Ang Pulang Dagat

Abril 4–10

Exodo 14–17

“Dili Kamo Maglihok, ug Tan-awa Ninyo ang Kaluwasan sa Ginoo”

Hunahunaa kon sa unsang paagi nga ang mga kasinatian sa mga anak sa Israel magamit sa mga sakop sa imong klase. Hain sa mga kasinatian ang labing makatabang nga ilang hisgutan?

Irekord ang Imong mga Impresyon

Dapita ang Pagpaambit

Ang Exodo 14–17 puno sa halandumon nga mga asoy. Usa ka sakop sa klase mahimong magdrowing og hulagway sa usa ka panghitabo gikan niini nga mga kapitulo samtang ang ubang mga sakop sa klase motag-an kon unsa ang iyang gidrowing. Hangyoa sila sa pagpaambit sa unsay ilang nakat-unan gikan sa asoy.

Itudlo ang Doktrina

Exodo 14

Ang Langitnong Amahan moluwas kanato kon mosunod kita sa Espiritu.

• Ang Pulang Dagat morag mao na ang kinutoban sa mga Israelihanon, apan ang Dios nasayud sa mga butang nga wala nila masayri. Ang pagribyu sa asoy bahin sa milagrusong pagtabok sa Pulang Dagat makapahinumdom sa mga sakop sa klase sa mga panahon sa dihang giluwas sila sa Dios gikan sa ilang mga pagsulay. Mahimo nimong hangyuon ang mga sakop sa klase sa pagribyu sa Exodo 14 ug sa pagpaambit kon unsa ang labing nakapadasig kanila mahitungod niini nga asoy. Awhaga usab sila sa pagpaambit sa ilang mga kasinatian nga naluwas gikan sa mga pagsulay, uban sa mga bersikulo gikan sa kapitulo nga nakapaugmad sa ilang hugot nga pagtuo nga ang Dios makaluwas kanato.

• Mahimong makapainteresado usab ang pagbasa og dungan sa Doktrina ug mga Pakigsaad 8:2–3. Unsa ang gitudlo niini nga mga bersikulo mahitungod ni Moises? Sa unsang paagi nga kini nga mga bersikulo makaapekto sa paagi sa atong paghunahuna mahitungod sa mga panghitabo diha sa Exodo 14? Unsa ang gisugyot niini kon unsaon nato sa pagtinguha nga maluwas gikan sa atong mga pagsulay? Ikonsiderar kon unsay mahimong madugang sa pamahayag diha sa “Dugang nga mga Kapanguhaan” sa inyong panaghisgutan.

Ang mana gikan sa Dios mipakaon sa Israel sa pisikal nga paagi; nagkinahanglan usab kita og inadlaw-adlaw nga espirituhanong sustansiya. Fresco pinaagi ni Leopold Bruckner

Exodo 15:23–27; 16:1–15; 17:1–7

Ang Ginoo mosangkap sa atong mga panginahanglan samtang nagpanaw kita niini nga kinabuhi.

• Ang Exodo 15–17 naghatag og daghang asoy nga makapaugmad sa hugot nga pagtuo sa mga sakop sa klase diha sa gahum ug kaandam sa Ginoo nga mosangkap alang sa atong pisikal ug espirituhanong mga panginahanglan. Siguro ang matag sakop sa klase mahimong magtuon sa usa sa mosunod nga mga tudling, nga mangita sa espirituhanong mga mensahe: Exodo 15:23–27; 16:1–15; 17:1–7. Hatagi og kahigayunan ang pipila ka sakop sa klase sa pagpaambit sa unsay ilang nakit-an. Unsaon kaha nato sa paggamit niini nga mga asoy aron sa pagdasig sa usa ka tawo kinsa adunay temporal ug espirituhanong mga panginahanglan nga wala matubag?

