bukid

Usa ka bukid sa Ehipto nga tradisyunal nga gituohan nga mao ang Bukid sa Sinai.

Abril 18–24

Exodo 18–20

“Ang Tanan nga Giingon sa Ginoo Among Pagabuhaton”

Basaha ang Exodo 18–20, ug irekord ang mga impresyon nga imong madawat kon unsaon pagtabang ang mga sakop sa imong klase nga makakat-on gikan niini nga mga kapitulo. Bisan ang yano nga mga impresyon mahimong moresulta sa makahuluganon nga mga kasinatian sa pagkat-on.

Irekord ang Imong mga Impresyon

pagpaambit nga icon

Dapita ang Pagpaambit

Aron madapit ang mga sakop sa klase sa pagpaambit sa unsay ilang nakat-unan, mahimo nimong isulat diha sa pisara ang 18, 19, ug 20—ang mga kapitulo nga ilang gibasa niini nga semana. Hangyoa ang mga sakop sa klase nga isulat tupad sa matag numero sa kapitulo ang mga numero sa mga bersikulo nga gusto nilang hisgutan gikan niana nga kapitulo. Samtang ang mga sakop sa klase mopaambit sa ilang mga ideya, pangutan-a ang ubang mga sakop sa klase kon sila ba adunay mga ideya mahitungod sa samang mga tudling.

icon sa pagtudlo

Itudlo ang Doktrina

Exodo 18:13–26

Makatabang kita sa “[pag]yayong sa lulan” sa paghimo sa buhat sa Ginoo.

• Mahimo nimong maawhag ang imong klase sa paghisgot sa tambag nga gihatag ni Jetro ngadto ni Moises (tan-awa sa Exodo 18:13–26) pinaagi sa paghangyo kanila sa paghunahuna nga nakig-istorya sila sa usa ka tawo kinsa mibati nga ang iyang mga calling sa Simbahan, mga obligasyon sa pamilya, o ubang mga responsibilidad “mabug-at ra kaayo” ug nga siya “abuton og kaluya” (Exodo 18:18). Sa unsang paagi kaha nga ang tambag diha sa Exodo 18:13–26 makatabang? Unsa ang dugang nga tambag nga atong mapaambit gikan sa atong personal nga mga kasinatian?

• Ang pag-istorya mahitungod sa Exodo 18:13–26 mahimong makatanyag og oportunidad sa paghisgot kon sa unsang paagi nga ang pagpangalagad makatabang kanato sa “[pag]yayong sa lulan uban” sa atong mga lider diha sa buhat sa Ginoo (Exodo 18:22). Unsa ang mga kinaiya nga gisugyot ni Jetro nga pangitaon ni Moises niadtong moserbisyo isip “mga pangulo” sa katawhan? (tan-awa sa Exodo 18:21). Nganong importante man kadtong mga kinaiya sa atong mga paningkamot sa pagpangalagad sa usag usa? Sa unsang paagi nga ang pagpangalagad ngadto sa mga sakop sa pamilya, mga miyembro sa Simbahan, ug sa uban makatabang sa “[pag]yayong sa lulan” sa atong mga lider sa Simbahan? Isip kabahin sa panaghisgutan, mahimo nimong ipasalida ang usa sa may kalabutan nga mga video nga makita diha sa ministering.ChurchofJesusChrist.org.

  lalaki nga nakiglamano sa usa ka babaye

  Ang pagpangalagad ngadto sa uban usa ka paagi nga mahimo nato ang atong bahin diha sa buhat sa Ginoo.

Exodo 20:2–11

Kinahanglan natong unahon ang Ginoo sa atong kinabuhi.

