Templo sa São Paulo Brazil

Mayo 2–8

Exodo 35–40; Levitico 1; 16; 19

“Pagkabalaan ngadto sa Ginoo”

Samtang ikaw adunay makahuluganong mga kasinatian sa pagtuon sa mga kasulatan, ikaw makatudlo ug makapamatuod sa higayon nga makigkita ka sa mga sakop sa klase inigka-Dominggo. Unsay imong buhaton aron sa pag-awhag sa uban nga mobuhat sa ingon?

Irekord ang Imong mga Hunahuna

pagpaambit nga icon

Dapita ang Pagpaambit

Ang mga kapitulo sa basahunon niini nga semana naggamit og mga simbolo sa pagtudlo mahitungod ni Jesukristo ug sa Iyang maulaon nga sakripisyo. Mahimo nimong sugdan ang klase pinaagi sa pagdapit sa mga sakop sa klase sa pagsulat o pagdrowing diha sa pisara og butang nga ilang nakita diha sa Exodo 35–40 o Levitico 1; 16; 19 nga nagtudlo kanila mahitungod sa Manluluwas. Dapita sila sa paghisgot mahitungod sa unsay ilang nakat-unan.

icon sa pagtudlo

Itudlo ang Doktrina

Exodo 35–40

Gusto sa Ginoo nga kita mahimong balaan sama Kaniya.

• Samtang nagtuon ang mga sakop sa klase sa Exodo 35–40 niini nga semana, tingali nakapamalandong sila kon sa unsang paagi nga ang mga elemento sa karaang tabernakulo nakagiya sa ilang mga hunahuna ngadto ni Jesukristo. Kon nahimo nila, awhaga sila sa pagpaambit sa ilang mga hunahuna. Ang tsart diha sa latid [outline] niini nga semana sa Dali, Sunod Kanako—Alang sa mga Indibidwal ug mga Pamilya mahimong makatabang niini nga panaghisgutan. Mahimo usab nimong hisgutan kon unsa ang gitudlo niining mga simbolo nga may kalambigitan sa tabernakulo mahitungod sa pagkahimong mas balaan. Sa unsang paagi nga si Jesukristo makatabang kanato nga mahimong mas balaan?

• Alang sa kadaghanan, ang ideya nga mahimong mas balaan daw dili makab-ot. Unsaon nimo pagtabang ang mga sakop sa klase nga makasabut nga ang pagkahimong balaan kabahin sa plano sa Langitnong Amahan alang kanato? Mahimo ninyong basahon og dungan ang pamahayag ni Presidente Henry B. Eyring diha sa “Dugang nga mga Kapanguhaan.” Unsa man ang gipasabut sa mahimong balaan? Sa unsang paagi nga ang atong mga templo sa ulahing mga adlaw ug ang buhat nga atong gihimo didto makatabang kanato nga mahimong mas balaan? (tan-awa usab sa Doktrina ug mga Pakigsaad 84:19–24; 109:6–26; 128:15–18). Mahimo dayon nimong hangyuon ang mga sakop sa klase sa pagpaambit kon sa unsang paagi nga kini nga mga butang nakatabang kanila—o sa uban nga ilang nailhan—nga mahimong mas balaan.

• Ang tabernakulo sa mga Israelihanon didto sa kamingawan susama sa daghang paagi sa atong mga templo sa ulahing mga adlaw. Mahimo nimong dapiton ang mga sakop sa klase sa paglista sa mga butang nga ilang nakat-unan mahitungod sa tabernakulo diha sa Exodo 35–40 nga nagpahinumdom kanila sa unsay atong nasinati diha sa templo. Kon magkinahanglan sila og tabang, mahimo nimong ipatan-aw kanila ang mga bersikulo diha sa Exodo 40 nga nagpasabut kalabut sa tabil, mga halaran, sagradong bisti, mga paghugas, mga pagdihog. Sa unsang paagi nga ang templo makatabang kanato nga moduol ngadto ni Kristo? Unsa ang atong mabuhat aron mapokus ang atong panahon diha sa templo ngadto Kaniya?

Levitico 1:1–9; 16

Pinaagi sa Pag-ula ni Jesukristo, kita mahimong mapasaylo.

