Paghulagway kang Moises nga nag-orden ni Josue, ni Darrell Thomas

Mayo 23–29

Josue 1–8; 23–24

“Magmalig-on Ka ug Magmaisugon”

Samtang magbasa ka sa Josue 1–8 ug 23–24, ikonsiderar ang tambag nga “mamalandong ka niana sa adlaw ug sa gabii” (Josue 1:8). Hatagi og pagtagad ang mga pag-aghat nga moabut. Tingali makahatag kini og mga ideya sa pagtudlo alang sa imong klase.

Irekord ang Imong mga Hunahuna

Dapita ang Pagpaambit

Dapita ang mga sakop sa klase sa pagpaambit og usa ka tudling gikan sa ilang nabasa niini nga semana nga nakapalig-on sa ilang pagtuo diha ni Jesukristo. Pananglitan, tingali nakapamalandong sila og mga paagi nga ang misyon ni Josue nagpahinumdon kanila sa misyon ni Jesukristo. Nganong mapasalamaton man kita alang sa mga istorya diha sa basahon ni Josue?

Itudlo ang Doktrina

Josue 1:1–9

“Magmalig-on ka ug magmaisugon.”

• Si Josue giingnan, “Magmalig-on ka ug magmaisugon” sa makapila ka higayon (tan-awa sa Deuteronomio 31:7, 23; Josue 1:6–7, 9). Tingali makatabang sa mga sakop sa klase ang paghisgot kon unsa ang gipasabut sa Ginoo niini nga hugpong sa mga pulong. Mahimo silang mosiksik sa Josue 1:1–9 alang sa gihatag nga tambag sa Ginoo kang Josue sa pagtabang niya nga magmalig-on ug magmaisugon. Mahimo usab sila nga mopaambit og mga ehemplo sa mga tawo nga ilang nailhan nga aduna niini nga mga kinaiya. Giunsa sa pagpakita ni Josue og kalig-on ug kaisug diha sa mga asoy nga makita sa basahon ni Josue? (pananglitan, tan-awa sa mga kapitulo 3, 6, ug 8). Ang mga sakop sa klase mahimong mopaambit kon sa unsang paagi sila naningkamot nga magmalig-on ug magmaisugon alang kang Kristo.

Josue 1:8

Ang pulong sa Dios makahimo sa atong dalan nga mauswagon.

• Aron maawhag ang mga sakop sa klase diha sa ilang personal ug pamilya nga pagtuon sa kasulatan, mahimo ninyong basahon ang Josue 1:8 isip usa ka klase. Unsa ang atong makat-unan gikan niini nga bersikulo mahitungod kon unsaon sa pagtuon sa mga kasulatan? Tingali ang mga sakop sa klase makapaambit sa unsay ilang gibuhat aron “mamalandong” sa mga kasulatan “sa adlaw ug sa gabii.” Giunsa paghimo sa Ginoo nga kita “magmauswagon sa panaw” ug sa paghatag nato og “kauswagan” samtang nagtuon kita sa Iyang pulong?

  

  Ang pulong sa Dios “[makahimo nga] magmauswagon sa [atong] panaw” (Josue 1:8).

Josue 3–4

Makasinati kita og “mga katingalahan” sa Dios.

• Tingali makatabang sa mga sakop sa klase ang mubo nga pagribyu sa asoy sa mga Israelihanon sa pagtabok sa Suba sa Jordan. Mahimo nimong bahinon ang klase nga magpares-pares ug dapita ang matag pares sa pagsulti sa istorya ngadto sa usag usa, magpuli-puli nga moistorya og usa ka kapahayag [sentence] (awhaga sila sa pagtan-aw diha sa Josue 3 kon nagkinahanglan sila og tabang aron mahinumduman ang istorya). Dayon, isip usa ka klase, mahimo nilang hisgutan ang bisan unsang detalye nga mahinungdanon kanila. Unsay atong makat-unan gikan niini nga istorya nga makatabang kanato nga masinati ang “mga katingalahan” sa Ginoo diha sa atong kinabuhi? (bersikulo 5). Unsa nga “mga katingalahan” ang Iyang nabuhat alang kanato? Nganong importante man nga ang matag henerasyon makabaton og espirituhanong mga kasinatian nga nagtudlo kanila nga “ang Ginoo … makagagahum”? (Josue 4:24).

