi og panahon alang sa pagpamalandong. Ang maayong mga pangutana nagkinahanglan og pagpamalandong, pagsiksik, ug inspirasyon. Hatagi ang mga sakop sa klase og pipila ka minutos sa pagpamalandong og usa ka pangutana sa dili pa mangayo sa mga tubag. (Tan-awa sa Pagtudlo sumala sa Pamaagi sa Manluluwas, 31–34.)