• Makahunahuna ba kamo og usa ka buluhaton nga mas mosalir kon atong makompleto og una ang labing importante nga mga lakang? (Ang mga ehemplo mahimong maglakip sa pagsulbad og usa ka equation sa math o pagsunod og usa ka resipe). Ipaambit ngadto sa klase ang pipila ka ehemplo nga pamilyar ka, ug dapita sila nga maghunahuna og ilang kaugalingon. Sa unsang paagi nga ang pagkompleto og una sa labing importante nga mga lakang adunay kalabutan sa mga sugo diha sa Exodo 20:2–11? Unsa ang gitudlo kanato sa mga sugo mahitungod sa pag-una sa Dios sa atong kinabuhi? Unsa ang mga butang nga mahimo kitang matintal nga unahon kay Kaniya? (Alang sa pipila ka ehemplo, tan-awa diha sa “Dugang nga mga Kapanguhaan.”) Ang pagribyu sa Exodo 20:2–11 makatabang sa mga sakop sa imong klase nga mamalandong bahin sa ilang pasalig nga unahon ang Dios.

Exodo 20:2–17

Ang Dios maloloy-on.

• Unsaon nimo sa pagtabang ang mga sakop sa imong klase nga makasabut sa kaimportante sa Napulo ka Sugo sa atong panahon? Mahimo nimong bahinon ang klase ngadto sa mga parisan ug dapita sila sa pagbasa sa Exodo 20:2–17 ug dayon sa paghisgot kon sa unsang paagi nga ang pagsunod sa matag usa sa mga sugo makapanalangin kanila, sa ilang mga pamilya, ug sa mga tawo nga naglibut kanila. Unsa ang mga panalangin nga gisaad sa Langitnong Amahan kanato tungod sa pagsunod sa Iyang mga sugo? (tan-awa, sama pananglit, Mosiah 2:41). Sa unsang paagi nga kining mga sugo nagpakita sa gugma sa Dios alang kanato?

additional resources icon

Dugang nga mga Kapanguhaan

Walay lain nga mga dios.

Si Presidente Spencer W. Kimball nagtudlo nga adunay mga pagkapareha tali sa karaang pagsimba sa gikulit nga mga imahen ug sa kinaiya sa mga tawo karon. Miingon siya:

“Ang pagsimba sa mga dios-dios maoy usa sa labing bug-at sa mga sala. …

“Ang moderno nga mga larawan sa dios-dios o dili tinuod nga dios mahimo nga sama sa porma og sinina, mga panimalay, mga negosyo, mga makina, mga sakyanan sa dagat nga panglulinghayaw, ug daghan pang lain nga mga materyal nga makapahisalaag kanato gikan sa pagkadiosnon. …

“Ang dili mahikap nga mga butang sayon ra usab kaayo nga mahimong dios-dios. Ang mga kurso ug mga pasidungog ug mga titulo mahimo nga dios-dios. …

“Daghang mga tawo ang nagtukod ug nagsangkap sa panimalay ug gipalit og una ang sakyanan—ug dayon makita nga sila ‘dili makahimo’ sa pagbayad sa ikapulo. Kinsa ang ilang gisimba? Sa pagkatinuod dili ang Ginoo sa langit ug yuta. …

“Daghan ang mosimba sa pangayam, pamasol, pagbakasyon, mga piknik kada tapos sa semana ug mga paglulinghayaw. Ang uban mga paugnat sa kusog ang ilang dios-dios, baseball, football, pakig-away sa baka [bullfight], o golf. …

“Sa gihapon ang laing larawan nga gisimba sa tawo mao ang gahum ug pagkainila. … Kini nga mga dios-dios sa gahum, katigayunan, ug impluwensya maoy labing nakahurot sa atong panahon ug sama ra og tinuod nga bulawan nga mga baka sa mga anak sa Israel didto sa kamingawan” (Mga Pagtulun-an sa mga Presidente sa Simbahan: Spencer W. Kimball [2006], 183–84).

Pagpalambo sa Atong Pagtudlo

Magpokus sa pipila ka baruganan. “Daghan kaayo ang pwedeng mahisgutan sa matag leksyon, apan dili kinahanglan nga matudlo ang tanan sa usa ka klasehan aron matandog ang kasingkasing sa usa ka tawo—kasagaran ang usa o duha ka importanting mga punto igo na” (Pagtudlo sumala sa Pamaagi sa Manluluwas,7).