Paghulagway kang Moises ug Aaron diha sa hukmanan ni Paraon, ni Robert T. Barrett

Marso 28–Abril 3

Exodo 7–13

“Hinumdumi Ninyo Kining Adlawa, nga Kamo Mipahawa gikan sa Ehipto”

Ang imong abilidad nga magiyahan sa Espiritu sa imong pagtudlo mapalambo gayud samtang makabaton ka sa imong kaugalingong kasinatian sa pagtuon sa Exodo 7–13.

Irekord ang Imong mga Impresyon

Dapita ang Pagpaambit

Hunahunaa ang usa o duha ka pangutana nga makapaawhag sa mga sakop sa klase nga mopaambit sa ilang mga ideya ug mga kasinatian samtang nagtuon sila sa Exodo 7–13 sa indibidwal nga paagi ug kauban ang ilang mga pamilya. Sama pananglit, mahimo kang mangutana, “Unsa ang inyong nabasahan niini nga semana nga nakapalig-on sa inyong pagtuo diha kang Jesukristo?” o “Unsa ang inyong nabasahan nga usa ka panalangin sa inyong pamilya?”

Itudlo ang Doktrina

Exodo 7–12

Mahimo kitang mopili sa pagpahumok sa atong kasingkasing.

• Aron matabangan ang mga sakop sa klase sa paghunahuna mahitungod sa ilang kaandam nga motugyan sa ilang kasingkasing ngadto sa Dios, mahimo nimo silang hangyuon nga ang matag usa mobasa sa usa sa mosunod nga mga tudling sa kasulatan: Exodo 7:14–25; 8:5–15; 8:16–19; 8:20–32; 9:1–7; 9:8–12; 9:22–26; 10:12–15; 10:21–29; 12:29–33. Dayon mahimo nilang isulat diha sa pisara ang mga pulong o mga hugpong sa mga pulong nga naghulagway kon giunsa pagtubag ni Paraon ang napulo ka hampak [plague] nga gipadala sa Dios ngadto sa mga Ehiptohanon. (Siguro gusto nimong ipasabut nga ang mga kausaban sa Hubad ni Joseph Smith nagpakita nga si Paraon mipatig-a sa iyang kaugalingong kasingkasing.) Ngano kaha nga si Paraon mitubag man sa paagi nga iyang gihimo? Ngano kaha nga usahay lisud man nga itugyan ang atong kasingkasing ug mga kabubut-on ngadto sa Dios? Sa unsang paagi nga ang Langitnong Amahan ug si Jesukristo nakatabang kanato aron mabuntog kining mga kalisdanan?

• Pinaagi sa pagdala ngadto sa klase og gahi nga butang ug humok nga butang, makatabang ka sa mga sakop sa klase nga makasabut kon unsay gipasabut sa pagbaton og gahi [tig-a] ug humok nga kasingkasing. Mahimo nimong ipasa-pasa ang duha ka butang libut sa klase, samtang ang usa ka tawo magbasa sa usa sa mga paghulagway sa kasingkasing ni Paraon nga makita diha sa Exodo 7–10 (sama sa Exodo 9:22–35). Nganong ang “tig-a” usa man ka maayong paghulagway sa kasingkasing ni Paraon? Unsay gitudlo niini nga mga bersikulo kon unsay gipasabut sa pagbaton og humok nga kasingkasing? (Kon makatabang kini, ang mga sakop sa klase mahimo nga mangita og mga ideya sa usa o dugang pa niining mga kasulatan: 1 Nephi 2:16; Mosiah 3:19; Alma 24:7–8; 62:41; Ether 12:27.) Sa unsang paagi nga ang Manluluwas makatabang kanato sa pagpahumok sa atong kasingkasing?

• Aron matabangan ang mga sakop sa klase nga maghunahuna kon ngano nga ang Ginoo mipadala og mga hampak ngadto sa Ehipto, mahimo nimong dapiton ang matag sakop sa klase sa pagpili og usa ka pakisayran gikan sa mosunod nga lista ug sa pagpangita og posible nga mga rason: Exodo 3:20; 7:5, 17; 9:14–16; 10:1–2. Mahimo usab nimong dapiton ang mga sakop sa klase nga mopaambit kon giunsa nila pagkasayud nga “walay usa nga sama [sa Langitnong Amahan ug ni Jesukristo] sa tibuok nga yuta” (Exodo 9:14).

