Paghulagway kang Jose sa Ehipto nga diha sa bilanggoan, ni Jeff Ward

Marso 7–13

Genesis 37–41

“Ang Ginoo Diha Nag-uban kang Jose”

Wala gitumong nga imong itudlo ang tanan sa mga kalihokan dinhi niini nga outline. Samtang mangandam ka sa pagtudlo, pag-ampo nga ang Espiritu motabang kanimo nga mahibalo kon hain sa mga kalihokan (kon aduna) dinhi niini nga outline ang labing makatubag sa mga panginahanglan sa imong klase.

Irekord ang Imong mga Impresyon

Dapita ang Pagpaambit

Aron maawhag ang mga sakop sa klase nga mopaambit sa unsay ilang nakat-unan sa ilang personal o pamilya nga pagtuon, mahimo nimo silang dapiton sa pagpangita og usa ka hugpong sa mga pulong diha sa Genesis 37–41 nga nagpahayag og usa ka leksyon o baruganan nga ilang gibati nga importante.

Itudlo ang Doktrina

Genesis 37:1–28; 39; 40:1–19; 41:9–45

“Ang Ginoo diha nag-uban kang Jose” sa iyang kalisdanan.

• Sama ni Jose, ang mga sakop sa imong klase mahimong nakasinati og lisud nga mga pagsulay. Aron matabangan ang klase nga makakita og inspirasyon diha sa ehemplo ni Jose, mahimo nimo silang bahinon ngadto sa tulo ka grupo ug hangyuon ang matag grupo sa pagribyu sa usa sa mosunod nga mga tudling sa kasulatan: Genesis 39; 40:1–19; o 41:9–45. Ang matag grupo mahimo dayon nga mopaambit og mga paagi nga ang Ginoo diha nag-uban kang Jose sa iyang mga hagit. Kon angay, ang mga sakop sa klase mahimo nga mopaambit og mga kasinatian sa dihang ang Ginoo nag-uban kanila atol sa usa ka lisud nga pagsulay. Sa unsang paagi nga makakat-on kita aron mas makakita sa presensya sa Ginoo sa atong kinabuhi?

• Kini nga leksyon nga maggamit og mga butang [object lesson] makatabang sa paghulagway kon sa unsang paagi kita makabuntog sa kalisdanan: pagpahimutang og gaan nga butang, sama sa gamayng bola nga plastik, diha sa ilawom sa sudlanan nga gibutangan ang katunga niini og uga nga humay o beans. Dapita ang usa ka tawo sa pag-uyog og hinay sa sudlanan hangtud nga ang bola mosaka sa ibabaw. Sa unsang paagi nga si Jose susama sa bola? Ang mga sakop sa klase mahimong mopaambit og mga ehemplo sa Ginoo nga mitabang kang Jose nga makabuntog sa kalisdanan gikan sa Genesis 37:5–11; 39; 40:1–19; 41:9–45. Mahimo usab silang mopaambit sa mga higayon sa dihang ang Ginoo mitabang kanila sa susamang mga paagi.

• Mahimo nimong hangyuon ang mga sakop sa klase sa pagkanta o pagbasa sa mga pulong sa usa ka himno mahitungod sa paghimo og matarung nga mga pagpili, sama sa “Buhata Unsa ang Matarung” (Mga Himno, nu. 145). Dayon ang mga sakop sa klase mahimong mangita og mga ideya o mga hugpong sa mga pulong diha sa Genesis 37:1–28; 39; 40:1–19; 41:9–45 nga naghulagway sa mga mensahe sa himno. Sa unsang paagi nga si Jose napanalanginan, bisan pa man sa iyang kalisdanan, sa dihang gibuhat niya kon unsa ang matarung? Kanus-a kita gipanalanginan sa Ginoo sa mga panahon sa kalisdanan tungod sa pagbuhat sa matarung nga butang?

Genesis 37:5–11; 40; 41:1–38

Kon kita matinud-anon, ang Ginoo mogiya ug modasig kanato.