• Bisan kon kitang tanan nagkinahanglan nga makabaton og atong kaugalingong makapalig-on sa pagtuo nga mga kasinatian, ang paghinumdom sa unsay gibuhat sa Ginoo alang sa atong mga katigulangan importante usab. Sumala sa Josue 4, unsay gihimo sa mga Israelihanon aron matabangan ang umaabut nga mga henerasyon nga mahinumduman ang pagtabok sa Suba sa Jordan? (tan-awa sa Josue 4:1–7). Unsay atong gibuhat aron masiguro nga ang atong mga kasinatian dili makalimtan sa umaabut nga mga henerasyon?

Josue 6–8

Ang pagkamasulundon nagdala og gahum sa Dios sa akong kinabuhi.

• Ang latid [outline] niini nga semana diha sa Dali, Sunod Kanako—Alang sa mga Indibidwal ug mga Pamilya nagsugyot sa pagtandi sa mga pakig-away sa mga Israelihanon batok sa mga Canaanhon diha sa Josue 6–8 ngadto sa atong personal nga mga pakig-away batok sa tintasyon. Mahimo nimong pangutan-on ang mga sakop sa klase kon unsay ilang mga hunahuna o mga gibati samtang nagbasa sila niini nga mga kapitulo nga maghunahuna niini nga pagtandi. O mahimo nimong ipatan-aw kanila ang piho nga mga bersikulo nga tingali adunay kalabutan sa atong mga pakig-away sa paglikay sa sala, ug makaistorya sila mahitungod kon unsay gitudlo niadto nga mga bersikulo mahitungod sa pagbaton sa gahum sa Dios sa atong kinabuhi. Pipila niini nga mga bersikulo mahimong naglakip sa Josue 6:1–5, 18, 20; 7:11–13.

Josue 23–24

“Magpili kamo niining adlawa kon kinsa ang inyong alagaran.”

• Tingali makatabang sa mga sakop sa klase nga magamit ang Josue 23–24 sa ilang kaugalingon kon maghunahuna sila nga sila kunohay mga Israelihanon nga naminaw ni Josue nga naghatag og tambag diha sa katapusan sa iyang kinabuhi. Mahimong hatagan nimo sila og pipila ka bersikulo nga basahon sa hilum ug dayon mohangyo nila sa pagpaambit og butang gikan niadto nga mga bersikulo nga nakapadasig nila aron magpabiling matinud-anon ngadto sa Ginoo. Mahimo usab sila nga mopaambit kon giunsa nila paghimo ang desisyon sa ilang kaugalingon mahitungod sa “kinsa ang [ilang] alagaran” (Josue 24:15). Nganong gihimo man nila kini nga desisyon?

• Mahimo nimong dapiton ang mga sakop sa klase sa pagkuha og usa ka hugpong sa mga pulong gikan sa Josue 23–24 nga nakapadasig nila sa pagpili sa pagserbisyo sa Dios ug dayon maghimo og poster o meme gamit niini nga hugpong sa mga pulong nga ipakita diha sa panimalay o sa social media.

Pagpalambo sa Atong Pagtudlo

Ang espirituhanon nga paglambo mahitabo diha sa panimalay. Ang mga sakop sa imong klase nagkinahanglan nga makabaton og ilang kaugalingon nga espirituhanong mga kasinatian sa gawas sa klase aron magpabiling lig-on sa espirituhanong paagi. Pangita og mga paagi nga magamit ang mubo nga oras nga ikaw aduna uban nila sa pagdasig nila nga magtinguha og espirituhanong pag-amuma sa mga kasulatan diha sa panimalay—sa tinagsa ug uban sa ilang mga pamilya. (Tan-awa sa Pagtudlo sumala sa Pamaagi sa Manluluwas, 18.)