“Abril 11–17. Pasko sa Pagkabanhaw: ‘Gilamoy Niya ang Kamatayon Hangtud sa Walay Katapusan,’” Dali, Sunod Kanako—Alang sa Sunday School: Daang Tugon 2022 (2021)

“Abril 11–17. Pasko sa Pagkabanhaw,” Dali, Sunod Kanako—Alang sa Sunday School: 2022

Paghulagway sa walay sulod nga lubnganan pinaagi ni Maryna Kriuchenko

Abril 11–17

Pasko sa Pagkabanhaw

“Gilamoy Niya ang Kamatayon Hangtud sa Walay Katapusan”

Samtang mangandam ka sa pagtudlo sa Dominggo sa Pasko sa Pagkabanhaw, ikonsiderar kon sa unsang paagi ka makatabang sa mga sakop sa klase nga makabaton og mas lawom nga pagpasalamat ug pagpamatuod bahin sa maulaong sakripisyo ug Pagkabanhaw ni Jesukristo.

Irekord ang Imong mga Impresyon

Dapita ang Pagpaambit

Tingali mahimo nimong dapiton ang mga sakop sa klase nga mopaambit sa unsay gibuhat nila ug sa ilang pamilya aron mapalig-on ang ilang pagtuo diha ni Jesukristo ug sa Iyang Pag-ula atol niining panahon sa Pasko sa Pagkabanhaw.

Itudlo ang Doktrina

Tungod kay nabuntog sa Manluluwas ang kamatayon, kita usab mabuhi pag-usab.

Kay karon Dominggo sa Pasko sa Pagkabanhaw, ikonsiderar ang pagribyu sa asoy sa kasulatan bahin sa unang Pasko sa Pagkabanhaw—ang Pagkabanhaw ni Jesukristo (tan-awa sa Juan 20:1–17). Mahimo nimong dapiton ang usa ka sakop sa klase nga mosaysay sa istorya diha sa iyang kaugalingong mga pulong. Ang mga sakop sa klase mahimong malingaw usab sa pagkanta og mga himno mahitungod sa Manluluwas ug sa pagbasa sa may kalabutan nga mga kasulatan (ang mga pakisayran gilista sa ubos sa matag awit diha sa Mga Himno). Ang mga sakop sa klase mahimo dayon nga mopaambit og paborito nga mga hugpong sa mga pulong gikan sa mga himno ug sa ilang mga pagbati mahitungod sa Manluluwas.
Aron matabangan ang mga sakop sa klase nga makapasalamat kon sa unsang paagi nga ang Daang Tugon nagpamatuod bahin ni Jesukristo, mahimo nimo silang dapiton sa pagribyu sa mga kasulatan sa giandam nga lista diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ingon man usab sa mga tudling sa Basahon ni Mormon nga kuyog sa table. Unsa ang atong makat-unan mahitungod sa Manluluwas ug sa Iyang misyon gikan niini nga mga tudling? Nganong mahinungdanon man nga mahibalo mahitungod niining mga panagna?

Makakita kita og kalinaw ug hingpit nga kalipay pinaagi sa Pag-ula sa Manluluwas.

Ang outline niini nga semana diha sa Dali, Sunod Kanako—Alang sa mga Indibidwal ug mga Pamilya naglakip sa usa ka lista sa mga kasulatan nga naghulagway sa kalinaw ug hingpit nga kalipay nga moabut pinaagi ni Jesukristo. Kon ang mga sakop sa klase nakabasa niini nga mga kasulatan diha sa panimalay, awhaga sila sa pagpaambit sa ilang mga hunahuna ug mga pagbati mahitungod niini. O mahimo kamong mobasa og pipila ka kasulatan isip usa ka klase ug maghisgot mahitungod sa kalinaw ug hingpit nga kalipay nga atong mabati tungod sa Manluluwas ug sa Iyang Pag-ula. Unsaon nato sa pagpaambit niining mga panalangin ngadto sa mga tawo nga siguro nanglimbasug nga makakita og kalinaw ug hingpit nga kalipay diha sa ilang kinabuhi? Mahimo usab nimong dapiton ang usa ka sakop sa klase sa pagbasa sa mensahe ni Presidente Russell M. Nelson nga “Hingpit nga Kalipay ug Espirituhanon nga Pagsugakod” (Liahona, Nob. 2016, 81–84) atol sa semana sa wala pa ang klase ug sa pagtungha sa klase nga andam nga mopaambit kon unsay gitudlo niini nga mensahe mahitungod sa pagkakita og hingpit nga kalipay diha sa Manluluwas.
Mahimong mobati ka og kadasig sa pagpangulo og panaghisgutan kon unsaon pagtabang sa uban nga makakita og kalinaw ug hingpit nga kalipay diha ni Kristo. Mahimo nimong dapiton ang mga sakop sa klase sa paghunahuna mahitungod sa usa ka tawo nga ilang nailhan—tingali usa ka tawo nga ilang gipangalagaran—kinsa mahimong nagkinahanglan sa ilang suporta, serbisyo, o bisan yano nga maminaw sa ilang pagpamatuod bahin ni Kristo ug sa Iyang Pag-ula. Awhaga sila sa pagdangup ngadto sa mga kasulatan (sama niadtong anaa sa “Dugang nga mga Kapanguhaan”) samtang magkonsiderar sila sa serbisyo nga mahimo nilang mahatag o sa mga pagpamatuod nga mahimo nilang ipaambit aron mapalig-on kadtong naglibut kanila. Dapita ang pipila ka sakop sa klase sa pagpaambit sa ilang mga hunahuna mahitungod sa pagserbisyo sama sa gibuhat ni Jesus.

