Templo sa Tijuana Mexico

Pebrero 28–Marso 6

Genesis 28–33

“Sa Pagkamatuod ang Ginoo Ania Niining Dapita”

Samtang mangandam ka sa pagtudlo, ikonsiderar sa mainampuong paagi kon unsa nga mga baruganan diha sa Genesis 28–33 ang labing makatabang sa mga sakop sa imong klase. Ang mosunod nga mga ideya gitumong aron idugang sa imong personal nga pagtuon ug inspirasyon.

Irekord ang Imong mga Impresyon

pagpaambit nga icon

Dapita ang Pagpaambit

Usa ka panalangin nga magpundok sa usa ka klase sa Sunday School mao nga ang mga miyembro makatabang sa usag usa aron makakita og kahulugan diha sa mga kasulatan. Awhaga ang mga sakop sa klase nga mopaambit sa usa ka tawo nga naglingkod sa duol kon unsay gitudlo sa Espiritu Santo kanila samtang nagtuon sila sa mga kasulatan niini nga semana. Ang pipila mahimong dapiton nga mopaambit sa klase sa unsay ilang nahisgutan. Mahimo kining makamugna og maayong dapit nga kasugdan alang sa panaghisgutan sa klase.

icon sa pagtudlo

Itudlo ang Doktrina

Genesis 28:10–22

Diha sa templo maghimo kita og mga pakigsaad sa Dios.

• Sa unsa kaha nga paagi nga imong matabangan ang mga sakop sa klase nga makakita og kahulugan diha sa kasinatian ni Jacob didto sa Bethel, sigun sa gihulagway sa Genesis 28:10–22? Mahimo nilang sugdan pinaagi sa pagribyu sa Genesis 27:41–45; 28:1–5 ug sa pagkonsiderar sa kinabuhi ni Jacob nianang panahona. Unsa kaha ang gibati ni Jacob? Ang mga sakop sa klase mahimo dayon nga mosuhid sa Genesis 28:10–22. Sa unsang paagi nga kining kasinatian nakapanalangin ni Jacob? Giunsa kaha siya sa paghupay? Sa unsang paagi kaha nga ang kasinatian ni Jacob makapadasig kanato samtang magsimba kita diha sa templo? Ang klase mahimo usab nga mokanta, mobasa, o maminaw sa “Mas Magpaduol Ko Dios Kanimo,” nga gibase niini nga mga bersikulo (Mga Himno, nu. 55). Mahimo silang mopaambit og mga hugpong sa mga pulong gikan sa awit o gikan sa Genesis 28:10–22 nga magpahinumdom kanila sa ilang mga kasinatian nga misulay nga mas mapaduol sa Manluluwas.

• Ang hagdan nga nakita ni Jacob sa iyang damgo kanunay nga gitandi sa mga pakigsaad sa templo. Siguro ikaw mahimong mopakita o magdrowing og hulagway sa usa ka hagdan ug usa ka templo. Ang mga sakop sa klase mahimong moribyu sa Genesis 28:10–22 ug maghisgot kon unsay matudlo kanato sa hagdan diha sa damgo ni Jacob mahitungod sa templo. Unsa pa ang atong makita dinhi niini nga mga bersikulo nga makapahinumdom kanato sa mga panalangin nga atong madawat tungod sa atong mga pakigsaad sa templo?

• Aron matabangan ang mga sakop sa klase nga makapamalandong sa mga saad sa pakigsaad kang Abraham, nga gibag-o sa Ginoo kang Jacob, mahimo nimo silang dapiton sa pagbasa sa Genesis 28:10–15 ug sa paghisgot kon unsaon nato sa pagdawat niining mga panalangin karon (tan-awa usab sa Genesis 12:2–3). Mahimo usab nilang mabasa ang pamahayag ni Presidente Russell M. Nelson diha sa “Dugang nga mga Kapanguhaan,” nga mangita sa mga panalangin nga moabut gumikan sa paghimo ug pagtuman sa mga pakigsaad. Sa unsang paagi nga si Jacob napanalanginan pinaagi sa pagdawat sa mga saad nga makita diha sa Genesis 28:10–15? Unsa nga mga koneksyon ang atong makita tali sa mga panghitabo dinhi niini nga mga bersikulo ug sa mga panghitabo sa Genesis 29 ug 30 (ang pagkaminyo ni Jacob ug ang pagkahimugso sa iyang mga anak)? Sa unsang paagi kita gipanalanginan sa Ginoo samtang naghimo ug nagtuman kita sa sagradong mga pakigsaad?

