Si Moises ug ang nagdilaab nga sagbut

Moses and the Burning Bush [Si Moises ug ang Nagdilaab nga Sagbut], ni Harry Anderson

Marso 21–27

Exodo 1–6

“Nahinumduman Ko ang Akong Tugon [Pakigsaad]”

Samtang magbasa ka sa Exodo 1–6, hunahunaa ang mga tawo nga imong gitudloan. Unsa ang mga kamatuoran dinhi niini nga mga kapitulo ang posible nga makahuluganon ngadto kanila? Unsaon nimo sa pagtabang kanila nga makadiskubre niining mga kamatuoran?

Irekord ang Imong mga Impresyon

pagpaambit nga icon

Dapita ang Pagpaambit

Usa ka ideya sa pag-awhag sa mga sakop sa klase nga mopaambit sa unsay ilang nakat-unan mao ang pagsulat og usa ka pangutana sama niini diha sa pisara: Samtang nagbasa kamo sa Exodo 1–6, unsay inyong nabantayan nga wala pa ninyo mabantayi sa una? Dapita ang mga sakop sa klase nga mopaambit sa ilang mga tubag.

icon sa pagtudlo

Itudlo ang Doktrina

Exodo 1–2

Si Jesukristo mao ang atong Tigluwas.

• Bisan tuod nga ang Manluluwas wala hisguti pinaagi sa ngalan diha sa Exodo 1–2, kini nga asoy makatabang sa mga sakop sa klase sa pag-ugmad og hugot nga pagtuo sa Iyang misyon sa pagluwas kanato gikan sa pagkabihag. Tabangi ang mga sakop sa klase sa pagpangita og mga pulong o mga hugpong sa mga pulong diha sa Exodo 1–2 nga naghulagway sa mga kalisdanan nga nasinati sa mga Israelihanon. Sa unsang paagi nga kining mga paghulagway susama sa espirituhanong pagkabihag o sa uban pa nga mga kalisdanan nga atong nasinati? Giunsa sa mga anak ni Israel sa pagtinguha og kaluwasan, ug giunsa pagtubag sa Dios kanila? (tan-awa usab sa Exodo 2:23–25; 3:7–8). Unsaon nato sa pagdawat sa gahum sa Dios kon magkinahanglan kita og kaluwasan? Unsaon sa Dios pagtubag ang atong mga pangamuyo alang sa tabang? Ang mga sakop sa klase mahimong mangita og dugang nga mga ideya diha sa mensahe ni Presidente Russell M. Nelson nga “Pagdawat sa Gahum ni Jesukristo diha sa Atong Kinabuhi” (Liahona, Mayo 2017, 39–42).

  Ang masuso nga si Moises diha sa sulod sa basket

  Moses in the Bulrushes [Si Moises diha sa mga Banban], © Providence Collection/gihatagan og lisensya gikan sa goodsalt.com

Exodo 3–4

Samtang maghimo kita sa buhat sa Ginoo, makabaton kita sa gahum sa Ginoo.

• Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot sa pagsiksik sa Exodo 3–4 aron mahibalo kon giunsa pagtubag sa Ginoo ang mga gikabalak-an ni Moises mahitungod sa buluhaton sa pagluwas sa mga Israelihanon gikan sa pagkabihag. Kon ang mga sakop sa imong klase mihimo niini nga kalihokan diha sa panimalay, dapita sila sa pagpaambit sa unsay ilang nakat-unan. O mahimo ninyong buhaton kini nga kalihokan isip usa ka klase. Sa piho nga paagi, ang mga sakop sa klase mahimong mosiksik sa Exodo 3:11–18; 4:1–17, nga mangita sa mga gikabalak-an ni Moises ug sa tubag sa Ginoo sa matag usa niini. Sa unsang paagi nga ang mga tubag sa Ginoo makatabang kanato kon kita adunay mga pagduha-duha mahitungod sa atong mga abilidad sa paghimo sa Iyang buhat?

Exodo 3:5

Kinahanglan kita nga magpakita og balaang pagtahud alang sa balaang mga butang ug mga dapit.

