Paghulagway kang Abraham ug Sara pinaagi ni Dilleen Marsh

Pebrero 7–13

Genesis 12–17; Abraham 1–2

“Mahimo nga usa ka Labaw nga Sumusunod sa Pagkamatarung”

Unsay gitudlo sa Espiritu Santo kanimo samtang nagtuon ka sa Genesis 12–17 ug Abraham 1–2? Siguroa nga mahatagan ang mga sakop sa klase og oportunidad nga mopaambit kon unsay gitudlo sa Espiritu Santo kanila.

Irekord ang Imong mga Impresyon

Dapita ang Pagpaambit

Aron mahatagan ang mga sakop sa klase og mga oportunidad nga mopaambit og butang nga ilang nakat-unan gikan sa Genesis 12–17 ug Abraham 1–2, mahimo nga ang matag usa kanila mopili og usa ka tawo nga gihisgutan niining mga kapitulo ug mokompleto og usa ka kapahayag [sentence] sama sa mosunod: “Si Abraham nagtudlo kanako ” o “Si Sara nagtudlo kanako .”

Itudlo ang Doktrina

Genesis 15:1–6; 17:15–22; Abraham 1:1–19

Ang Dios mopanalangin kanato tungod sa atong hugot nga pagtuo ug matarung nga mga tinguha.

• Ang mga kasinatian nila ni Abraham ug Sara nga girekord diha sa Genesis 15; 17; Abraham 1 makatabang nga mapabilin sa mga sakop sa klase ang hugot nga pagtuo nga ang ilang matarung nga mga tinguha matuman sa panahon sa Ginoo. Unsaon nimo sa pagsugod og panaghisgutan mahitungod niini nga baruganan? Usa ka ideya mao ang pagdapit sa klase sa pagsiksik sa Genesis 15:1–6 ug Abraham 1:1–19 ug sa paghulagway sa mga tinguha ug lisud nga mga kahimtang ni Abraham. Giunsa sa pagpakita nila ni Abraham ug Sara ang ilang hugot nga pagtuo sa mga panahon sa kalisdanan? (tan-awa sa Mga Hebreohanon 11:8–13). Sa unsang paagi nga ang ilang matarung nga mga tinguha sa katapusan natuman? (tan-awa sa Genesis 17:15–22; 21:1–3; Doktrina ug mga Pakigsaad 132:29; Abraham 1:31). Unsaon nato sa pagpakita ang atong hugot nga pagtuo kon ang atong matarung nga mga tinguha wala pa matuman sigun sa gusto nato nga mahitabo? Tingali ang mga sakop sa klase mahimong mopaambit kon giunsa sa Manluluwas sa pagsuporta kanila sa maong mga sitwasyon.

• Ang ubang mga sakop sa imong klase mahimong nakadawat og gamay nga suporta gikan sa ilang mga pamilya samtang naningkamot sila nga mosunod sa ebanghelyo—ug mahimo pa gani nga nagsagubang sila og oposisyon. Unsa ang atong makat-unan gikan sa ehemplo ni Abraham diha sa Abraham 1:1–19 nga makatabang niadtong naningkamot nga magpakabuhi sa matarung nga paagi sa maong mga sitwasyon?

• Mahimo nimong hangyuon ang mga sakop sa klase sa pagbasa sa Hubad ni Joseph Smith, Genesis 14:36–40 (diha sa Giya ngadto sa mga Kasulatan) ug sa pagpaambit kon unsay ilang nakat-unan mahitungod sa hugot nga pagtuo ug mga tinguha ni Abraham. Mahimo usab silang mopaambit kon sa unsang paagi sila napanalanginan sa dihang ilang gipakita ang ilang hugot nga pagtuo sa pagbayad og ikapulo.

Abraham 2:6–11

Ang pakigsaad kang Abraham makapanalangin kanatong tanan.