Si Kristo diha sa krus — Grey Day Golgotha [Subo nga Adlaw sa Golgota], ni J. Kirk Richards

Pinaagi sa Iyang Pag-ula, si Jesukristo adunay gahum sa pagtabang kanato sa pagbuntog sa sala, kamatayon, mga pagsulay, ug mga kahuyang.

Usa ka paagi aron matabangan ang mga sakop sa klase nga makapamalandong sa mga panalangin nga moabut pinaagi sa Pag-ula sa Manluluwas mao ang pagsulat diha sa pisara sa mga ulohan nga Sala, Kamatayon, Mga Pagsulay, ug Mga Kahuyang. Ang matag sakop sa klase mahimong mobasa sa usa sa mga kasulatan nga gilista diha sa “Dugang nga mga Kapanguhaan” ug mamalandong kon giunsa kita pagtabang sa Manluluwas nga makabuntog sa mga butang nga gisulat diha sa pisara. Ang mga sakop sa klase mahimo nga mosulat sa ilang mga pakisayran sa kasulatan ubos sa usa o dugang pa nga mga ulohan diha sa pisara ug mopaambit sa ilang mga pagpamatuod bahin sa Manluluwas ug sa Iyang Pag-ula.
Ang mga istorya ug mga analohiya makatabang kanato aron masabtan ang Pag-ula ni Jesukristo. Sama pananglit, mahimo nimong dapiton ang usa ka sakop sa klase sa pagpaambit sa usa sa mga istorya o mga analohiya sa mensahe ni Elder Walter F. González nga “Ang Hikap sa Manluluwas” (Liahona, Nob. 2019, 90–92) o sa mensahe ni Sister Neill F. Marriott nga “Pagpuyo diha sa Dios ug Paghulip sa Kal-ang” (Liahona, Nob. 2017, 10–12). Unsa ang gitudlo kanato niini nga mga istorya ug mga analohiya mahitungod sa Pag-ula ni Kristo? Dapita ang mga sakop sa klase nga magtrabaho nga magpares aron sa paghunahuna og kaugalingon nilang mga istorya o mga analohiya.
Unsay atong makat-unan gikan sa mosunod nga mga bersikulo mahitungod sa bugti nga gibayad ni Jesukristo alang sa atong kaluwasan: Isaias 53:3–5; Mosiah 3:7; Doktrina ug mga Pakigsaad 19:16–19? Unsa ang bugti nga gibayad sa atong Langitnong Amahan? (tan-awa sa Juan 3:16).

Dugang nga mga Kapanguhaan

Mga kasulatan mahitungod sa Pag-ula ni Jesukristo.

Pagpalambo sa Atong Pagtudlo

Pasalamati ang imong mga tigkat-on. “Ayaw kaayo og sobrang paghunahuna sa unsay imong itudlo nga makalimot na ka sa pagpasalamat sa mga tigkat-on alang sa ilang mga natampo. Kinahanglan masayud sila nga nakadayeg ka sa ilang kaandam sa pagpakigbahin sa ilang mga panabut ug mga pagpamatuod” (Pagtudlo sumala sa Pamaagi sa Manluluwas, 33).