• Bisan kon ang ideya sa pagsakripisyo og hayop morag lahi ra alang kanato karon, adunay daghan nga atong makat-unan gikan niini nga tradisyon mahitungod sa maulaon nga sakripisyo ni Jesukristo. Sa pagsugod og panaghisgutan, mahimo ka nga mopakita og mga hulagway sa Manluluwas didto sa Getsemani ug didto sa krus (tan-awa sa Libro sa mga Hulagway sa Ebanghelyo, mga nu. 56, 57). Ang mga sakop sa klase mahimong mopaambit og mga pulong nga sa ilang pamati may kalabutan sa maulaon nga sakripisyo ni Jesukristo. Dapita dayon ang mga sakop sa klase sa pagribyu sa Levitico 1:1–9 o Levitico 16, nga naghulagway kalabut sa pagsakripisyo og mga hayop, ug sa pagpangita sa mga pulong nga sa ilang pamati may kalabutan usab sa sakripisyo sa Manluluwas. Sa unsang paagi nga kining mga sakripisyo sa karaang panahon makatabang kanato nga mas makasabut sa Pag-ula ni Jesukristo? Ang mga sakop sa klase mahimong mokanta og usa ka himno mahitungod sa Manluluwas ug mopaambit sa ilang mga pagbati mahitungod Kaniya.

  mga tawo sa karaang panahon nga nagdala og mga halad aron matukod ang tabernakulo

  Ang mga anak sa Israel mihatag og mga halad alang sa tabernakulo nga adunay “masinugtanon [nga] kasingkasing” (Exodo 35:5). Paghulagway pinaagi ni Corbert Gauthier, © Lifeway Collection/lisensyado gikan sa goodsalt.com

• Mahimong makatabang sa mga sakop sa klase nga itandi ang mga sakripisyo nga gikinahanglan sa Ginoo sa panahon sa Daang Tugon ngadto sa mga sakripisyo nga Iyang gihangyo kanato karon. Pananglitan, mahimo silang molista og mga paagi sa mga sakripisyo nga atong gihimo alang sa Ginoo ug sa Iyang buhat, sama sa pagserbisyo diha sa mga calling, pagbayad sa mga halad sa puasa, paghimo sa buhat sa kasaysayan sa pamilya [family history], o pagpangalagad sa usag usa. Dayon mahimo ninyong basahon og dungan ang Levitico 1:1–9 ug dapiton ang mga sakop sa klase sa pagpangita sa mga elemento sa mga halad nga gihulagway niini nga mga bersikulo nga may kalabutan sa mga halad nga gipangayo sa Ginoo kanato karon (tan-awa sa 3 Nephi 9:19–20; Doktrina ug mga Pakigsaad 64:34). Unsa ang atong makat-unan gikan sa Moises 5:7 mahitungod kon unsaon nato pagtan-aw ang atong mga sakripisyo alang sa buhat sa Ginoo?

icon sa dugang nga mga kapanguhaan

Dugang nga mga Kapanguhaan

Ang Dios makahimo kanato nga balaan.

Si Presidente Henry B. Eyring nagtudlo:

Ang mas dakong kalipay moabut gikan sa mas dakong personal nga pagkabalaan. … Ang mga kasulatan nagtudlo kanato nga lakip sa ubang butang, mahimo kitang putli ug mas mahimong balaan kon mopakita kita og pagtuo diha kang Kristo, mopakita sa atong pagkamasulundon, maghinulsol, mosakripisyo alang Kaniya, modawat sa sagradong mga ordinansa, ug motuman sa atong mga pakigsaad ngadto Kaniya. …

“Ang himno nga ‘Dugang Kabalaan Hatagi Ako’ [Mga Himno, nu. 77] nagsugyot og usa ka paagi sa pag-ampo alang sa tabang aron mahimong mas balaan. Ang tagsulat maalamong misugyot nga ang pagkabalaan nga atong gitinguha usa ka gasa gikan sa mahigugmaong Dios, ihatag paglabay sa panahon, human sa tanan natong mabuhat” (“Pagkabalaan ug ang Plano sa Kalipay,” Liahona, Nob. 2019, 100–101, 103).

Pagpalambo sa Atong Pagtudlo

Paggamit og sagradong musika. Ang mga mensahe diha sa mga himno makapalig-on sa doktrina diha sa mga kasulatan. Pananglitan, ang pagkanta sa usa ka himno sama sa “Dugang Kabalaan Hatagi Ako” o “Ako Nagpabilin nga Natingala” (Mga Himno, mga nu. 77, 114) makapalig-on sa pipila ka mensahe nga gitudlo diha sa Levitico 16 ug 19.