Si Jehova nagpakita kang Moises ug sa mga anciano sa Israel

Paghulagway bahin ni Jehova nga nagpakita kang Moises ug sa 70 ka anciano sa Israel, ni Jerry Harston

Abril 25–Mayo 1

Exodo 24; 31–34

“Ang Akong Presensya Mouban Kanimo”

Tugoti nga kining mga pulong gikan ni Elder Jeffrey R. Holland mogiya sa imong pagpangandam sa pagtudlo: “Kadaghanan sa mga tawo dili mosimba aron mangita lang og pipila ka bag-ong kamatuoran sa ebanghelyo. … Moadto sila nga magtinguha og usa ka espirituhanong kasinatian. … Gusto nila nga ang ilang pagtuo malig-on ug ang ilang paglaum mabag-o” (“A Teacher Come from God,” Ensign, Mayo 1998, 26).

Irekord ang Imong mga Hunahuna

pagpaambit nga icon

Dapita ang Pagpaambit

Ang mga sakop sa klase mahimong maghunahuna nga ang usa ka higala moingon, “Dili ko mobasa og Daang Tugon; morag dili kini importante sa akong kinabuhi.” Hangyoa sila sa pagtubag pinaagi sa pagpaambit og butang nga ilang nakita nga makahuluganon diha sa ilang bag-o lang nga pagtuon sa Daang Tugon.

icon sa pagtudlo

Itudlo ang Doktrina

Exodo 31:12–17

Atong gitahud ang Igpapahulay isip usa ka timailhan sa atong pasalig ngadto sa Ginoo.

• Mahimo nimong sugdan pinaagi sa pagpangutana sa mga sakop sa klase kon sila nakasinati ba nga kinahanglang mopasabut ngadto sa usa ka sakop sa pamilya o higala kon nganong ilang gitagad nga lahi ang mga Dominggo kay sa ubang mga adlaw. Dapita sila sa pagpaambit sa unsay ilang gisulti o unsa kaha ang ilang isulti sa umaabut. Ang pagbasa sa Exodo 31:12–17 o sa pamahayag diha sa “Dugang nga mga Kapanguhaan” makahatag kanila og dugang nga mga ideya. Sa unsang paagi nga ang atong mga pagpili bahin sa Igpapahulay nagpakita sa atong pasalig ngadto ni Jesukristo?

• Bisan tuod nga ang mga silot nga gihulagway diha sa Exodo 31:14–15 dili magamit karon, nagpakita kini kon unsa ka kusganon ang gibati sa Ginoo mahitungod sa Igpapahulay. Nganong importante man kaayo kini nga sugo? Ang paghisgot niining mga kasulatan makatabang: Exodo 31:12–17; Isaias 58:13–14; Doktrina ug mga Pakigsaad 59:9–13.

  mga tawo nga naglakaw atubangan sa simbahan

  Pinaagi sa pagbalaan sa Igpapahulay, atong mapakita ang atong gugma alang sa Ginoo.

Exodo 32; 34:1–17

Sa pagpakasala mapahilayo kita gikan sa Dios, apan nagtanyag Siya og usa ka paagi nga makabalik.

• Aron matabangan ang mga sakop sa klase sa pagpamalandong ug sa paghimong personal sa asoy diha sa Exodo 32, una hangyoa sila sa pagribyu sa kapitulo sa tinagsa-tagsa nga paagi o diha sa mga grupo. Dayon hangyoa ang pipila ka sakop sa klase sa pagdala sa papel sa mga Israelihanon kinsa nagkaanam og kawalay pailub nga naghulat nga mobalik si Moises ug nakahukom nga maghimo og bulawan nga dios-dios. Unsa kaha nga mga pagbati ang nakaingon sa ilang pagsimba sa dios-dios? Ang ubang mga sakop sa klase mahimo nga mosulay sa pag-agni kanila nga magpabiling matinuoron ngadto sa Ginoo ug sa Iyang propeta. Ang mga sakop sa klase mahimong maghisgot kon unsay nakapadasig kanila aron matuman ang ilang mga pakigsaad. Unsay atong mabuhat aron matabangan kadtong kinsa siguro nanglimbasug sa pagtuman sa ilang mga pakigsaad?

