Paghulagway kang Rebeca, ni Dilleen Marsh

Pebrero 21–27

Genesis 24–27

Ang Pakigsaad Gibag-o

Samtang magbasa ka sa Genesis 24–27, pag-ampo aron masayud kon unsaon nimo sa pag-awhag ang mga sakop sa klase nga makabaton og kaugalingon nilang mga kasinatian sa pagkat-on gikan sa mga kasulatan.

Irekord ang Imong mga Impresyon

Dapita ang Pagpaambit

Aron sa pag-awhag sa mga sakop sa klase nga mopaambit sa ilang mga ideya gikan sa Genesis 24–27, mahimo nimo silang dapiton sa pagpili og usa ka piho nga tudling nga nakapadasig kanila ug sa pagsulat niini diha sa usa ka piraso nga papel. Kolektaha ang mga papel, ug pagpili og pipila nga basahon ug hisgutan isip usa ka klase.

Itudlo ang Doktrina

Genesis 24

Ang kaminyoon diha sa pakigsaad mahinungdanon sa mahangturong plano sa Dios.

• Ang importansya nga gihatag ni Abraham sa pagpangita og asawa alang ni Isaac naghatag og oportunidad sa paghisgot sa kaimportante sa kaminyoon diha sa pakigsaad sa plano sa Dios alang kanato. Sa pagsugod sa panaghisgutan, ang mga sakop sa klase mahimo nga mobasa og daklit sa Genesis 24 ug mopaambit sa mga butang nga gibuhat sa Ginoo aron sa pagtabang nga mahiusa og balik si Isaac ug si Rebeca diha sa kaminyoon. Nganong ang kaminyoon importante man sa Ginoo? Aron matabangan ang mga sakop sa klase sa paghisgot niini nga pangutana, mahimo nimong ipaambit kanila ang pamahayag ni Elder D. Todd Christofferson diha sa “Dugang nga mga Kapanguhaan.” Sa unsang paagi nga makatabang kita sa pagsiguro nga ang mga katuyoan sa Dios alang sa kaminyoon matuman?

• Pangutan-a ang mga sakop sa klase kon unsa nga mga kinaiya ang ilang nakita diha sa usa ka kapikas, mga ginikanan, o ubang minyo nga mga managtiayon nga nakatampo sa usa ka matinud-anon, malipayon nga kaminyoon. Ang asoy diha sa Genesis 24 nagpakita og mga kinaiya nga makatabang sa usa ka tawo nga makamugna og kalipay diha sa kaminyoon—ug uban pang mga aspeto sa kinabuhi. Sama pananglit, sa bersikulo 12 makakat-on kita mahitungod sa pagkaginiyahan pinaagi sa pag-ampo, ug sa bersikulo 19 makakat-on kita mahitungod sa paghatag og dugang nga paningkamot diha sa pagserbisyo. Unsa ang uban pa nga mga baruganan nga makita diha niini nga mga kapitulo? Ang mga sakop sa klase mahimo usab nga mangita diha sa “Ang Pamilya: Usa ka Pamahayag ngadto sa Kalibutan” (ChurchofJesusChrist.org).

Genesis 25:29–34

Makapili kita tali sa dinalian nga katagbawan ug sa mga butang nga mas dako og bili.

• Sa unsa kaha nga paagi nga makatabang ka sa mga sakop sa klase nga makakita og personal nga mga leksyon gikan sa mga kasinatian ni Jacob ug ni Esau? Usa ka ideya mao ang pagdapit kanila nga maghimo og duha ka lista diha sa pisara—ang usa bahin sa mahangturong mga panalangin nga gusto sa Dios nga ihatag kanato ug ang lain bahin sa kalibutanong mga butang nga makabalda kanato palayo niadtong mga panalangin. Dayon ang mga sakop sa klase mahimong mobasa sa Genesis 25:29–34, pulihan ang “katungod sa pagkapanganay” og usa ka butang gikan sa unang lista ug pulihan ang “linat-an” og usa ka butang gikan sa ikaduhang lista. Sa unsang paagi nga ang kaaway mosulay sa pagkombinser kanato nga ibaylo ang mga panalangin sa Dios alang sa mga butang nga minos og bili? Ikonsiderar ang pagdapit sa mga sakop sa klase nga mohatag sa usag usa og tambag kon unsaon sa pagpokus diha sa Manluluwas ug sa mahangturong mga panalangin nga Iyang gitanyag kanato.