• Unsaon nimo sa paggamit ang ehemplo ni Moises aron sa pagdasig og panaghisgutan kon unsaon nato sa pagtagad ang sagradong mga butang? Sama pananglit, human mabasa og dungan ang Exodo 3:5, mahimong magpakita ka og sagradong mga butang o mga hulagway sa sagradong mga butang (sama sa mga kasulatan o mga templo) ug komon nga mga butang o mga hulagway sa komon nga mga butang (sama sa sekular nga mga libro o regular nga mga gambalay [building]). Ang mga sakop sa klase mahimong maghisgot mahitungod sa uban pa nga mga butang nga ilang gikonsiderar nga sagrado ug mopaambit kon giunsa nila sa pagpakita og balaang pagtahud alang niana nga mga butang (tan-awa usab sa Levitico 19:30; Doktrina ug mga Pakigsaad 6:10–12). Nganong ang Manluluwas gusto man nga atong tagdon ang sagradong mga butang nga may balaang pagtahud?

Exodo 5:4–9, 20–23; 6:1–13

Ang mga katuyoan sa Ginoo matuman sa kaugalingon Niyang panahon.

• Mahimong makapawaIa kini og kadasig kon ang atong sinsero nga mga paningkamot sa pagbuhat og maayo morag wala mosalir—tingali usa ka higala wala motubag sa atong mga paningkamot sa pagpangalagad o ang atong mga pag-ampo alang sa usa ka nahisalaag nga anak morag wala matubag. Aron makakat-on mahitungod sa susama nga kasinatian nga nasinati ni Moises, ang mga sakop sa klase mahimong mobasa sa Exodo 5:4–9, 20–23. Giunsa sa Ginoo pagtabang si Moises nga makabuntog sa iyang mga pagbati sa pagkawalay kadasig? (tan-awa sa Exodo 6:1–13). Ang mga sakop sa klase mahimong mopaambit og mga kasinatian sa dihang wala dayon sila makakita og mga resulta gikan sa ilang mga paningkamot sa pagserbisyo sa Ginoo. Unsa ang matudlo kanato sa kasinatian ni Moises niini nga mga kapitulo kon sa unsang paagi kita makatubag sa susamang mga sitwasyon? (Tan-awa usab diha sa “Dugang nga mga Kapanguhaan.”)

icon sa dugang nga mga kapanguhaan

Dugang nga mga Kapanguhaan

Moserbisyo kita sa uban alang sa Ginoo.

Si Presidente Joy D. Jones misulti kanato kon giunsa niya ug sa iyang bana pagserbisyo sa matinud-anong paagi sa usa ka buluhaton sa pagpangalagad apan wala makakita og kalampusan gikan sa ilang mga paningkamot. Ang magtiayon namalandong ug nag-ampo alang sa giya. Misaysay og balik bahin sa tubag sa ilang mga pag-ampo, si Presidente Jones miingon:

“Nakaamgo kami nga matinud-anon kaming naningkamot sa pagserbisyo niini nga pamilya ug sa pagserbisyo sa among bishop, apan kinahanglan kaming mangutana sa among kaugalingon kon tinuoray ba kaming nagserbisyo tungod sa gugma alang sa Ginoo. Si Haring Benjamin mitataw sa kalainan sa dihang siya namahayag, ‘Tan-awa, ako moingon nganha kaninyo nga tungod kay ako miingon nganha kaninyo nga ako migahin sa akong mga adlaw diha sa pag-alagad kaninyo, ako wala magtinguha sa pagpanghambog, kay ako anaa lamang sa pag-alagad sa Dios’ [Mosiah 2:16; emphasis gidugang].

“Nan kinsa man gayud ang gialagaran ni Haring Benjamin? Ang Langitnong Amahan ug ang Manluluwas. Ang pagkahibalo sa kinsa ug sa ngano sa pagserbisyo sa uban makatabang kanato sa pagsabut nga ang kinatas-an nga pagpakita sa gugma mao ang debosyon ngadto sa Dios” (“Alang Kaniya,” Liahona, Nob. 2018, 50).

Pagpalambo sa Atong Pagtudlo

Ipaambit ang espirituhanon nga mga kasinatian. Usa ka paagi sa pagdapit sa impluwensya sa Espiritu ngadto sa imong klase mao ang pag-awhag sa mga sakop sa klase sa pagpaambit kon unsay gitudlo sa Espiritu Santo kanila samtang nagtuon sila sa mga kasulatan niini nga semana.