• Kon ang mga tawo mobasa sa Daang Tugon, usahay matingala sila sa kahigpit sa mga silot nga gitakda sa Ginoo alang sa sala. Ang Exodo 34:1–9 makatabang kanila nga makita nga samtang ang Dios dili mobaliwala sa sala, maloloy-on usab Siya, nagtanyag og kapasayloan niadtong maghinulsol. Tingali ang mga sakop sa klase mahimong mobasa niining tudling ug mamalandong sa mga pangutana sama niini: Unsay atong nakat-unan mahitungod sa Ginoo gikan niining mga bersikulo? Nganong kinahanglan man kitang mahibalo niining mga butanga mahitungod Kaniya? Mahimo nimong ipasabut nga ang Hubad ni Joseph Smith sa Exodo 34:7 miklaro nga ang Dios dili “magapakamatarung sa masupilon” (imbis nga “magapakamatarung sa dautan”). Unsa kaha ang gipasabut niini? Tingali ang mga sakop sa klase mahimong mopaambit kon sa unsang paagi sila nakasaksi sa kalooy sa Dios. Sa unsang paagi nga nahimong posible alang sa Dios nga parehong maloloy-on sa hingpit nga paagi ug makiangayon sa hingpit nga paagi? (tan-awa sa Alma 42:13–15).

• Ang Exodo 34:6–17 makita isip usa ka panudlo [instruction] aron pagtabang sa mga Israelihanon nga makahinulsol sa ilang sala sa pagsimba sa mga dios-dios (nga gihulagway diha sa Exodo 32). Unsay atong makita niining mga bersikulo nga makatabang unta sa mga Israelihanon nga makahinulsol? Unsay atong makat-unan mahitungod sa Ginoo ug sa paghinulsol gikan niini nga panudlo?

Exodo 33:11–17

Nagkinahanglan kita sa presensya sa Dios sa atong kinabuhi.

• Unsaon nimo pagtabang ang mga sakop sa klase nga magamit ang unsay gisulti sa Ginoo ngadto ni Moises diha sa Exodo 33:11–17? Mahimo nimong sugdan pinaagi sa pagribyu sa buhat nga kinahanglan pang ipatuman sa Dios ni Moises (tan-awa sa Exodo 33:1–3). Unsa ang atong makita diha sa mga bersikulo 11–17 nga nakapalig-on ug nakapahupay ni Moises? Ang mga sakop sa klase mahimo nga makahunahuna mahitungod sa butang nga gusto sa Dios nga ilang buhaton—sama sa pagtuman sa usa ka calling sa Simbahan, usa ka responsibilidad sa pamilya, o usa ka oportunidad sa pagpangalagad. Mahimo dayon silang mobasa og usab sa mga bersikulo. Unsa nga mga ideya ang atong makuha mahitungod kon unsaon kita pagsuporta sa Dios?

icon sa dugang nga mga kapanguhaan

Dugang nga mga Kapanguhaan

Ang Igpapahulay usa ka timailhan.

Si Presidente Russell M. Nelson mipasabut: “Niadtong mas batan-on pa ko, gitun-an nako ang lista nga gibuhat sa ubang tawo sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan [tan-awa sa Exodo 31:13; Ezequiel 20:12, 20]. Ubos nianang pagsabut, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay” (“Ang Igpapahulay usa ka Kahimut-an,” Liahona, Mayo 2015, 130).

Pagpalambo sa Atong Pagtudlo

Pagtudlo pinaagi sa Espiritu. “Ang kinatas-ang katuyoan sa tanan nga buhaton sa usa ka magtutudlo sa ebanghelyo—matag pangutana, matag kasulatan, matag kalihokan—mao ang pagdapit sa Espiritu sa pag-ugmad og hugot nga pagtuo ug sa pagdapit sa tanan sa pagduol ngadto kang Kristo” (Pagtudlo sumala sa Pamaagi sa Manluluwas, 10).