• Aron matabangan ang mga sakop sa klase nga makasabut kon unsa ang pakigsaad kang Abraham, mahimo nimong ipaambit ang mga pamahayag ni Presidente Russell M. Nelson diha sa “Dugang nga mga Kapanguhaan” (tan-awa usab sa Gospel Topics, “Abrahamic Covenant,” topics.ChurchofJesusChrist.org). Ang mga sakop sa klase mahimong nakakat-on mahitungod sa pakigsaad kang Abraham gikan sa Abraham 2:6–11, sigun sa gisugyot diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Tingali ang mga sakop sa klase mahimong mopaambit kon unsay ilang nakat-unan, o ang klase mahimong magtuon og dungan niini nga mga bersikulo. Unsa nga mga saad ug mga responsibilidad ang atong madawat pinaagi sa pakigsaad kang Abraham? Unsa ang kinahanglan natong buhaton aron makadawat sa mga panalangin niini nga pakigsaad? Unsaon man nato, isip mga kaliwat ni Abraham, sa pagpanalangin sa “tanan nga mga banay sa yuta”? (Abraham 2:11).

Genesis 14:18–19; Hubad ni Joseph Smith, Genesis 14:25–40

“Si Melchizedek mao ang usa ka tawo sa hugot nga pagtuo.”

• Tungod sa Pagpahiuli sa ebanghelyo, kadaghanan sa mga miyembro sa Simbahan pamilyar sa Melchizedek nga Pagkapari, apan ang uban wala makahibalo mahitungod sa tawo nga si Melchizedek. Aron matabangan ang mga sakop sa klase nga makakat-on pa og dugang mahitungod kaniya, tingali mahimo nimo silang dapiton sa paghunahuna nga gihangyo sila sa pagpaila-ila kaniya ngadto sa usa ka tawo nga wala makaila kaniya ug sa paghimo og lista diha sa pisara bahin sa mga butang nga ilang isulti. Mahimo nilang ibase kini nga mga butang sa unsay ilang nabasahan sa Hubad ni Joseph Smith, Genesis 14:26–27, 33–38 (diha sa Giya ngadto sa mga Kasulatan); Alma 13:13–19; ug Doktrina ug mga Pakigsaad 107:1–4. Unsay atong nakat-unan mahitungod sa Melchizedek nga Pagkapari gikan niini nga mga bersikulo?

  

  Melchizedek Blesses Abram [Si Melchizedek Mipanalangin kang Abram], ni Walter Rane

Dugang nga mga Kapanguhaan

Mga panalangin sa pakigsaad kang Abraham.

Si Presidente Russell M. Nelson nagtudlo:

“Ang pakigsaad nga gihimo sa Dios uban kang Abraham ug sa wala madugay gipanghimatuod og usab uban ni Isaac ug ni Jacob usa ka talagsaong kahulugan. … Ang Ginoo mipakita niining ulahing mga adlaw sa pagbag-o sa pakigsaad kang Abraham. … Uban niini nga pagbag-o, atong nadawat, sama kanila sa karaan, ang balaang priesthood ug ang mahangturong ebanghelyo. Kita adunay katungod sa pagdawat sa kahingpitan sa ebanghelyo, pagpahimulos sa mga panalangin sa priesthood, ug pagpakasarang sa labing dako nga panalangin sa Dios—kana mao ang kinabuhing walay katapusan” (“Mga Pakigsaad,” Liahona, Nob. 2011, 87–88).

“Ang labing mahinungdanon nga mga panalangin sa pakigsaad kang Abraham ihatag diha sa balaang mga templo. Kining mga panalangin motugot kanato nga mobangon sa Unang Pagkabanhaw ug makapanunod sa mga trono, mga gingharian, mga kagamhanan, mga kayutaan, ug kamandoan, ngadto sa atong ‘pagkahimaya ug himaya sa tanan nga mga butang’ [Doktrina ug mga Pakigsaad 132:19]” (“Special Witnesses of Christ,” Ensign, Abr. 2001, 7).

Pagpalambo sa Atong Pagtudlo

Paghatag kanunay og pagpamatuod. Ang imong yano, kinasingkasing nga pagsaksi sa espirituhanong kamatuoran mahimong adunay gamhanang impluwensya sa imong mga gitudloan. Sama pananglit, mahimong mopaambit ka og usa ka yano nga pagpamatuod kon sa unsang paagi nga ang mga pakigsaad nakapanalangin sa imong kinabuhi.