• Ang mga sakop sa klase mahimo usab nga mobasa niini nga mga bersikulo ug motino og mga ehemplo sa pagbagulbol. Unsaon man nato sa pagpasabut ngadto sa usa ka tawo kon unsay gipasabut sa magbagulbol? Unsa ang pipila ka sangputanan sa pagbagulbol nga nakapahimo niini nga hilabihan ka peligro? Tingali ang mga sakop sa klase mahimong mopaambit og tambag kon unsaon paglikay sa tintasyon nga magbagulbol batok sa Ginoo kon makasinati kita og lisud nga mga pagsulay.

• Mahimong makatabang sa mga sakop sa klase ang pagtandi sa mana nga gihulagway diha sa Exodo 16 ngadto sa sustansiya [pampabaskog] nga gikinahanglan sa atong espiritu. Unsa ang mga pagkapareho nga atong makita? Unsa kaha ang espirituhanong mga leksyon nga gusto sa Ginoo nga itudlo sa mga Israelihanon pinaagi sa pagpadala og mana sa paagi nga Iyang gihimo? (tan-awa sa Juan 6:31–35, 48–58).

Exodo 17:8–16

Mapanalanginan kita kon atong paluyohan ang atong mga lider.

• Ang asoy bahin ni Aaron ug ni Hur nga miisa sa mga kamot ni Moises nagpakita sa kaimportante sa pagpaluyo niadtong gitawag nga mangulo kanato. Mahimo nimong dapiton ang pipila ka sakop sa klase sa pagdrama-drama sa kasinatian samtang ang laing sakop sa klase mobasa niini og kusog. Sa unsang paagi nga ang mga paningkamot ni Aaron ug ni Hur sa pag-isa sa mga kamot ni Moises susama sa atong mga paningkamot sa pagpaluyo sa atong mga lider? Unsaon nato sa pagpakita nga atong gipaluyohan ang atong mga lider?

Dugang nga mga Kapanguhaan

Makadawat ka og personal nga direksyon.

Si Sister Michelle Craig nagtudlo:

“Isip matinud-anong mga disipulo [sa Manluluwas], makadawat ikaw og personal nga inspirasyon ug pagpadayag, nga uyon sa Iyang mga sugo, nga gipahaom alang kanimo. May lahi ka nga mga misyon ug tahas nga buhaton sa kinabuhi ug mahatagan og lahi nga giya sa pagtuman niini.

“Si Nephi, igsoon ni Jared, ug gani si Moises tanan dunay dagkong lawod nga labangon—ug matag usa mihimo niini sa managlahing paagi. Si Nephi milalik og ‘mga kahoy sa talagsaon nga pagkahimo’ [1 Nephi 18:1]. Ang igsoon ni Jared mihimo og mga kasko nga ‘hugot sama ngadto sa usa ka tadyaw’ [tan-awa sa Ether 6:5–8]. Ug si Moises ‘nanagpanlakaw sa ibabaw sa mamala nga yuta sa taliwala sa dagat’ [Exodo 14:29].

“Matag usa kanila nakadawat og personal nga direksyon, gipahaom sa ilaha, ug ang matag usa misalig ug milihok. Ang Ginoo mahunahunaon niadtong motuman ug, sa mga pulong ni Nephi ‘moandam og paagi alang [kanato nga kita] makatuman sa butang diin siya misugo’ [1 Nephi 3:7]. Timan-i nga si Nephi misulti, ‘og paagi’—dili ‘ang paagi.’

Kita ba nalipat o mibaliwala sa personal nga mga buluhaton gikan sa Ginoo kay lahi ang iyang giandam ‘nga paagi’ kay sa atong gilauman?” (“Espirituhanong Kapasidad,” Liahona, Nob. 2019, 21).

Pagpalambo sa Atong Pagtudlo

Dapita ang uban sa pagpamatuod. Daghan niadtong imong gitudloan adunay ikapaambit nga gamhanan nga personal nga mga pagsaksi bahin sa kamatuoran. Dapita sila nga mopaambit sa ilang mga pagpamatuod pinaagi sa pagpangutana og yano nga mga pangutana, sama sa, “Sa unsang paagi nga kamo napanalanginan pinaagi sa pagsunod sa propeta?” (Tan-awa usab sa Pagtudlo sumala sa Pamaagi sa Manluluwas, 11.)