• Bisan kon dili tanan ang makadawat og personal nga pagpadayag pinaagi sa mga damgo, adunay mga butang nga atong makat-unan mahitungod sa pagpadayag gikan sa mga kasinatian ni Jose, sa mga sulugoon sa Paraon, ug sa Paraon. Mahimo nimong dapiton ang mga sakop sa klase sa pagribyu sa Genesis 37:5–11; 40:5–8; 41:14–25, 37–38 ug sa pagpaambit og bisan unsa nga ilang nakat-unan mahitungod sa pagpadayag. Mahimo usab nimo silang dapiton sa pagpaambit kon unsay nakatabang kanila nga maandam sa pagdawat, pagsabut, ug paglihok sa pagpadayag.

  

  Joseph Interpreting the Butler and Baker’s Dreams [Si Jose nga Naghubad sa mga Damgo sa Magbalantay sa Bino ug Magbubuhat sa Tinapay], ni François Gérard

Genesis 39:1–20

Pinaagi sa tabang sa Ginoo, makapalayo kita sa tintasyon.

• Mahimo nimong hangyuon ang mga sakop sa klase sa pagpaambit kon unsay ilang nakat-unan mahitungod sa pagbatok sa mga tintasyon samtang magbasa sila sa Genesis 39 niini nga semana. Unsay gibuhat ni Jose aron makabuntog sa tintasyon? (tan-awa sa mga bersikulo 7–12). Ikonsiderar ang paghangyo sa mga sakop sa klase nga maghimo og usa ka lista sa mga butang nga atong mabuhat aron makagamit sa gahum sa Dios kon mag-atubang kita og mga tintasyon. (Ang mga sakop sa klase mahimong makakita og mga ideya diha sa Mateo 4:1–11 o sa mga kasulatan nga gilista ubos sa “Pagtintal, Tintal” diha sa Giya ngadto sa mga Kasulatan [scriptures.ChurchofJesusChrist.org].)

• Unsaon nimo sa paggamit ang ehemplo ni Jose aron sa pagtabang sa mga sakop sa klase nga makabatok sa tintasyon nga mohimo og sekswal nga sala? Agig dugang sa pagribyu sa Genesis 39:1–20, ang mga sakop sa klase mahimong moribyu sa “Sekswal nga Kaputli” (diha sa Alang sa Kalig-on sa mga Kabatan-onan [2011], 35–37). Mahimo silang mopaambit sa unsay ilang nakat-unan mahitungod sa pagbatok sa mga hunahuna, mga pulong, ug mga lihok nga moresulta sa sekswal nga sala. Ang pagribyu sa “Paghinulsol” (diha sa Alang sa Kalig-on sa mga Kabatan-onan, 28–29) makatabang sa mga sakop sa klase nga makasabut sa oportunidad nga gitanyag ni Jesukristo kanato nga maghinulsol.

Genesis 41:15–57

Kinahanglan kitang mangandam alang sa posible nga mga kalisdanan.

• Mahimo nimong hangyuon ang usa ka sakop sa klase sa paghulagway sa mga damgo sa Paraon (tan-awa sa Genesis 41:15–24) ug ang lain sa pagpaambit sa mga hubad ni Jose (tan-awa sa mga bersikulo 25–32). Unsay gisugyot ni Jose nga angayang buhaton? (tan-awa sa mga bersikulo 33–36, 47–49). Unsa ang mga leksyon nga anaa niini nga asoy alang sa atong panahon? (tan-awa sa tambag ni Presidente Gordon B. Hinckley diha sa “Dugang nga mga Kapanguhaan”).

Dugang nga mga Kapanguhaan

Mangandam alang sa mga panahon sa kalisud.

Si Presidente Gordon B. Hinckley miingon: “Awhagon ko kamo sa paghinay-hinay sa inyong mga galastuhan; disiplinaha ang inyong kaugalingon sa inyong mga pagpamalit aron kutob sa mahimo makalikay sa utang. Bayari ang utang sa labing daling panahon kutob sa inyong mahimo. … Pagbaton og reserba, bisan unsa pa kini ka gamay” (“To the Boys and to the Men,” Ensign, Nob. 1998, 54).

Pagpalambo sa Atong Pagtudlo

Ang pagpaminaw usa ka buhat sa gugma. “Hangyoa ang Langitnong Amahan sa pagtabang kanimo nga makasabut kon unsay isulti sa mga sakop sa imong klase. Samtang hatagan nimo og mainampingong pagtagad ang ilang gipamulong ug wala gipamulong nga mga mensahe, mas makasabut ka sa ilang mga panginahanglan” (Pagtudlo sumala sa Pamaagi sa Manluluwas, 34).