Genesis 26:18–25, 32–33

Si Jesukristo mao ang atabay sa buhi nga tubig.

• Ang Genesis 26 naghisgot sa pipila ka higayon nga si Isaac ug ang iyang kapamilya kinahanglang magkalot og mga atabay aron makakita og tubig, ug kasagaran nanginahanglan kini og dakong paningkamot. Kini nga kamatuoran makatabang kanimo sa pagtudlo sa mga sakop sa klase mahitungod sa paningkamot nga gikinahanglan aron madala ang “buhi nga tubig” sa Manluluwas nganhi sa atong kinabuhi (tan-awa sa Juan 4:10). Tingali mahimo nimo kining mahulagway pinaagi sa usa ka drowing diha sa pisara sa usa ka tinubdan sa tubig nga gitabunan og daghang yuta. Ang mga sakop sa klase mahimong magpuli-puli sa pagpapas sa pipila ka yuta samtang ilang ihulagway kon unsaon nila sa pagkakita sa buhi nga tubig sa Manluluwas. Awhaga sila sa paggamit sa Giya ngadto sa mga Kasulatan aron makakita sa mga bersikulo nga may kalabutan sa mga butang nga ilang gipaambit.

  

  Usa ka karaan nga atabay sa Beer-sheba, diin si Abraham ug si Isaac nagkalot og mga atabay.

Dugang nga mga Kapanguhaan

Ang kaminyoon ug ang pamilya gilalang sa Dios.

Si Elder D. Todd Christofferson mihatag og pipila ka rason kon ngano nga ang kaminyoon ug ang pamilya importante kaayo sa plano sa Dios:

“Ang pamilya nga gitukod diha sa kaminyoon sa lalaki ug babaye nagsangkap sa labing maayo nga kahimtang aron ang plano sa Dios molambo—ang kahimtang alang sa pagkahimugso sa mga anak, nga moabut diha sa kaputli ug kainosente gikan sa Dios, ug ang palibut alang sa pagkat-on ug pagpangandam nga ilang gikinahanglan sa malampuson nga mortal nga kinabuhi ug kinabuhing dayon sa kalibutan nga moabut. Ang minimum nga gidaghanon sa mga pamilya nga gitukod sa ingon nga kaminyoon importante aron ang mga katilingban matunhay ug molambo. …

“… Apan ang atong pangangkon alang sa tahas sa kaminyoon ug pamilya wala magbase sa social science apan sa kamatuoran nga kini gimugna sa Dios. Siya mao kinsa sa sinugdanan milalang kang Adan ug Eva diha sa Iyang hitsura, lalaki ug babaye, ug mihiusa kanila isip bana ug asawa aron mahimong ‘usa ka unod’ ug sa pagsanay ug pagpuno sa yuta. Ang matag indibidwal nagdala sa balaang hitsura, apan diha kini sa panaghiusa sa kaminyoon sa lalaki ug babaye isip usa nga atong makab-ot tingali ang labing kompleto nga kahulugan sa atong pagkalalang diha sa hitsura sa Dios—lalaki ug babaye. … Ang ingon nga kaminyoon … ingon ka dakong bahin sa plano sa kalipay sama sa Pagkapukan ug Pag-ula” (“Nganong Kaminyoon, Nganong Pamilya,” Liahona, Mayo 2015, 52).

Pagpalambo sa Atong Pagtudlo

Itutok ang imong pagtudlo diha sa doktrina. Samtang dapiton nimo ang mga sakop sa klase nga mopaambit, siguroa nga padayon nimong ibalik ang panaghisgutan ngadto sa doktrina diha sa mga kasulatan. Mahimo nimo kining buhaton pinaagi sa paghangyo sa mga sakop sa klase sa pagbasa og mga tudling sa kasulatan diha sa klase, mangutana kon unsay giingon sa mga kasulatan, ug sa pagdapit sa mga sakop sa klase nga mopaambit sa ilang mga pagpamatuod bahin sa doktrina nga gitudlo.