Jacob ug Esau nga nagginaksanay”

Paghulagway kang Jacob ug Esau nga nagginaksanay, ni Robert T. Barrett

Genesis 32–33

Ang Manluluwas makatabang kanato sa pagbuntog sa panagbingkil diha sa atong mga pamilya.

• Ang Genesis 32–33 mahimong makapadasig sa mga sakop sa klase nga gustong makakita og pagkaayo diha sa ilang mga relasyon sa pamilya. Mahimong makatabang ang paghangyo sa usa ka sakop sa klase sa pag-summarize sa daklit sa mga panghitabo nga narekord diha sa Genesis 27. Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya naglakip og mga pangutana nga pamalandungan samtang magtuon sa Genesis 32–33. Tingali ang mga sakop sa klase mahimong mopili og usa niining mga pangutana ug mangita og mga tubag diha sa mga kapitulo. Siguro andam usab silang mopaambit sa ilang mga kasinatian sa pagpalig-on sa dili suod nga mga relasyon diha sa ilang mga pamilya. Awhaga sila nga maghisgot kon giunsa sa Langitnong Amahan sa pagtabang kanila.

icon sa dugang nga mga kapanguhaan

Dugang nga mga Kapanguhaan

Kita mga anak sa pakigsaad.

Si Presidente Russell M. Nelson nagtudlo:

“Sa bunyag nakigsaad kita sa pagserbisyo sa Ginoo ug sa pagsunod sa Iyang mga sugo. Kon kita moambit sa sakrament, kita nagbag-o niana nga pakigsaad ug nagpahayag sa atong kaandam sa pagdala diha sa atong mga kaugalingon sa pangalan ni Jesukristo. Niana nga paagi kita gisagop isip Iyang anak nga mga lalaki ug mga babaye ug nailhan isip mga igsoon. Siya mao ang amahan sa atong bag-ong kinabuhi. Sa katapusan, diha sa balaang templo, kita mahimong mga manununod sa mga panalangin sa mahangturong pamilya, nga sa makausa gisaad ngadto ni Abraham, Isaac, Jacob, ug sa ilang kaliwatan. Sa ingon, ang celestial nga kaminyoon mao ang pakigsaad sa kahimayaan.

“Kon kita makaamgo nga kita mga anak sa pakigsaad, makaila kita kon kinsa kita ug unsa ang gipaabut sa Dios nato. Ang Iyang balaod nahisulat diha sa atong mga kasingkasing. Siya mao ang atong Dios ug kita Iyang katawhan. Mapasaligong mga anak sa pakigsaad nagpabilin nga makanunayon, bisan sa panahon sa kalisdanan. Kon kana nga doktrina nahimong kabahin sa atong kinabuhi, bisan ang hapdos sa kamatayon mahupay ug ang atong espirituhanong kusog malig-on” (“Mga Pakigsaad,” Liahona, Nob. 2011, 88–89).

Pagpalambo sa Atong Pagtudlo

Tabangi ang mga nagkat-on nga molihok sa mga pag-aghat. “Ang tinuod nga pagkakabig naglangkob og sobra pa kay sa mobati nga ang Espiritu nagkumpirmar sa kamatuoran ngadto sa atong mga kalag; kinahanglan usab kita nga molihok sumala niadto nga mga kamatuoran. Agig dugang sa pagtabang sa mga nagkat-on nga mobati ug moila sa Espiritu, tabangi sila sa pagsunod sa mga pag-aghat nga ilang nadawat” (Pagtudlo sumala sa Pamaagi sa Manluluwas, 10).