Exodo 12

Ang Pagpalabay ug ang sakramento nagtudlo mahitungod sa pagkaluwas pinaagi ni Jesukristo.

• Ang pagsaulog sa Kasaulogan sa Pagpalabay nakatabang sa mga anak sa Israel nga mahinumdom nga giluwas sila sa Ginoo gikan sa pagkabihag. Aron matabangan ang mga sakop sa klase nga makasabut sa simbolismo sa Pagpalabay, makahimo ka og duha ka kolum diha sa pisara nga butangan og ngalan nga Simbolo ug Posible nga Kahulugan, nga adunay hulagway ni Jesukristo sa ibabaw sa mga kolum. Ang mga sakop sa klase mahimong magtuon sa Exodo 12:1–13 ug mosulat diha sa pisara og bisan unsang butang gikan niini nga mga bersikulo nga makahatag og simbolismo sa atong pagkaluwas pinaagi ni Jesukristo. Mahimo dayon silang maghisgot kon unsay gitudlo kanato niining mga simbolo mahitungod sa Pag-ula sa Manluluwas (tan-awa sa table diha sa “Dugang nga mga Kapanguhaan” alang sa pipila ka ideya).

  

  Sama sa pagkaon sa Pagpalabay, ang sakramento makatabang kanato nga mahinumdom sa atong Tigluwas, si Jesukristo.

• Alang sa pipila ka tawo, ang sakramento dili kanunayng ingon ka espirituhanon sama sa unsay gikinahanglan unta. Ikonsiderar kon sa unsang paagi nga ang panaghisgutan sa Exodo 12 makatabang sa tanang sakop sa klase nga makakita og mas lawom nga kahulugan diha sa sakramento. Sama pananglit, human maribyu sa mga sakop sa klase ang Exodo 12, mahimo nimo silang dapiton sa pagpaambit kon unsa kaha ang masulti sa mga Israelihanon gikan nianang yugto sa panahon kon ang usa ka anak nga lalaki o babaye nangutana nila kon unsay kahulugan sa Pagpalabay ngadto kanila. Ang mga sakop sa klase mahimo dayon nga maghisgot kon unsay ilang masulti kon ang usa ka tawo nangutana kon unsay kahulugan sa sakramento ngadto nila, lakip na ang bisan unsa nga mga ideya nga ilang nabatunan gikan sa Pagpalabay. Mahimo nimong hatagan ang mga sakop sa klase og panahon nga mamalandong kon unsay ilang mahimo aron mahinumduman ang Manluluwas kada adlaw.

Dugang nga mga Kapanguhaan

Ang Pagpalabay nagtudlo mahitungod sa Manluluwas.

Simbolo	Posible nga Kahulugan
Simbolo Ang nati nga karnero [lamb] (Exodo 12:3–5)	Posible nga Kahulugan Jesukristo
Simbolo Dugo diha sa mga balabag sa pultahan (Exodo 12:7)	Posible nga Kahulugan Ang maulaong dugo ni Jesukristo, kinsa nagluwas kanato
Simbolo Ang pagkaon sa nati nga karnero (Exodo 12:8)	Posible nga Kahulugan Paghimo sa Manluluwas nga kabahin sa atong kinabuhi
Simbolo Utanon nga mapait (Exodo 12:8)	Posible nga Kahulugan Ang kapait sa pagkabihag (sala)

Pagpalambo sa Atong Pagtudlo

Paminaw. “Ang pagpaminaw usa ka buhat sa gugma. … Hangyoa ang Langitnong Amahan sa pagtabang kanimo nga makasabut kon unsay isulti sa mga sakop sa imong klase. Samtang hatagan nimo og mainampingong pagtagad ang ilang gipamulong ug wala gipamulong nga mga mensahe, mas makasabut ka sa ilang mga panginahanglan, sa ilang mga kabalaka, ug sa ilang mga tinguha” (Pagtudlo sumala sa Pamaagi sa Manluluwas, 34).